ଜାମଟିକ୍ରା, ୧୯।୨ (ଡି.ଏନ୍.ଏ.)- ସରକାରୀ ଯୋଜନାର ଲାଭ୍ କେନ୍ଥେଇ ହକ୍ଦାର ହିତାଧିକାରୀ ପାଇପାରବେ ସେଥିରଲାଗି ରାଏଜ୍ ସରକାର ଅନେକ ବିଭାଗ, ଯୋଜନାକେ ୫ଟି, ମୋ ସରକାରରେ ସାମିଲ କରିଛନ୍। ହେଲେ କେତେ ଲଁାଚୁଆ ଅଧ୍କାରୀ, କରମ୍ଚାରୀକର ଲାଗି ଅନେକ ହକ୍ଦାର ହିତାଧିକାରୀ ସରକାରୀ ଯୋଜନାର ଲାଭ୍ ପାଏବାରୁ ବଁଚିତ୍ ହେଉଛନ୍। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ବରଗଡ଼ ଜିଲା ଅତାବିରା ବ୍ଲକ ଚକୁଳି ପଁଚେତ୍ରେ।
ସୂଚନା ଅନ୍ସାରେ ଚକୁଳି ପଁଚେତ୍ର ଭିନେ ଭିନେ ଗଁାରେ ପ୍ରଧାନମନ୍ତ୍ରୀ ଆବାସ ଯୋଜନାରେ ହିତାଧିକାରୀ ବଛାନିଛାରେ ଗଫଲତି ହେଇଥିବାର ବାବ୍ଦେ ତାଲିକାରୁ ବାଦ୍ ପଡ଼ିଥିବାର କେତେ ହକ୍ଦାର ହିତାଧିକାରୀ ସୋମବାର ଅତାବିରା ବିଡିଓ ପ୍ରଣବ କୁମାର ଚାନ୍ଦକଁୁ ଅଭିଯୋଗ କରିଛନ୍। ଘଟନାର ତଦଁତ୍ କରି ବାହାରିଥିବାର ତାଲିକାକେ ନାକଚ କରାଯାଉ ଆର ନୂତନ ତାଲିକା ବାହାର କରାଯାଉ ବଲି ହକ୍ଦାର ହିତାଧିକାରୀମାନେ ବିଡିଓକଁରନେ ଦାବି କରିଛନ୍। ଆଗ୍ରୁ ଆବାସ ଯୋଜନାରେ ଘଏତା ଘର ପାଇଥିଲାବେଲେ ଏହେଦେ ମାଏଝିର ନଁା ତାଲିକାରେ ବାହାରିଛେ। ଇ ଗଫଲତିକେ ଲୁକାବାର ଲାଗି ମାଏଝିର ନଁା ସଂଗେ ଘଏତାର ନଁା ନାଇଁ ଲେଖାଯାଇ ବାପର ନଁା ଲେଖା ଯାଇଛେ ବଲି କେତେ ହିତାଧିକାରୀ ଅଭିଯୋଗ କରିଛନ୍। ଏନ୍ତା କି ଗୁଟେ ପରିବାର ଏକାଧିକ୍ ଘର ପାଇଥିଲାବେଲେ ତାଲିକାରେ ଫେନ୍ ଘାଏ ସେ ପରିବାରର ଉନିଅଁା ଲୁକ୍କର ନଁା ବାହାରିଛେ। ଏନ୍ତାଥି ପଁଚେତ୍ର ନିହାତି ଗରିବ୍ ଲୋକ୍ ଆବାସ ଯୋଜନାରେ ଘର ପାଏବାରୁ ବଁଚିତ୍ ହେଉଛନ୍ ବଲି ହିତାଧିକାରୀମାନେ ଅଭିଯୋଗ କରିଛନ୍। ଚକୁଳି ପଁଚେତ୍ର ୧ ନମ୍ବର ଓ୍ବାର୍ଡର ଓ୍ବାର୍ଡ ମେମ୍ବର କବିତା ମେହେରକଁର ସଂଗେ ଅନୁପମା ମହାପାତ୍ର, ରବୀନ୍ଦ୍ର ମହାପାତ୍ର ପରମୁଖ ଆମର ଘର କେଭ୍ଠାନୁ ଭାଂଗି ଯାଇଛେ। ହେଲେ ଆମକୁ ଘର ନାଇଁ ଦିଆଯିବାର ବଲି ବିଡିଓକୁଁ ଅଭିଯୋଗ କରିଛନ୍। ଇ ବାବ୍ଦେ ଅତାବିରା ବିଡିଓ ପ୍ରଣବ କୁମାର ଚାନ୍ଦକୁଁ ପଚ୍ରାଲାରୁ ଘଟନାର ତଦଁତ୍ କରି ହକ୍ଦାର ହିତାଧିକାରୀମାନକର ନଁା ତାଲିକାରେ ସାମିଲ କରାଯିବା ବଲି ସେ କହିଛନ୍।
