ନ୍ୟୁୟର୍କ, ୧୯ା୪: ୟୁକ୍ରେନ୍-ରୁଷିଆ ଯୁଦ୍ଧର ପରିଣାମ କେବଳ ଏହି ଦୁଇଦେଶ ନୁହେଁ ବରଂ ସାରା ବିଶ୍ୱ ଭୋଗିବ। ଏଥିଯୋଗୁ ଦୁନିଆର ଏକ ପଞ୍ଚମାଂଶ ବା ୧୭୦ କୋଟି ଲୋକେ ଦାରିଦ୍ର୍ୟତା ଓ କ୍ଷୁଧାର ଶିକାର ହେବେ ବୋଲି ଜାତିସଂଘ ମହାସଚିବ ଆଣ୍ଟୋନିଓ ଗୁଟେରସ୍ ଚେତାଇ ଦେଇଛନ୍ତି। ଦଶନ୍ଧି ପୂର୍ବରୁ ଏତେ ମାତ୍ରାରେ ଲୋକେ ଏଭଳି ସଙ୍କଟରେ ପଡ଼ି ନ ଥିବାବେଳେ ତାହା ଏବେ ଘଟିବାକୁ ଯାଉଥିବା ନେଇ ସେ ଉଦ୍ବେଗ ପ୍ରକାଶ କରିଛନ୍ତି। ରୁଷିଆ ଏବଂ ୟୁକ୍ରେନ୍ ବିଶ୍ୱର ୩୦ ପ୍ରତିଶତ ଗହମ ଓ ବାର୍ଲି, ଏକ ପଞ୍ଚମାଂଶ ମକା, ଅଧାରୁ ଅଧିକ ସୂର୍ଯ୍ୟମୁଖୀ ତେଲ ଚାହିଦା ପୂରଣ କରିଥାନ୍ତି। ସବୁଠାରୁ କମ୍ ବିକଶିତ ୪୫ ଦେଶକୁ ରୁଷିଆ ଓ ୟୁକ୍ରେନ୍ ଗହମ ଯୋଗାଇଥାନ୍ତି। ଯୁଦ୍ଧ ଯୋଗୁ ଯୋଗାଣ ଶୃଙ୍ଖଳ ବାଧାପ୍ରାପ୍ତ ହୋଇଛି। ଫଳରେ ଏହି ଦୁଇ ଦେଶ ଉପରେ ନିର୍ଭରଶୀଳ ରାଷ୍ଟ୍ରଗୁଡ଼ିକରେ ବ୍ୟାପକ ଖାଦ୍ୟାଭାବ ଦେଖାଦେବ ବୋଲି ଗୁଟେରସ୍ କହିଛନ୍ତି।
ସଙ୍କଟ ଯୋଗୁ ଶସ୍ୟ ରପ୍ତାନି ବାଧାପ୍ରାପ୍ତ ହୋଇଥିବାରୁ ବିଶ୍ୱ ବଜାରରେ ଖାଦ୍ୟ ଦରଦାମ ଆକାଶଛୁଆଁ ହୋଇଛି। ୨୦୨୨ ଆରମ୍ଭରୁ ଗହମ ଏବଂ ମକା ଦର ୩୦ ପ୍ରତିଶତ ବଢ଼ିଛି। ବ୍ରେଣ୍ଟ କ୍ରୁଡ୍ ଅଏଲ ୬୦ ପ୍ରତିଶତରୁ ଅଧିକ ବଢ଼ିଛି। ଗ୍ୟାସ୍, ସାର ଆଦିର ମୂଲ୍ୟ ପ୍ରାୟ ଦ୍ୱିଗୁଣିତ ହୋଇଥିବା ଜାତିସଂଘ ମହାସଚିବ କହିଛନ୍ତି। ଏଥିସହ ଧନୀକୁ ଅଧିକ ଧନୀ ଏବଂ ଗରିବକୁ ଅଧିକ ଗରିବ କରୁଥିବା ବିଶ୍ୱ ଆର୍ଥତ୍କ ବ୍ୟବସ୍ଥାରେ ସଂସ୍କାର ଆଣିବାକୁ ସେ ଆହ୍ବାନ ଦେଇଛନ୍ତି। ଇଣ୍ଟରନ୍ୟାଶନାଲ ମନିଟାରୀ ଫଣ୍ଡ (ଆଇଏମ୍ଏଫ୍) ପରିଚାଳନା ନିର୍ଦ୍ଦେଶକ କ୍ରିଷ୍ଟାଲିନା ଜର୍ଜିଏଭାଙ୍କ ମତରେ, ୟୁକ୍ରେନ୍ ଯୁଦ୍ଧ ଚଳିତ ବର୍ଷ ୧୪୩ ଦେଶର ଅଭିବୃଦ୍ଧି ହାର ପୂର୍ବାନୁମାନଠାରୁ ହ୍ରାସ ପାଇବ। ଏହି ଦେଶଗୁଡ଼ିକର ଜିଡିପି ବିଶ୍ୱ ଜିଡିପିର ୮୬ ପ୍ରତିଶତ। କରୋନା ମହାମାରୀ ଭିତରେ ୟୁକ୍ରେନ୍ ସଙ୍କଟ ଯୋଗୁ ସୃଷ୍ଟ ସଙ୍କଟ ମଧ୍ୟରେ ଖାଦ୍ୟ ନିରାପତ୍ତା ସୁନିଶ୍ଚିତ କରିବା ନିମନ୍ତେ ସମନ୍ବିତ ପଦକ୍ଷେପ ଜରୁରୀ ବୋଲି ବୁଧବାର ଆଇଏମ୍ଏଫ୍, ବିଶ୍ୱ ବ୍ୟାଙ୍କ, ଓ୍ବାଲର୍ଡ ଫୁଡ୍ ପ୍ରୋଗ୍ରାମ (ଡବ୍ଲ୍ୟୁଏଫ୍ପି), ଓ୍ବାଲର୍ଡ ଟ୍ରେଡ୍ ଅର୍ଗାନାଇଜେଶନ (ଡବ୍ଲ୍ୟୁଟିଓ) ମୁଖ୍ୟ ଏକ ମିଳିତ ବିବୃତିରେ ଆହ୍ବାନ ଦେଇଥିଲେ।
