ସୁନାବେଡା/ସେମିଳିଗୁଡା,୯ା୭(କୃତ୍ତିବାସ ପ୍ରଧାନ /ବାସୁଦେବ ବରାଡ଼):ସୁନାବେଡ଼ା ପୌର ପରିଷଦ ଉପାଧ୍ୟକ୍ଷା ଋତୁ କଣ୍ଟାଙ୍କ ବିରୋଧରେ ଅନାସ୍ଥା ପ୍ରସ୍ତାବ ପାଇଁ ପରିଷଦର ୧୮ କାଉନସିଲର କୋରାପୁଟ ଜିଲାପାଳଙ୍କ ନିକଟରେ ଫେରାଦ ହୋଇଛନ୍ତି। ସମସ୍ତ କାଉନସିଲରଙ୍କ ଦସ୍ତଖତ ସମ୍ବଳିତ ଏକ ଅଭିଯୋଗପତ୍ର ଜିଲାପାଳ ଭି.କୀର୍ତ୍ତି ଭାସନଙ୍କୁ ପ୍ରଦାନ କରାଯାଇଛି। ଉପାଧ୍ୟକ୍ଷା କାଉନସିଲରମାନଙ୍କୁ କାର୍ଯ୍ୟାଳୟରେ ଦୁର୍ବ୍ୟବହାର କରିବା ସହ ଅପଦସ୍ଥ କରୁଛନ୍ତି। ପରିଷଦର ବହୁ କାଉନସିଲରଙ୍କ ସହ ତାଙ୍କର ଝଗଡ଼ା ହେଉଛି। ୨ ମାସ ତଳେ ତାଙ୍କ ସ୍ବାମୀ ଏବଂ ବାପା ମିଶି ଜଣେ କାଉନସିଲରଙ୍କୁ ଜୀବନରେ ମାରିଦେବାର ଧମକ ଦେଇ ମରଣାନ୍ତକ ଆକ୍ରମଣ କରିଥିଲେ। ଏନେଇ କୋର୍ଟରେ ମାମଲା ଚାଲୁ ରହିଛି। ପରିଷଦର ଅଧିକାରୀ ଏବଂ କର୍ମଚାରୀଙ୍କୁ ଖରାପ ବ୍ୟବହାର ଯୋଗୁ ସମସ୍ତେ ନିଜକୁ ଅସୁରକ୍ଷିତ ମନେ କରୁଛନ୍ତି ବୋଲି ଅଭିଯୋଗପତ୍ରରେ ଉଲ୍ଲେଖ ରହିଛି। ଉପାଧ୍ୟକ୍ଷା କୌଣସି ଉନ୍ନତିମୂଳକ କାର୍ଯ୍ୟରେ ସହଯୋଗ କରିବା ବଦଳରେ ବାଧା ସୃଷ୍ଟି କରି ସ୍ବାର୍ଥ ହାସଲ ପାଇଁ ନିଜ ପଦବୀର ଦୁରୁପଯୋଗ କରୁଥିବା ଭଳି ଅଭିଯୋଗ କାଉନସିଲରମାନେ ଆଣିଛନ୍ତି। ଏହି କାରଣରୁ ଉପାଧ୍ୟକ୍ଷା ପଦବୀର ପରିବର୍ତ୍ତନ ନିମନ୍ତେ ଅନାସ୍ଥା ପ୍ରସ୍ତାବକୁ ଅନୁମତି ପାଇଁ ଜିଲାପାଳଙ୍କୁ ନିବେଦନ କରିଛନ୍ତି । ଏ ସମ୍ପର୍କରେ ଉପାଧ୍ୟକ୍ଷା କଣ୍ଟାଙ୍କୁ ପଚାରିବାରୁ ସେ କହିଛନ୍ତି, ଅଭିଯୋଗ ସମ୍ପର୍କରେ ସେ କିଛି ଜାଣିନାହାନ୍ତି। ତେବେ ତାଙ୍କ ବିରୋଧରେ ହୋଇଥିବା ଅଭିଯୋଗ ଭିତ୍ତିହୀନ ବୋଲି ସେ ପ୍ରକାଶ କରିଛନ୍ତି।
