ଭୁବନେଶ୍ୱର,୨୭।୧୦(ବ୍ୟୁରୋ): ଏଣିକି ଯୁକ୍ତ୨ ପରୀକ୍ଷାର ଉତ୍ତରଖାତା ଅନ୍ଲାଇନ୍ରେ ଉପଲବ୍ଧ ହେବ। କେଉଁ ପ୍ରଶ୍ନର ଉତ୍ତରରେ କେତେ ମାର୍କ ପାଇଛନ୍ତି ତାହା ନିଜେ ଛାତ୍ରୀଛାତ୍ର ଦେଖିପାରିବେ। ଏଥିଲାଗି ପୂର୍ବରୁ ଯୋଜନା ହୋଇଥିଲେ ମଧ୍ୟ କରୋନା ଯୋଗୁ ଗତ ୨ବର୍ଷ ହେବ ପରୀକ୍ଷାରେ ସମସ୍ୟା ପାଇଁ ଏହା ଲାଗୁ ହୋଇପାରି ନ ଥିଲା। ତେବେ ଏହି ବ୍ୟବସ୍ଥା ଶୀଘ୍ର ଲାଗୁ ହେବାକୁ ଯାଉଛି। ଅନ୍ଲାଇନ୍ରେ ଉତ୍ତର ଖାତା ଉପଲବ୍ଧ ହେବା ପରେ ପୂର୍ବରୁ ରେଜଲ୍ଟ ପ୍ରକାଶ ପରେ ପିଲାମାନେ ଯେପରି କମ୍ ମାର୍କ ମିଳିଥିବା ଅଭିଯୋଗ କରୁଥିଲେ ଏବଂ ପରିଷଦକୁ ଦୌଡ଼ୁଥିଲେ, ସେପରି ସମସ୍ୟା ଆଉ ରହିବ ନାହିଁ। କଳା, ବିଜ୍ଞାନ, ବାଣିଜ୍ୟ ଓ ଧନ୍ଦାମୂଳକ ଶିକ୍ଷାର ଉତ୍ତରଖାତା ମୂଲ୍ୟାଙ୍କନ ଶେଷ ହେବା ପରେ ଏବଂ ରେଜଲ୍ଟ ପ୍ରକାଶ ପାଇବାର ଏକ ସପ୍ତାହ ମଧ୍ୟରେ ଏହି ଉତ୍ତରଖାତାକୁ ଅନଲାଇନ୍ରେ ଅପ୍ଲୋଡ୍ କରାଯିବ। ପ୍ରତ୍ୟେକ କଲେଜକୁ ଏକ ସ୍ବତନ୍ତ୍ର ଆଇଡି ପାସ୍ୱାର୍ଡ ଦିଆଯିବ। ସେହି ପାସ୍ୱାର୍ଡ ମାଧ୍ୟମରେ କଲେଜ କର୍ତ୍ତୃପକ୍ଷ ସେମାନଙ୍କ କଲେଜର ପିଲାଙ୍କ ଉତ୍ତରଖାତା ଦେଖିପାରିବେ। ଉତ୍ତରଖାତାକୁ ଛାତ୍ରୀଛାତ୍ର ଯାଞ୍ଚ କରିବା ପରେ ଯଦି କିଛି ଭୁଲ୍ ଥିବା ଅଭିଯୋଗ କରନ୍ତି ତେବେ ସେହି ଖାତାର ପୁନଃ ଯାଞ୍ଚ କରାଯିବ ବୋଲି ଗଣଶିକ୍ଷା ବିଭାଗ ପକ୍ଷରୁ ନିଷ୍ପତ୍ତି ହୋଇଛି।
ସବୁ ଉତ୍ତରଖାତାର ସ୍କାନିଂ କରାଯାଇ ଅନଲାଇନ୍ରେ ଅପ୍ଲୋଡ କରାଯିବ। ଅନ୍ଲାଇନ୍ ଲିଙ୍କ୍ ମାଧ୍ୟମରେ ପରୀକ୍ଷାର୍ଥୀ ଓ ସେମାନଙ୍କ ଅଭିଭାବକ ଉତ୍ତରଖାତା ଦେଖିବାର ସୁଯୋଗ ପାଇବେ। ଖାତାରେ ପିଲାମାନେ କିପରି ଲେଖିଛନ୍ତି, କେତେ ମାର୍କ ପାଇଛନ୍ତି ଏବଂ କାହିଁକି ମାର୍କ କମ୍ ରହିଛି ସବୁ ତଥ୍ୟ ଅଭିଭାବକ ଜାଣି ପାରିବେ। ଫଳରେ ଅଯଥା ପୁନଃଯାଞ୍ଚରୁ ମୁକ୍ତି ମିଳିବ ଓ ମାର୍କ ବଢ଼ିବ ବୋଲି ଛାତ୍ରୀଛାତ୍ର ଯେଉଁ ଦ୍ୱନ୍ଦ୍ୱରେ ରହୁଥିଲେ ତାହା ଆଉ ରହିବ ନାହିଁ। ଅନେକ ସମୟରେ କମ୍ ମାର୍କ ଥିବା ଉତ୍ତରଖାତାରେ ସଂଶୋଧନ ଲାଗି ଅନେକ ସମୟ ଲାଗୁଥିବାବେଳେ ବହୁ ମେଧାବୀ ଉଚ୍ଚଶିକ୍ଷାରୁ ବଞ୍ଚତ୍ତ ହେଉଥିଲେ। ସେହିପରି କିଛି ଛାତ୍ରୀଛାତ୍ର ଜାଣିଶୁଣି କମ୍ ମାର୍କ ଦିଆଯାଉଥିବା ଅଭିଯୋଗ କରୁଥିଲେ। ତେବେ ଅନ୍ଲାଇନ୍ରେ ଉତ୍ତରଖାତା ଅପ୍ଲୋଡ୍ କରିବା ପରେ ପିଲାଙ୍କ ପାଖରେ ତାହା କିପରି ପହଞ୍ଚତ୍ବ ସେଥିପାଇଁ କେଉଁ ଆଇଟି କମ୍ପାନୀ ବ୍ୟବସ୍ଥା କରିବ ସେ ନେଇ ବିଭାଗ ପକ୍ଷରୁ ବିଚାରବିମର୍ଶ ଚାଲିଥିବା ଜଣାପଡ଼ିଛି।
