ନୂଆଦିଲ୍ଲୀ,୨୭ା୮ (ପି.ଟି.): ଜାତୀୟ ରାଜନୈତିକ ଦଳଗୁଡ଼ିକ ୨୦୦୪-୦୫ରୁ ୨୦୨୦-୨୧ ଆର୍ଥତ୍କ ବର୍ଷ ମଧ୍ୟରେ ଅଜଣା ସୂତ୍ରରୁ ୧୫,୦୭୭.୯୭ କୋଟିରୁ ଊର୍ଦ୍ଧ୍ୱ ଟଙ୍କା ସଂଗ୍ରହ କରିଛନ୍ତି। ଆସୋସିଏଶନ ଫର୍ ଡେମୋକ୍ରାଟିକ୍ ରିଫମର୍ସ (ଏଡିଆର୍) ପକ୍ଷରୁ ପ୍ରକାଶିତ ରିପୋର୍ଟରେ ଏହା କୁହାଯାଇଛି। କେବଳ ୨୦୨୦-୨୧ ବର୍ଷରେ ଜାତୀୟ ଏବଂ ଆଞ୍ଚଳିକ ରାଜନୈତିକ ଦଳଗୁଡ଼ିକର ଅଜଣା ସୂତ୍ରରୁ ମୋଟ ଆୟ ପରିମାଣ ୬୯୦.୬୭ କୋଟି ଟଙ୍କା ବୋଲି ଉକ୍ତ ରିପୋର୍ଟରୁ ଜଣାପଡ଼ିଛି। ୮ଟି ଜାତୀୟ ଏବଂ ୨୭ ଆଞ୍ଚଳିକ ଦଳର ଆୟ ଉପରେ ଏଡିଆର୍ ଏହି ବିଶ୍ଲେଷଣ କରିଥିଲା। ଜାତୀୟ ଦଳ ମଧ୍ୟରେ ଅଛନ୍ତି ଭାଜପା, କଂଗ୍ରେସ, ତୃଣମୂଳ କଂଗ୍ରେସ, ସିପିଆଇ(ଏମ୍), ଏନ୍ସିପି, ବିଏସ୍ପି, ସିପିଆଇ ଏବଂ ନ୍ୟାଶନାଲ ପିପୁଲ୍ସ ପାର୍ଟି। ଦଳଗୁଡ଼ିକର ଆୟକର ରିଟର୍ନ ଏବଂ ନିର୍ବାଚନ କମିଶନଙ୍କ ନିକଟରେ ସେମାନେ ଦାଖଲ କରିଥିବା ଚାନ୍ଦା ବିବରଣୀକୁ ଅନୁଧ୍ୟାନ କରାଯାଇଥିଲା। ୨୦୨୦-୨୧ ଆର୍ଥତ୍କ ବର୍ଷରେ ୮ ଜାତୀୟ ରାଜନୈତିକ ଦଳଙ୍କୁ ଅଜଣା ସୂତ୍ରରୁ ୪୨୬.୭୪ କୋଟି ମିଳିଥିବାବେଳେ ଆଞ୍ଚଳିକ ଦଳଗୁଡ଼ିକ ଏହି ସୂତ୍ରରୁ ୨୬୩.୯୨୮ କୋଟି ଟଙ୍କା ପାଇଛନ୍ତି। ଉକ୍ତ ବର୍ଷରେ କଂଗ୍ରେସ ଅଜଣା ସୂତ୍ରରୁ ୧୭୮.୭୮୨ କୋଟି ଟଙ୍କା ପାଇଥିବାବେଳେ ଭାଜପା ୧୦୦.୫୦୨ କୋଟି ଟଙ୍କା ପାଇଛି। ଅଜଣା ସୂତ୍ରରୁ ସର୍ବାଧିକ ଚାନ୍ଦା ପାଇଥିବା ଆଞ୍ଚଳିକ ଦଳ ମଧ୍ୟରେ ଅଛନ୍ତି ଓ୍ବାଇଏସ୍ଆର୍ କଂଗ୍ରେସ, ଡିଏମ୍କେ, ବିଜେଡି, ଏମ୍ଏନ୍ଏସ୍ ଏବଂ ଏଏପି। ଓ୍ବାଇଏସ୍ଆର୍ କଂଗ୍ରେସକୁ ୯୬.୨୫୦୭ କୋଟି ମିଳିଥିବାବେଳେ ଡିଏମ୍କେକୁ ୮୦.୦୨ କୋଟି, ବିଜେଡିକୁ ୬୭ କୋଟି, ଏମ୍ଏନ୍ଏସ୍କୁ ୫.୭୭୩ କୋଟି ଏବଂ ଆମ୍ ଆଦ୍ମୀ ପାର୍ଟିକୁ ୫.୪ କୋଟି ଟଙ୍କା ମିଳିଛି। ଆଞ୍ଚଳିକ ଦଳଗୁଡ଼ିକର ମୋଟ ଆୟର ୪୭.୦୬ ପ୍ରତିଶତ ଇଲେକ୍ଟୋରାଲ ବଣ୍ଡ୍ରୁ ଆସିଛି। ୨୦୦୪-୦୫ରୁ ୨୦୨୦-୨୧ ମଧ୍ୟରେ କଂଗ୍ରେସ ଏବଂ ଏନ୍ସିପି କୁପନ ବିକ୍ରିରୁ ୪,୨୬୧.୮୩ କୋଟି ଟଙ୍କା ପାଇଛନ୍ତି।
