ଭୁବନେଶ୍ୱର, ୨।୨ (କ୍ରୀଡ଼ା ପ୍ରତିନିଧି): ଭାରତୀୟ କ୍ରୀଡ଼ା ପ୍ରାଧିକରଣ (ସାଇ), ଜୁଡୋ ଫେଡେରେଶନ ଅଫ୍ ଇଣ୍ଡିଆ ଓ ପଶ୍ଚିମବଙ୍ଗ ଜୁଡୋ ଆସୋସିଏଶନର ମିଳିତ ଆନୁକୂଲ୍ୟରେ କଲିକତାର ସାଇ ଆଇଟିସି ହଲ୍ରେ ଗତ ୨୭ରୁ ୩୧ ପର୍ଯ୍ୟନ୍ତ ପୂର୍ବାଞ୍ଚଳ ଖେଲୋ ଇଣ୍ଡିଆ ମହିଳା ଲିଗ୍/ର଼୍ୟାଙ୍କିଙ୍ଗ୍ ଜୁଡୋ ପ୍ରତିଯୋଗିତା ଅନୁଷ୍ଠିତ ହୋଇଯାଇଛି। ଏଥିରେ ଓଡ଼ିଶାରୁ ମୋଟ ୩୩ ଜୁଡୋକା ଏବଂ ୪ ଅଫିସିଆଲ ଅଂଶଗ୍ରହଣ କରିଥିବାବେଳେ ବିଭିନ୍ନ ବର୍ଗରେ ୧୫ଟି ପଦକ ମିଳିଛି। ସବ୍ଜୁନିୟର ବର୍ଗରେ ଡଲି ହୋ’ ରୌପ୍ୟ, ଅଞ୍ଜଳି ମାଝି, ଅନନ୍ୟା ବେହେରା ଓ ସରିତା ମଲିକ ବ୍ରୋଞ୍ଜ, କ୍ୟାଡେଟ୍ ବର୍ଗରେ ଜି.ବଂଶିକା ସ୍ବର୍ଣ୍ଣ, ନମ୍ରତା ଦର୍ଜି ରୌପ୍ୟ ଏବଂ ସୋନିଆ ଗମାଙ୍ଗୋ, ରାଇମଣି ସୋରେନ, ଡୁଲି ମୁର୍ମୁ ବ୍ରୋଞ୍ଜ ପଦକ ଜିତିଛନ୍ତି। ସେହିପରି ଜୁନିୟର ବର୍ଗରେ ଜି. ବଂଶିକା ରୌପ୍ୟ, ସିନିୟର ବର୍ଗରେ ଅଞ୍ଜଳି ସାହୁ ଓ ସୁଚେତା ମୁଣ୍ଡା ରୌପ୍ୟ ଏବଂ ଅଶ୍ରହିଲ କିସପଟା, ଡୁଲି ମୁର୍ମୁ, ପୁନୁଗି ମୁର୍ମୁ ବ୍ରୋଞ୍ଜ ପଦକ ହାସଲ କରିଛନ୍ତି। ଦଳ ସହିତ କୋଚ୍ ଭାବେ ବିଶ୍ୱଜିତ ମାହାରି, ଲୋପାମୁଦ୍ରା ପତି ଓ ମ୍ୟାନେଜର ଭାବେ ଦେବେନ ଜାନି, ଅଫିସିଆଲ ଭାବେ କନ୍ଦନ ମୁର୍ମୁ କଲିକତା ଯାତ୍ରା କରିଥିଲେ। ପଦକ ବିଜେତା ପ୍ରତିଯୋଗୀମାନେ ଖେଲୋ ଇଣ୍ଡିଆ ଜାତୀୟ ଜୁଡୋ ଟୁର୍ନାମେଣ୍ଟ ପାଇଁ ମନୋନୀତ ହୋଇଛନ୍ତି। କୃତୀ ଜୁଡୋକାଙ୍କୁ ଓଡ଼ିଶା ରାଜ୍ୟ ଜୁଡୋ ସଂଘ ମୁଖ୍ୟ କାର୍ଯ୍ୟନିର୍ବାହୀ ଗୀତାଞ୍ଜଳି ପଣ୍ଡା, ସାଧାରଣ ସମ୍ପାଦକ ପୂର୍ଣ୍ଣ ଚନ୍ଦ୍ର ମିଶ୍ର ଓ ବୈଷୟିକ ସମ୍ପାଦକ କନ୍ଦନ ମୁର୍ମୁ ଅଭିନନ୍ଦନ ଜଣାଇଛନ୍ତି।
