କଟକ,୧୪।୭ (କାର୍ତ୍ତିକ ସାହୁ): ଓଡ଼ିଶା ହାଇକୋର୍ଟ ଚଳିତ ବର୍ଷର ପ୍ରଥମାର୍ଦ୍ଧ ଜାନୁୟାରୀରୁ ଜୁନ୍ ପର୍ଯ୍ୟନ୍ତ ମାମଲାଗୁଡ଼ିକର ବିଚାର ଓ ଫଇସଲାରେ ରେକର୍ଡ ସଂଖ୍ୟକ ଫଳ ପ୍ରଦର୍ଶନ କରିଛି। ୨୦୨୧ ଓ ୨୦୨୨ ବର୍ଷ ତୁଳନାରେ ୨୦୨୩ରେ ଅଦ୍ୟାବଧି ବିଚାର ବିଭାଗରେ ଯଥେଷ୍ଟ ଉନ୍ନତି ସାଧିତ ହୋଇଥିବା ଜଣାପଡ଼ିଛି। ହାଇକୋର୍ଟ ପକ୍ଷରୁ ଗ୍ରହଣ କରାଯାଇଥିବା ଇ-କୋର୍ଟ, ଇ-ଫାଇଲିଂ ଆଦି ବ୍ୟବସ୍ଥା ଦ୍ୱାରା ଉଭୟ ହାଇକୋର୍ଟ ଓ ଜିଲା କୋର୍ଟଗୁଡ଼ିକରେ ବିଚାର ପ୍ରକ୍ରିୟା ତ୍ୱରାନ୍ବିତ ହେବା ସହ ମାମଲା ଫଇସଲା ହାର ବୃଦ୍ଧି ପାଇ ପଡ଼ିରହିଥିବା ମାମଲା ସଂଖ୍ୟା ବହୁ ଭାବେ ହ୍ରାସ ପାଇଥିବା ହାଇକୋର୍ଟ ପକ୍ଷରୁ ପ୍ରଦତ୍ତ ପ୍ରେସ୍ ଇସ୍ତାହାରରୁ ଜଣାଯାଇଛି।
୨୦୨୩ର ପ୍ରଥମାର୍ଦ୍ଧରେ ୧୩୬୮ଟି ରାୟ ପ୍ରକାଶ ପାଇଥିବା ବେଳେ ୨୦୨୧ରେ ୩୪୧ ଓ ୨୦୨୨ରେ ୯୮୨ଟି ରାୟ ପ୍ରକାଶ ପାଇଥିଲା। ୨୦୨୧ରେ ୪୨,୨୭୮ଟି ମାମଲା ପଞ୍ଜୀକରଣ ହୋଇଥିବା ବେଳେ ୩୯,୨୫୯ଟି ଫଇସଲା ହୋଇଥିଲା। ସେହିପରି ୨୦୨୨ରେ ୫୩,୧୫୫ଟି ମାମଲା ପଞ୍ଜୀକରଣ ହୋଇଥିବା ବେଳେ ୫୯,୮୫୦ଟି ମାମଲା ଫଇସଲା ହୋଇଥିଲା। ହେଲେ ୨୦୨୩ ଜୁନ୍ ଯାଏ ୪୯,୬୩୫ ମାମଲା ପଞ୍ଜୀକୃତ ହୋଇଥିବା ବେଳେ ୬୨,୮୬୯ଟି ମାମଲା ଫଇସଲା ହୋଇଛି। ଫଳରେ ମାମଲା ଫଇସଲା ହାର ୨୦୨୧ରେ ୯୨.୮୫%, ୨୦୨୨ରେ ୧୧୨.୫୯% ହୋଇଥିବା ବେଳେ ୨୦୨୩ ପ୍ରଥମାର୍ଦ୍ଧରେ ୧୨୬.୬୬% ହୋଇଛି। ମାମଲା ଫଇସଲା ହାର ବୃଦ୍ଧି ପାଇବା କାରଣରୁ ବିଚାର ନହୋଇ ପଡ଼ିରହିଥିବା ମାମଲା ସଂଖ୍ୟା ବହୁ ଭାବେ ହ୍ରାସ ପାଇଛି। ୨୦୨୨ ଜୁନ୍ରେ ପଡ଼ିରହିଥିବା ମାମଲା ସଂଖ୍ୟା ୧,୮୯,୮୪୭ ଥିବା ବେଳେ ୨୦୨୩ ଜୁନ୍ ୩୦ରେ ଏହି ସଂଖ୍ୟା ୧,୪୬,୫୮୨ ହୋଇଛି। ହାଇକୋର୍ଟ ପକ୍ଷରୁ ନିଆଯାଇଥିବା ଇ-ପଦକ୍ଷେପଗୁଡ଼ିକ ଯୋଗୁ ଏସବୁ ସମ୍ଭବ ହୋଇପାରିଛି। କୋର୍ଟର କାର୍ଯ୍ୟ ଦିବସ ନଷ୍ଟ ନହୋଇ ବିଚାର ପ୍ରକ୍ରିୟା ତ୍ୱରାନ୍ବିତ ହୋଇଛି।
ସେହିପରି ଜିଲାର କୋର୍ଟଗୁଡ଼ିକରେ ମଧ୍ୟ ମାମଲା ଫଇସଲାର ହାର ବୃଦ୍ଧି ପାଇଛି। ୨୦୨୧ରେ ୧,୮୯,୩୧୫ ମାମଲା ପଞ୍ଜୀକରଣ ହୋଇଥିବା ବେଳେ ୯୦,୨୩୮ ମାମଲା ଫଇସଲା ହୋଇଥିଲା। ୨୦୨୨ରେ ୨,୩୫,୬୨୦ ମାମଲା ପଞ୍ଜୀକରଣ ହୋଇଥିବାବେଳେ ୧,୫୫,୭୧୨ ମାମଲା ଫଇସଲା ହୋଇଥିଲା। ହେଲେ ୨୦୨୩ ଜୁନ୍ ବେଳକୁ ୨,୩୨,୩୬୩ ମାମଲା ପଞ୍ଜୀକରଣ ହୋଇଥିବା ବେଳେ ୨,୦୨,୨୧୦ ମାମଲା ଫଇସଲା ହୋଇଥିବା ଜଣାଯାଇଛି। ସେହିପରି ଜିଲାର କୋର୍ଟଗୁଡ଼ିକରେ ୨୦୨୧ରେ ୩୬,୪୦୩ଟି, ୨୦୨୨ରେ ୬୦,୬୩୨ଟି ରାୟ ପ୍ରଦାନ ହୋଇଥିବା ବେଳେ ୨୦୨୩ ଜୁନ୍ ସୁଦ୍ଧା ୭୧,୩୬୮ଟି ମାମଲାର ରାୟ ପ୍ରକାଶ ପାଇଛି। ଏଥିସହ ବିଚାର ନ ହୋଇ ପଡ଼ିରହିଥିବା ମାମଲା ସଂଖ୍ୟା ୨୦୨୨ ଜୁନ୍ରେ ୧୮,୬୮,୮୯୭ ଥିବା ବେଳେ ୨୦୨୩ ଜୁନ୍ରେ ଏହା ୧୮,୫୬,୨୫୩କୁ ହ୍ରାସ ପାଇଛି। ସେହିପରି ବିଭିନ୍ନ କାରଣରୁ କାର୍ଯ୍ୟ ଦିବସ ନଷ୍ଟ ୨୦୨୧ ଓ ୨୦୨୨ ତୁଳନାରେ ୨୦୨୩ରେ ନଗଣ୍ୟ ହୋଇଛି।
