ନୂଆଦିଲ୍ଲୀ,୨୧।୮: କେନ୍ଦ୍ର ସରକାରଙ୍କ ପକ୍ଷରୁ ଆରମ୍ଭ ହୋଇଥିବା ଗରିବ କଲ୍ୟାଣ ରୋଜଗାର ଅଭିଯାନ(ଜିକେଆର୍ଏ)ରେ ବର୍ତ୍ତମାନ ସୁଦ୍ଧା ୧୬,୭୮୬ କୋଟି ଟଙ୍କାର ପୁଞ୍ଜି ବିନିଯୋଗ ହୋଇଛି। ଘରକୁ ଫେରିଥିବା ପ୍ରବାସୀ ଶ୍ରମିକଙ୍କୁ ରୋଜଗାର ଯୋଗାଇ ଦେବା ଲାଗି ୬ ରାଜ୍ୟରେ ଏହି ଯୋଜନାକୁ ଆରମ୍ଭ କରାଯାଇଥିଲା। ଏହି ରାଜ୍ୟଗୁଡିକ ମଧ୍ୟରେ ଓଡ଼ିଶା, ରାଜସ୍ଥାନ, ବିହାର, ଝାଡ଼ଖଣ୍ଡ,ମଧ୍ୟପ୍ରଦେଶ ଏବଂ ଉତ୍ତରପ୍ରଦେଶ ରହିଛି। ଏହି ରାଜ୍ୟଗୁଡିକର ୧୧୬ ଜିଲାରେ ପ୍ରବାସୀଙ୍କୁ ଜୀବିକା ପ୍ରଦାନ ଲାଗି ଏଭଳି ଅଭିଯାନ ଉପରେ ଫୋକସ୍ କରାଯାଇଥିଲା। ଯୋଜନା ଆରମ୍ଭ ହେବାର ୭ ସପ୍ତାହ ସୁଦ୍ଧା ୨୧ କୋଟି ମ୍ୟାନ୍ଡେଜ୍(ମାନବ ଦିବସ) ନିଯୁକ୍ତି ସୃଷ୍ଟି କରାଯାଇଛି।
ବର୍ତ୍ତମାନ ସୁଦ୍ଧା ୧୬,୭୮୬ କୋଟି ବିନିଯୋଗ ଦ୍ୱାରା ୭୭,୯୯୪ ଜଳ ସଂରକ୍ଷଣ ଷ୍ଟ୍ରକଚର, ୨.୩୩ ଲକ୍ଷ ଗ୍ରାମୀଣ ବାସଗୃହ, ୧୭,୯୩୩ ଗୁହାଳ,୧୧,୩୭୨ ଗ୍ରାମୀଣ ପୋଖରୀ, ୩୫୫୨ ଗୋଷ୍ଠୀ ସ୍ବଚ୍ଛତା କମ୍ପ୍ଲେକ୍ସ ନିର୍ମାଣ କରାଯାଇଛି। ଜିଲା ଖଣିଜ ପାଣ୍ଠି ଦ୍ୱାରା ୬,୩୦୦ ଲୋକଙ୍କୁ ନିଯୁକ୍ତି ଯୋଗାଣ ଲାଗି ବ୍ୟବସ୍ଥା କରାଯାଇଛି। ୭୬୪ ଗ୍ରାମପଞ୍ଚାୟତକୁ ଇଣ୍ଟରନେଟ ସୁବିଧା କରାଯାଇଛି। ଏହାବାଦ ୨୫,୪୯୭ ବ୍ୟକ୍ତି ବିଶେଷଙ୍କୁ କୃଷିବିଜ୍ଞାନ କେନ୍ଦ୍ରଗୁଡିକରେ ତାଲିମ ପ୍ରଦାନ କରାଯାଇଛି। ସରକାରଙ୍କ ୧୨ ମନ୍ତ୍ରଣାଳୟ ଏବଂ ବିଭାଗର ସମନ୍ବୟରେ ଏହି ଯୋଜନାକୁ କାର୍ଯ୍ୟକାରୀ କରାଯାଉଛି। କରୋନା ସମୟରେ ଘରକୁ ଫେରିଥିବା ପ୍ରବାସୀଙ୍କୁ କାମ ଯୋଗାଇଦେବା ଲାଗି ସରକାରଙ୍କ ପକ୍ଷରୁ ଏଭଳି ପଦକ୍ଷେପ ହାତକୁ ନିଆଯାଉଥିବା ସୂଚନା ରହିଛି।
