ବଲାଙ୍ଗୀର, ୧୫ା୭ (ବୀରେନ୍ଦ୍ର କୁମାର ଝାଙ୍କର): ବଲାଙ୍ଗୀର ସହର କେନ୍ଦ୍ରୀୟ ବିଦ୍ୟାଳୟ ନିକଟସ୍ଥ ନିଖିଳ ନଗରରେ ଗୁରୁବାର ଘରେ ପଶି ନାବାଳିକା ଶେଷାଦ୍ରୀ ନାଗ (୧୫)ଙ୍କ ତଣ୍ଟି କାଟି ହତ୍ୟା ଘଟଣାର ମୁଖ୍ୟ ଅଭିଯୁକ୍ତଙ୍କ ସମେତ ଦୁଇଜଣଙ୍କୁ ପୋଲିସ ଶୁକ୍ରବାର ଗିରଫ କରିଛି। ଗିରଫ ଦୁଇ ଅଭିଯୁକ୍ତ ହେଲେ ଆଗଲପୁର ଥାନା ରୋତ୍ ଗ୍ରାମର ମିଲନ୍ ରଣା (୨୧) ଓ ଜିତୁ ରଣା (୨୧)। ହତ୍ୟାକାଣ୍ଡ ଭିଆଇବା ପରେ ଘର ପଛ ପଟ ଜଙ୍ଗଲ ଭିତର ଏକ ପଥର ଚଟାଣ ନିକଟରେ ହତ୍ୟାରେ ବ୍ୟବହୃତ ଏକ କଟୁରି ଏବଂ ରକ୍ତ ପୋଛିଥିବା ଏକ ଶାର୍ଟକୁ ଲୁଚାଇ ଦେଇ ଦୁଇ ଅଭିଯୁକ୍ତ ସେଠାରୁ ଫେରାର ହୋଇଯାଇଥିଲେ। ଟାଉନ୍ ପୋଲିସ ମୁଖ୍ୟ ଅଭିଯୁକ୍ତ ମିଲନ ରଣାଙ୍କୁ ଧରି ସିନ୍ ରିକ୍ରିଏସନ୍ ପରେ ବଲାଙ୍ଗୀର ଏସଡିପିଓ ତୋଫାନ୍ ବାଗ ନାବାଳିକା ହତ୍ୟା ଘଟଣାରେ ଦୁଇ ଅଭିଯୁକ୍ତ ଗିରଫ ହୋଇଥିବା ସୂଚନା ଦେଇଛନ୍ତି। ହତ୍ୟାର କାରଣ ସମ୍ପର୍କରେ ଏସଡିପିଓ ବାଗ ଗଣମାଧ୍ୟମକୁ କିଛି ବି ସୂଚନା ଦେଇ ନ ଥିବାବେଳେ ପ୍ରେମଜନିତ କାରଣରୁ ଏହି ହତ୍ୟାକାଣ୍ଡ ଘଟିଥିବା ଚର୍ଚ୍ଚାର ବିଷୟ ହୋଇଛି। ହତ୍ୟା କରିବା ପରେ ଫେରାର ଥିବା ମୁଖ୍ୟ ଅଭିଯୁକ୍ତ ମିଲନ୍ଙ୍କୁ ଆନ୍ଧ୍ରପ୍ରଦେଶର ଶ୍ରୀକାକୁଲମ୍ରୁ ପୋଲିସ ଗିରଫ କରିବାରେ ସକ୍ଷମ ହୋଇଥିବା ଜଣାପଡିଛି। ଶନିବାର ବଲାଙ୍ଗୀର ଏସପି ଋଷିକେଶ ଖିଲାରୀ ଗଣମାଧ୍ୟମକୁ ହତ୍ୟାକାଣ୍ଡ ସମ୍ପର୍କରେ ସବିଶେଷ ସୂଚନା ଦେବେ ବୋଲି ସୂଚନା ଦିଆଯାଇଛି।
ଗୁରୁବାର ଅପରାହ୍ନରେ ନିଖିଲନଗର ନିବାସୀ ମକରଧ୍ୱଜ ନାଗଙ୍କ ଘରେ ପଶି ତାଙ୍କ ସାନ ଝିଅ ଶେଷାଦ୍ରୀଙ୍କୁ କେହି ଦୁର୍ବୃତ୍ତ ହତ୍ୟା କରିଥିଲେ। ହତ୍ୟାକାଣ୍ଡ ସମୟରେ ଶେଷାଦ୍ରୀ ଘରେ ଏକାକୀ ଥିଲେ। ତାଙ୍କ ପିତା ମକରଧ୍ୱଜ ଜଣେ ମିସ୍ତ୍ରି ଓ ମାତା ପୂର୍ଣ୍ଣମୀ ନାଗ ମ୍ୟୁନିସିପାଲିଟି ବର୍ଜ୍ୟବସ୍ତୁ ପରିଚାଳନା କେନ୍ଦ୍ରରେ କର୍ମଚାରୀ ଭାବେ କାର୍ଯ୍ୟ କରୁଥିବାରୁ ସବୁଦିନ ଭଳି କାମ କରିବାକୁ ଯାଇଥିଲେ। ଦିନ ପ୍ରାୟ ୧ଟାରେ ମାତାପିତା କାମରୁ ଘରକୁ ଫେରିଥିଲେ। ଘରେ ପହଞ୍ଚତ୍ବା ପରେ ଝିଅ ଶେଷାଦ୍ରୀଙ୍କ ରକ୍ତାକ୍ତ ମୃତଦେହ ଚଟାଣରେ ପଡିଥିବା ଦେଖିବାକୁ ପାଇଥିଲେ। ଏହା ପରେ ସ୍ଥାନୀୟ ଲୋକେ ଟାଉନ୍ ଥାନା ପୋଲିସକୁ ଖବର ଦେଇଥିଲେ। ଟାଉନ୍ ଥାନା ଆଇଆଇସି ବିଶ୍ୱଜିତ ମନବୋଧ ଘଟଣାସ୍ଥଳରେ ପହଞ୍ଚତ୍ ତଦନ୍ତ ଆରମ୍ଭ କରିଥିଲେ। ବଲାଙ୍ଗୀର ଏସପି ଋଷିକେଶ ଖିଲାରି ଘଟଣାସ୍ଥଳ ପରିଦର୍ଶନ କରିବା ସହ ହତ୍ୟାକାରୀଙ୍କୁ ଗିରଫ କରିବା ପାଇଁ ଏକ ସ୍ବତନ୍ତ୍ର ଟିମ୍ ଗଠନ କରିଥିଲେ। ସ୍ବତନ୍ତ୍ର ଟିମ୍ ତଦନ୍ତକୁ ତ୍ୱରାନ୍ବିତ କରିବା ପରେ ସିସିଟିଭି ଫୁଟେଜ ଏବଂ ମୋବାଇଲ ଟ୍ରାକିଂ ଜରିଆରେ ଦୁଇ ଅଭିଯୁକ୍ତଙ୍କୁ ଗିରଫ କରିବାରେ ସଫଳ ହୋଇଥିବା ଜଣାପଡିଛି। ଶୁକ୍ରବାର ସିନ୍ ରିକ୍ରିଏସନ୍ ବେଳେ ମୁଖ୍ୟ ଅଭିଯୁକ୍ତ ମିଲନ୍ ତାଙ୍କ ସହଯୋଗୀ ଜିତୁ ସହ ଏକ ମୋଟର ସାଇକେଲରେ ନିଖିଲନଗର ପଛପଟ ଜଙ୍ଗଲକୁ ଆସି ସେଠାରୁ ଶେଷାଦ୍ରୀଙ୍କ ଘର ପଟରୁ ପଶିଥିଲେ। ସେଠାରେ ଶେଷାଦ୍ରୀଙ୍କ ସହ ଯୁକ୍ତିତର୍କ କରି ଘର ପଛ ପଟେ ତାଙ୍କୁ ପିଟିଥିଲେ। ସେଠାରୁ କିଭଳି ଭାବେ ସେ ତାଙ୍କୁ ଶୟନ କକ୍ଷକୁ ନେଇ ଏକ କଟୁରି ସହାୟତାରେ ହତ୍ୟା କଲେ ଏବଂ ଶେଷାଦ୍ରୀଙ୍କ ବାପାଙ୍କ ଏକ ଶାର୍ଟରେ ରକ୍ତ ସଫା ଉଦ୍ୟମ କରିବା ସହ ନିଜ ହାତରେ ଲାଗିଥିବା ରକ୍ତ ପୋଛି ଉକ୍ତ କଟୁରି ଏବଂ ରକ୍ତଭିଜା ଶାର୍ଟକୁ ଜଙ୍ଗଲ ଭିତର ପଥର ଚଟାଣ ତଳେ ରଖି ଫେରାର ମାରିଥିଲେ ସେ ସମ୍ପର୍କରେ ପୋଲିସକୁ ଜଣାଇଥିଲେ। ପ୍ରେମ ବିଫଳତାରୁ ମିଲନ୍ ଏଭଳି କାଣ୍ଡ ଭିଆଇଥିବା ଚର୍ଚ୍ଚାର ବିଷୟ ହୋଇଛି। ପୋଲିସ ଶନିବାର ହତ୍ୟାର ଗୁମର ଖୋଲିବ।