ନୂଆଦିଲ୍ଲୀ,୧୨।୪: ବିଗତ ୭ ଦିନ (୭ କାର୍ଯ୍ୟ ଦିବସ) ମଧ୍ୟରେ ଶେୟାର ବଜାରର ନିବେଶକମାନେ ପ୍ରାୟ ୧୩ ଲକ୍ଷ କୋଟି ଟଙ୍କା (୧୨,୫୬,୫୧୦.୫୯ ଟଙ୍କା)ର ନିବେଶ ବଢ଼ାଇ ପାରିଛନ୍ତି। ବିଶେଷକରି କ୍ରମାଗତ ଭାବେ ଭାରତୀୟ ଶେୟାର ବଜାରର କାରବାର ବୃଦ୍ଧି ସାଙ୍ଗକୁ ବ୍ୟାଙ୍କିଙ୍ଗ୍ ଏବଂ ଅଟୋ ଶେୟାରର ଡିମାଣ୍ଡ ଏବଂ ଗ୍ଲୋବାଲ ଟ୍ରେଣ୍ଡ ଯୋଗୁ ଏଭଳି ଅଭିବୃଦ୍ଧି ଦେଖିବାକୁ ମିଳିଥିଲା ବେଳେ ମାର୍ଚ୍ଚ ମାସରେ କମ୍ପାନୀଗୁଡ଼ିକର ଆୟ ଭଲ ରହିବା ଯୋଗୁ ଘରୋଇ ପୁଞ୍ଜିବଜାରରେ ଉତ୍ସାହ ପରିଲକ୍ଷିତ ହୋଇଛି। ଅପରପକ୍ଷରେ ମଙ୍ଗଳବାର ଶେୟାର ବଜାର କାରବାର ବୃଦ୍ଧି ଘଟିଛି। ଏପରିକି ବମ୍ବେ ଷ୍ଟକ୍ ଏକ୍ସଚେଞ୍ଜ (ବିଏସ୍ଇ)ର ୩୦ଶେୟାର ବିଶିଷ୍ଟ ସେନ୍ସେକ୍ସ ୩୧୧.୨୧ ପଏଣ୍ଟ ବୃଦ୍ଧି ଘଟି ୬୦,୧୫୭.୭୨ ଅଙ୍କରେ କାରବାର ବନ୍ଦ କରିଥିଲା। ସେହିଭଳି ନ୍ୟାଶନାଲ ଷ୍ଟକ୍ ଏକ୍ସଚେଞ୍ଜ (ଏନ୍ଏସ୍ଇ)ର ୫୦ ଶେୟାର ବିଶିଷ୍ଟ ନିଫ୍ଟି ୯୮.୨୫ ପଏଣ୍ଟ ବଢ଼ି ୧୭,୭୨୨.୩୦ ଅଙ୍କରେ କାରବାର ବନ୍ଦ ହୋଇଥିଲା। ଅପରପକ୍ଷରେ ବ୍ରଡ୍ ମାର୍କେଟରେ ବିଏସ୍ଇର ମିଡ୍କ୍ୟାପ୍ ଏବଂ ସ୍ମଲ୍କ୍ୟାପ୍ ସୂଚକାଙ୍କ ଯଥାକ୍ରମେ ୦.୭୮% ଏବଂ ୦.୪୦ % ବୃଦ୍ଧି ସହ କାରବାର ବନ୍ଦ ହୋଇଛି। ଏହି ବୃଦ୍ଧି ଯୋଗୁ ଘରୋଇ ପୁଞ୍ଜି ବଜାର ନିବେଶକଙ୍କ ସମ୍ପତ୍ତି ଦିନକ ମଧ୍ୟରେ ପ୍ରାୟ ୧.୩୮ ଲକ୍ଷ କୋଟି ଟଙ୍କା ବଢ଼ିଛି। ବିଶେଷକରି ବିଏସ୍ଇରେ ସୂଚୀବଦ୍ଧ କମ୍ପାନୀଗୁଡ଼ିକର ମୋଟ ବଜାର ପୁଞ୍ଜି ମଙ୍ଗଳବାର ୨,୬୪, ୫୧, ୦୬୯.୯୩ ଲକ୍ଷ କୋଟି ଟଙ୍କାରେ ପହଞ୍ଚତ୍ଛି। ଏପରିକି ସୋମବାର ଏହାର ପରିମାଣ ପ୍ରାୟ ୨,୬୩.୧୩ ଲକ୍ଷ କୋଟି ଟଙ୍କା ଥିଲା। ଉଲ୍ଲେଖଯୋଗ୍ୟ, ମଙ୍ଗଳବାର ବଜାର କାରବାରରେ ସବୁଠୁ ଅଧିକ କାରବାର ବ୍ୟାଙ୍କିଙ୍ଗ୍, ମେଟାଲ, ଅଟୋ, ଅଏଲ ଆଣ୍ଡ ଗ୍ୟାସ୍, ପାୱାର ଏବଂ ଫାଇନାନ୍ସିଆଲ ଶେୟାର ଆଦିରେ ଦେଖିବାକୁ ମିଳିଛି। ଅପରପକ୍ଷରେ ଆଇଟି ଏବଂ ଟେକ୍ ଭଳି ଶେୟାରଗୁଡ଼ିକରେ ହ୍ରାସ ଦେଖିବାକୁ ମିଳିଥିଲା। ସୂଚନାଯୋଗ୍ୟ, ଲଗାତର ସପ୍ତମ ଦିନର କାରବାର ବୃଦ୍ଧି ସହ ଶେୟାର ବଜାର ପ୍ରାୟ ୧ ମାସ ପରେ ପୁଣି ଥରେ ୬୦,୦୦୦ ଅଙ୍କ ପାରକରିଛି। ଅପରପକ୍ଷରେ ନିଫ୍ଟିରେ ମଧ୍ୟ ପ୍ରାୟ ୧୮,୦୦୦ (୧୭,୭୨୨.୩୦) ଅଙ୍କରେ ବଜାର ବନ୍ଦ ହୋଇଛି। ଏପରିକି ବିଗତ ୭ ଦିନ ମଧ୍ୟରେ ସେନ୍ସେକ୍ସ ପ୍ରାୟ ୨୫୪୪ ପଏଣ୍ଟ ବୃଦ୍ଧି ଘଟିଛି।
