କୋକସରା,୨।୬ (ଡି.ଏନ୍.ଏ.): କଳାହାଣ୍ଡି ଜିଲା କୋକସରା ବ୍ଲକ ଆମପାଣି ପୋଲିସ ଆନ୍ଧ୍ରପ୍ରଦେଶକୁ ବେଆଇନ ଭାବେ ଧାନ ଚାଲାଣ ହେଉଥିବା ୨ଟି ଟ୍ରକକୁ ଜବତ କରିଛି।
ମିଳିଥିବା ସୂଚନା ମୁତାବକ, ବ୍ଲକର ମୋଟେର ଏବଂ ଜୟପାଟଣା ବ୍ଲକ ବାନେର ଅଞ୍ଚଳରୁ ୨ଟି ଟ୍ରକ ଯୋଗେ ଆନ୍ଧ୍ରପ୍ରଦେଶର କାକିନାଡାକୁ ଧାନ ଚାଲାଣ ହେଉଥିବା ନେଇ କୌଣସି ସୂତ୍ରରୁ ପୋଲିକୁ ଖବର ମିଳିଥିଲା। ଖବର ପାଇ ଆମପାଣି ପୋଲିସ ଟ୍ରକ୍କୁ ଅଟକ ରଖି ଯୋଗାଣ ବିଭାଗକୁ ଘଟଣା ସମ୍ପର୍କରେ ଜଣାଇଥିଲା। ପରେ କୋକସରା ବ୍ଲକ ଯୋଗାଣ ନିରୀକ୍ଷକ ଜଗାରାମ ମୁର୍ମୁ, ଧର୍ମଗଡ଼ ଉପଖଣ୍ଡ ଯୋଗଣା ଅଧିକାରୀ ଖଗେଶ୍ୱର ପଣ୍ଡା ପ୍ରମୁଖ ଘଟଣାସ୍ଥଳରେ ପହଞ୍ଚି କାଗଜ ପତ୍ର ଯାଞ୍ଚ କରି ଟ୍ରକ୍ ଦ୍ୱୟକୁ ଜବତ କରିଛନ୍ତି। ୨ଟି ଟ୍ରକ୍ ନମ୍ବର ଏପି ୩୧ ଟିଟି ୧୭୨୮ ଓ ଓଡି ୧୦ ଆର୍ ୮୭୩୨। ଏଥିରେ ୧୧ଶହ ବ୍ୟାଗରେ ୩୫୯.୮୦ କୁଇଣ୍ଟାଲ ଧାନ ଥିବା ଜଣାପଡିଛି। ଜବତ ଧାନକୁ ବୋବରିଆ ସ୍ଥିତ ଜେକେ ଫୁଡ ରାଇସ୍ମିଲରେ ଜିମା ଦିଆଯାଇଛି। ପୋଲିସ ଟ୍ରକ ଦ୍ୱୟକୁ ଥାନାରେ ଅଟକ ରଖାଯାଇଥିବା କୋକସରା ବ୍ଲକ ଯୋଗାଣ ନିରୀକ୍ଷକ ଜଗାରାମ ମୁର୍ମୁ ସୂଚନା ଦେଇଛନ୍ତି। ଅନ୍ୟପକ୍ଷେ ପୋଲିସ ଘଟଣାର ଅଧିକ ତଦନ୍ତ ଚଳାଇଛି।
