ଝାଡଖଣ୍ଡ ଏବଂ ଛତିଶଗଡରେ ବର୍ଷା ଦିନେ ଏକ ପରିବା ବହୁ ମାତ୍ରାରେ ବିକ୍ରି ହୋଇଥାଏ। ଏବେ ଏହାକୁ ଦେଶର ସବୁଠୁ ମହଙ୍ଗା ପରିବା ବୋଲି କୁହାଯାଉଛି। ଏହି ପରିବାର ମୂଲ୍ୟ କିଲୋ ପିଛା ୧୨୦୦ ଟଙ୍କାରେ ବିକ୍ରି ହେଉଛି। ଯାହାକି ମାଉ ମାଂସ ମୂଲ୍ୟଠାରୁ ମଧ୍ୟ ଅଧିକ। ଏହି ପରିବାର ନାଁ ହେଉଛି ଖୁଖାଡି। ବଜାରକୁ ଆସିବା ମାତ୍ରେ କିଛି ମିନିଟ ମଧ୍ୟରେ ବିକ୍ରି ହୋଇଯାଏ। ଏହି ପରିବାରୁ ପ୍ରଚୁର ପ୍ରୋଟିନ ମିଳିଥାଏ।
ଛତିଶଗଡରେ ଏହାକୁ ଖୁଖାଡି କୁହାଯାଏ। ଝାଡ଼ଖଣ୍ଡରେ ଏହାକୁ ରୁଗଡା କୁହାଯାଏ। ଏହା ଏକ ଛତୁ ଜାତୀୟ ପରିବା। ଏହା ପ୍ରକୃତିକ ଭାବେ ଜଙ୍ଗଲରେ ଫଳିଥାଏ। ଏହି ପରିବାକୁ ଦୁଇ ଦିନ ମଧ୍ୟରେ ରାନ୍ଧିବାକୁ ପଡିବ। ନଚେତ୍ ଏହା ଅଦରକାରୀ ହୋଇଯାଏ। ଛତିଶଗଡର ବଳରାମପୁର, ସୁରଜପୁର, ସୁରଗୁଜାରେ ବର୍ଷା ଦିନେ ଏହି ପରିବା ଫଳିଥାଏ। ଦୁଇମାସ ଧରି ଫଳୁଥିବା ଏହି ଖୁଖାଡିର ଚାହିଦା ଏତେ ବଢିଯାଏ ଯେ ଜଙ୍ଗଲରେ ରହୁଥିବା ଗ୍ରାମବାସୀ ଏହାକୁ ସଂରକ୍ଷଣ କରନ୍ତି। ଛତିଶଗଡର ଅମ୍ବିକାପୁର ସମେତ ଅନ୍ୟାନ୍ୟ ସହରାଞ୍ଚଳର ଲୋକମାନେ ଏହାକୁ କମ ମୂଲ୍ୟରେ କିଣୁଛନ୍ତି ଏବଂ ଏହାକୁ କିଲୋ ପିଛା ୧୦୦୦ ରୁ ୧୨୦୦ ଟଙ୍କା ପର୍ଯ୍ୟନ୍ତ ବିକ୍ରି କରୁଛନ୍ତି। ବିଭିନ୍ନ ପ୍ରକାର ଔଷଧ ପ୍ରସ୍ତୁତି ପାଇଁ ଖୁଖାଡି ବ୍ୟବହୃତ ହୁଏ।
