ଆଠମଲ୍ଲିକ,୨୫ା୨(ଡି.ଏନ.ଏ.) – ସରକାରୀ ଉଦାସୀନତା, ବ୍ଲକ ପ୍ରଶାସନର ଚରମ ଅବହେଳା ତଥା ରାଜନୈତିକ ଗୋଷ୍ଠୀ ବିବାଦ ଯୋଗୁ ଆଠମଲ୍ଲିକ ବ୍ଲକ ଠାକୁରଗଡ ପଞ୍ଚାୟତର ହତାଶିମିଳି ପୋଲ ଅର୍ଦ୍ଧନିର୍ମିତ ଅବସ୍ଥାରେ ପଡିରହିଛି। ୧୦ ଲକ୍ଷ ଟଙ୍କା ବଳକା ଥିବାରୁ ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ କରିବାକୁ ଗ୍ରାମବାସୀଙ୍କ ପକ୍ଷରୁ ବାରମ୍ବାର ଦାବି କରାଯାଉଥିଲେ ମଧ୍ୟ କିଛି ବି ପଦକ୍ଷେପ ନିଆଯାଉ ନାହିଁ। ବିଶେଷକରି ବ୍ଲକ ପ୍ରଶାସନ କାର୍ଯ୍ୟ ନ କରି ନୀରବ ବସିଥିବାରୁ ଏ ନେଇ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି। ଏପରି ଅବସ୍ଥାରେ ଗ୍ରାମବାସୀ ଉକ୍ତ ଅଦ୍ଧନିର୍ମିତ ପୋଲର ପିଲର ଉପରେ ଇଲେକ୍ଟ୍ରି ଖୁଣ୍ଟ ପକାଇ ଯାତାୟାତ କରିବାକୁ ବାଧ୍ୟ ହେଉଛନ୍ତି। ଦୈନିକ ଛାତ୍ରୀଛାତ୍ରମାନେ ଏହି ପୋଲ ଦେଇ ବିପଦସଙ୍କୁଳ ଅବସ୍ଥାରେ ଯିବାଆସିବା କରୁଥିବାରୁ ଦୁର୍ଘଟଣା ଆଶଙ୍କା ରହିଥିବା ଗ୍ରାମବାସୀ ପ୍ରକାଶ କରିଛନ୍ତି।
ପ୍ରକାଶ ଯେ, ଠାକୁରଗଡ ପଞ୍ଚାୟତ ୨୧ ନମ୍ବର ୱାର୍ଡରେ ଥିବା ଏହି ହତାଶିମିଳି ଗ୍ରାମର ପରିବାର ସଂଖ୍ୟା ୧୨୦। ଗ୍ରାମରେ ଥିବା ଏକ ନାଳ ଉପରେ ପୋଲ ନିର୍ମାଣ ପାଇଁ ୨୦ ଲକ୍ଷ ଟଙ୍କା ବ୍ୟୟ ଅଟ୍ଟକଳ କରାଯାଇଥିଲା। ଏଥିପାଇଁ ଜିଲା ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ୧୦ ଲକ୍ଷ ଓ ପଶ୍ଚିମ ଓଡ଼ିଶା ବିକାଶ ପରିଷଦ ପକ୍ଷରୁ ଆଉ ୧୦ ଲକ୍ଷ ଟଙ୍କା ପ୍ରଦାନ କରାଯାଇଥିଲା। ୨୦୧୬ ଡିସେମ୍ବର ୨୧ରେ ପୋଲର ଶିଳାନ୍ୟାସ କରାଯିବା ପରେ ବ୍ଲକ ତତ୍ତ୍ୱାବଧାନରେ ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା। କିନ୍ତୁ କେତୋଟି ପିଲର ପକାଯାଇ ନିର୍ମାଣ କାର୍ଯ୍ୟକୁ ସେବେଠୁ ବନ୍ଦ ରଖାଯାଇଛି। ଫଳରେ ଯାତାୟାତ ପାଇଁ ଗ୍ରାମବାସୀ ବାଧ୍ୟହୋଇ ଉକ୍ତ ପିଲର ଉପରେ କେତୋଟି ଇଲେକ୍ଟ୍ରି ଖୁଣ୍ଟ ପକାଇଛନ୍ତି। ପୋଲ କାର୍ଯ୍ୟ ଅର୍ଦ୍ଧ ନିର୍ମିତ ଅବସ୍ଥାରେ ଥିଲେ ବି କାର୍ଯ୍ୟ କରୁଥିବା ଠିକାଦାର ୧୦ ଲକ୍ଷ ଟଙ୍କାର ବିଲ୍ ଉଠାଇ ନେଇଥିବା ଗ୍ରାମବାସୀ ଅଭିଯୋଗ କରିଛନ୍ତି। ବାକି ୧୦ ଲକ୍ଷ ଟଙ୍କା ଏବେ ବି ବ୍ଲକ ପ୍ରଶାସନ ନିକଟରେ ପଡ଼ି ରହିଛି। କିନ୍ତୁ ବ୍ଲକର ଦୁଇ ରାଜନୈତିକ ଗୋଷ୍ଠୀଙ୍କ ମଧ୍ୟରେ ବିବାଦ ଯୋଗୁ ନିର୍ମାଣ କାର୍ଯ୍ୟ ଆଉ ଆଗେଇପାରୁ ନ ଥିବା ଚର୍ଚ୍ଚା ହେଉଛି। ତୁରନ୍ତ ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ଗ୍ରାମବାସୀ ଦାବି କରିଛନ୍ତି। ଏ ସମ୍ପର୍କରେ ଆଠମଲ୍ଲିକ ବିଡିଓ ସଞ୍ଜୟ କୁମାର ଆଚାର୍ଯ୍ୟ କହିଛନ୍ତି, ଘଟଣା ସମ୍ପର୍କରେ ତର୍ଜମା କରାଯାଇ ଆବଶ୍ୟକ ପଦକ୍ଷେପ ନିଆଯିବ।
