ନୂଆଦିଲ୍ଲୀ,୨୪ା୫:ଚଳିତ ଲୋକ ସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଥିବା ୧୨୧ ପ୍ରାର୍ଥୀ ସେମାନଙ୍କ ସତ୍ୟପାଠରେ ନିଜକୁ ନିରକ୍ଷର ଘୋଷଣା କରିଛନ୍ତି। ୩୫୯ ପ୍ରାର୍ଥୀ ମାତ୍ର ୫ମ ଶ୍ରେଣୀ ପର୍ଯ୍ୟନ୍ତ ପଢ଼ିଥିବା ନାମାଙ୍କନପତ୍ର ଦାଖଲ ବେଳେ ଦେଇଥିବା ସତ୍ୟପାଠରୁ ଜଣାପଡ଼ିଛି। ୬୪୭ ପ୍ରାର୍ଥୀ ୮ମ ଶ୍ରେଣୀ ପର୍ଯ୍ୟନ୍ତ ପଢ଼ିଥିବାବେଳେ ୧,୩୦୩ ପ୍ରାର୍ଥୀ ଦ୍ୱାଦଶ ଶ୍ରେଣୀ ପରୀକ୍ଷା ପାସ୍ କରିଛନ୍ତି ଓ ୧,୫୦୨ ଜଣ ସ୍ନାତକ ଡିଗ୍ରୀ ହାସଲ କରିଛନ୍ତି। ସେହିପରି ୧୯୮ ପ୍ରାର୍ଥୀ ଡକ୍ଟରେଟ୍ କରିଥିବା ଜଣାପଡ଼ିଛି। ଚଳିତ ନିର୍ବାଚନରେ ମୋଟ ୮,୩୬୦ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଥିବାବେଳେ ଆସୋସିଏଶନ ଫର୍ ଡେମୋକ୍ରାଟିକ୍ ରିଫମର୍ସ (ଏଡିଆର୍) ସେମାନଙ୍କ ମଧ୍ୟରୁ ୮,୩୩୭ ପ୍ରାର୍ଥୀଙ୍କ ଶିକ୍ଷାଗତ ଯୋଗ୍ୟତାର ଅନୁଶୀଳନ କରିଥିଲା।
ପ୍ରଥମ ପର୍ଯ୍ୟାୟରେ ନିର୍ବାଚନ ଲଢ଼ିଥିବା ୧,୬୨୫ ପ୍ରାର୍ଥୀଙ୍କ ମଧ୍ୟରୁ ୬୩୯ ଜଣଙ୍କ ଶିକ୍ଷାଗତ ଯୋଗ୍ୟତା ୫ମରୁ ଦ୍ୱାଦଶ ଶ୍ରେଣୀ ହୋଇଥିବାବେଳେ ୮୩୬ ଜଣ ସ୍ନାତକ କିମ୍ବା ତଦୂର୍ଦ୍ଧ୍ୱ ସ୍ତର ପର୍ଯ୍ୟନ୍ତ ଯୋଗ୍ୟତା ଅର୍ଜନ କରିଛନ୍ତି। ୩୬ ପ୍ରାର୍ଥୀ ନାମକୁ ମାତ୍ର ପଢ଼ିଥିବାବେଳେ ୨୬ ଜଣ ନିଜକୁ ନିରକ୍ଷର ଘୋଷଣା କରିଥିଲେ। ସେହିପରି ଦ୍ୱିତୀୟ ପର୍ଯ୍ୟାୟର ୧,୧୯୮ ପ୍ରାର୍ଥୀଙ୍କ ମଧ୍ୟରୁ ୫୩୩ ଜଣଙ୍କ ଶିକ୍ଷା ୫ମରୁ ଦ୍ୱାଦଶ ଶ୍ରେଣୀ ମଧ୍ୟରେ ୧୨୧ ଲୋକ ସଭା…ହୋଇଥିବାବେଳେ ୫୭୪ ପ୍ରାର୍ଥୀ ସ୍ନାତକ କିମ୍ବା ତଦୂର୍ଦ୍ଧ୍ୱ ଶିକ୍ଷାଗତ ଯୋଗ୍ୟତା ହାସଲ କରିଛନ୍ତି। ୩୭ ପ୍ରାର୍ଥୀ ନାମକୁ ମାତ୍ର ପଢ଼ିଥିବାବେଳେ ୮ ଜଣ ନିରକ୍ଷର। ୩ ଜଣ ସେମାନଙ୍କ ଶିକ୍ଷାଗତ ଯୋଗ୍ୟତା ତଥ୍ୟ ଦେଇନାହାନ୍ତି। ତୃତୀୟ ପର୍ଯ୍ୟାୟର ୧,୩୫୨ ପ୍ରାର୍ଥୀଙ୍କ ମଧ୍ୟରୁ ୬୩୯ ପ୍ରାର୍ଥୀଙ୍କ ଶିକ୍ଷାଗତ ଯୋଗ୍ୟତା ପଞ୍ଚମରୁ ଦ୍ୱାଦଶ ଶ୍ରେଣୀ ହୋଇଥିବାବେଳେ ୫୯୧ ଜଣ ସ୍ନାତକ କିମ୍ବା ତଦୂର୍ଦ୍ଧ୍ୱ ଯୋଗ୍ୟତା ହାସଲ କରିଛନ୍ତି। ୫୬ ପ୍ରାର୍ଥୀ ନାମକ ମାତ୍ର ପଢ଼ିଥିବାବେଳେ ୧୯ ଜଣ ନିରକ୍ଷର ଥିବାବେଳେ ୩ ଜଣ ସେମାନଙ୍କ ଶିକ୍ଷାଗତ ଯୋଗ୍ୟତା ଜଣାଇ ନ ଥିବା ଏଡିଆର୍ ରିପୋର୍ଟରେ ଦର୍ଶାଯାଇଛି। ସେହିପରି ଚତୁର୍ଥ ପର୍ଯ୍ୟାୟର ୬୪୪ ଜଣ ପ୍ରାର୍ଥୀଙ୍କ ଶିକ୍ଷା ୫ମରୁ ଦ୍ୱାଦଶ ଶ୍ରେଣୀ ପାସ୍ ମଧ୍ୟରେ ହୋଇଥିବାବେଳେ ୯୪୪ ଜଣ ସ୍ନାତକ କିମ୍ବା ଏହାଠାରୁ ଅଧିକ ଶିକ୍ଷାଗତ ଯୋଗ୍ୟତା ହାସଲ କରିଛନ୍ତି। ୩୦ ପ୍ରାର୍ଥୀ ନାମକୁ ମାତ୍ର ଶିକ୍ଷା ଗ୍ରହଣ କରିଥିବାବେଳେ ୨୬ ଜଣ ନିରକ୍ଷର ଥିବା ଜଣାପଡ଼ିଛି। ୫ମ ପର୍ଯ୍ୟାୟର ପ୍ରାର୍ଥୀଙ୍କ ମଧ୍ୟରୁ ୨୯୩ ଜଣଙ୍କ ଶିକ୍ଷା ପଞ୍ଚମ ଶ୍ରେଣୀରୁ ଦ୍ୱାଦଶ ଶ୍ରେଣୀ ମଧ୍ୟରେ ହୋଇଥିବାବେଳେ ୩୪୯ ଜଣ ସ୍ନାତକ କିମ୍ବା ତଦୂର୍ଦ୍ଧ୍ୱ ସ୍ତର ପର୍ଯ୍ୟନ୍ତ ଶିକ୍ଷାଗ୍ରହଣ କରିଛନ୍ତି। ଏହି ପର୍ଯ୍ୟାୟରେ ୨୦ ପ୍ରାର୍ଥୀ ନାମକୁ ମାତ୍ର ପାଠ ପଢ଼ିଥିବାବେଳେ ୫ ଜଣ ନିରକ୍ଷର ଥିବା ଜଣାପଡ଼ିଛି।
ଷଷ୍ଠ ପର୍ଯ୍ୟାୟ ନିର୍ବାଚନର ମୋଟ ୮୬୯ ପ୍ରାର୍ଥୀଙ୍କ ମଧ୍ୟରୁ ୩୩୨ ଜଣଙ୍କ ଶିକ୍ଷାଗତ ଯୋଗ୍ୟତା ୫ମରୁ ଦ୍ୱାଦଶ ଶ୍ରେଣୀ ମଧ୍ୟରେ ହୋଇଥିବାବେଳେ ୪୮୭ ଜଣ ସ୍ନାତକ କିମ୍ବା ତା’ଠୁ ଅଧିକ ପାଠ ପଢ଼ିଛନ୍ତି। ୨୨ ଜଣ ଡିପ୍ଲୋମାଧାରୀ ଥିବାବେଳେ ୧୨ ଜଣ ନାମକୁ ମାତ୍ର ଶିକ୍ଷା ଗ୍ରହଣ କରିଛନ୍ତି ଓ ୧୩ ଜଣ ନିରକ୍ଷର ରହିଛନ୍ତି। ସେହିପରି ସପ୍ତମ ପର୍ଯ୍ୟାୟର ୯୦୪ ପ୍ରାର୍ଥୀଙ୍କ ମଧ୍ୟରୁ ୪୦୨ ଜଣଙ୍କ ଶିକ୍ଷାଗତ ଯୋଗ୍ୟତା ୫ମରୁ ଦ୍ୱାଦଶ ଶ୍ରେଣୀ ମଧ୍ୟରେ ହୋଇଥିବାବେଳେ ୪୩୦ ଜଣ ସ୍ନାତକ କିମ୍ବା ତା’ଠାରୁ ଅଧିକ ଶିକ୍ଷାଲାଭ କରିଛନ୍ତି। ୨୦ ଜଣ ଡିପ୍ଲୋମାଧାରୀ ହୋଇଥିବାବେଳେ ୨୬ ଜଣ ନାମକୁ ମାତ୍ର ପାଠ ପଢ଼ିଛନ୍ତି ଓ ୨୪ ଜଣ ନିରକ୍ଷର। ୨ ଜଣ ପ୍ରାର୍ଥୀ ସେମାନଙ୍କ ଶିକ୍ଷାଗତ ଯୋଗ୍ୟତା ତଥ୍ୟ ଦେଇ ନ ଥିବା ରିପୋର୍ଟରୁ ଜଣାପଡ଼ିଛି।
ଏପ୍ରିଲ ୧୯ରୁ ଜୁନ୍ ୧ ମଧ୍ୟରେ ୭ ପର୍ଯ୍ୟାୟରେ ନିର୍ବାଚନ ହେଉଥିବାବେଳେ ଜୁନ୍ ୪ରେ ଭୋଟଗଣତି କରାଯିବ। ଏପର୍ଯ୍ୟନ୍ତ ୫ ପର୍ଯ୍ୟାୟ ନିର୍ବାଚନ ଶେଷ ହୋଇଥିବାବେଳେ ଆସନ୍ତା ୨୫ରେ ଷଷ୍ଠ ଏବଂ ଜୁନ୍ ୧ରେ ସପ୍ତମ ପର୍ଯ୍ୟାୟ ମତଦାନ ଅନୁଷ୍ଠିତ ହେବ।
