ନୂଆଦିଲ୍ଲୀ,୯।୧୨: ସଂସଦରେ ପ୍ରଶ୍ନ ପଚାରିବା ପାଇଁ ଟଙ୍କା ନେବା ମାମଲାରେ ତୃଣମୂଳ କଂଗ୍ରେସ ଏମପି ମହୁଆ ମୋଇତ୍ରଙ୍କୁ ଲୋକସଭାରୁ ବହିଷ୍କାର କରାଯାଇଛି। ତେବେ ଲୋକସଭାରୁ ବହିଷ୍କାର ହେବା ଘଟଣାରେ ମହୁଆ ପ୍ରଥମ ଏମପି ନୁହନ୍ତି। ୧୮ବର୍ଷ ପୂର୍ବେ ୨୦୦୫ ଡିସେମ୍ବର ୨୪ରେ ଏପରି ମାମଲାରେ ୧୧ଜଣ ଏମପିଙ୍କ ସଦସ୍ୟତା ପଦ୍ଦ ରଦ୍ଦ କରାଯାଇଥିଲା। ଏହି ୧୧ଜଣଙ୍କ ମଧ୍ୟରୁ ୧୦ଏମପି ଲୋକସଭା ଓ ଜଣେ ରାଜ୍ୟସଭାର ଥିଲେ। ସେତେବେଳେ କେନ୍ଦ୍ରରେ ୟୁପିଏ ସରକାର ଥିଲା।
୨୦୦୫ରେ ସଂସଦରେ ପ୍ରଶ୍ନ ପଚାରିବା ପାଇଁ ଟଙ୍କା ନେବା ମାମଲାରେ ୧୧ଜଣ ଏମପି ଲୋକସଭାରେୁ ବହିଷ୍କୃତ ହୋଇଥିଲେ। ସେମାନଙ୍କ ମଧ୍ୟରୁ ଭାଜପାର ୬ଏମପି ଛତ୍ରପାଲ ଲୋଧା(ଓଡିଶା)ରାଜ୍ୟସଭା ଏମପି,ଆନ୍ନାସାହେବ ଏମ କେ ପାଟିଲ(ମହାରାଷ୍ଟ୍ର), ଚନ୍ଦ୍ରପ୍ରତାପ ସିଂହ(ମଧ୍ୟ ପ୍ରଦେଶ), ପ୍ରଦୀପ ଗାନ୍ଧୀ(ଛତିଶଗଡ), ସୁରେଶ ଚାଣ୍ଡେଲ(ହିମାଞ୍ଚଳ ପ୍ରଦେଶ),ଓ୍ବାଇ ଜି ମହାଜନ(ମହାରାଷ୍ଟ୍ର) ସାମିଲ ଥିଲେ। ସେହିପରି ବହୁଜନ ସମାଜ ପାର୍ଟି(ବିଏସପି)ର ୩ ଏମପି ନରେନ୍ଦ୍ର କୁମାର କୁଶଓ୍ବାହା, ଲାଲ ଚନ୍ଦ୍ର କୋଲ ଏବଂ ରାଜାରାମ ପାଲ(ୟୁପି) ବହିଷ୍କୃତ ହୋଇଥିଲେ। ଆରଜେଡିର ମନୋଜ କୁମାର ଏବଂ କଂଗ୍ରେସର ରାମସେବକ ସିଂହଙ୍କ ବିରୋଧରେ ମଧ୍ୟ ଏପରି କାର୍ଯ୍ୟାନୁଷ୍ଠାନ କରାଯାଇଥିଲା।
ସଂସଦରେ ଭୋଟ ମାଧ୍ୟମରେ ସମସ୍ତ ୧୧ ଏମପିଙ୍କୁ ବହିଷ୍କାର କରାଯାଇଥିଲା। ଭୋଟ ସମୟରେ ଭାଜପା ଏକ ପଦଯାତ୍ରା କରିଥିଲା। ଲୋକସଭାରେ ତତ୍କାଳୀନ ବାଚସ୍ପତି ସୋମନାଥ ଚାଟାର୍ଜୀ ଅଭିଯୁକ୍ତ ଏମପିଙ୍କୁ ଏହି ମାମଲାରେ ନିଜର ପକ୍ଷ ରଖିବାକୁ ସୁଯୋଗ ଦେଇ ନ ଥିଲେ। ତତ୍କାଳୀନ ବିରୋଧୀଦଳ ନେତା ଲାଲ କୃଷ୍ଣ ଆଡଭାନୀ ଏମପିଙ୍କ ବହିଷ୍କାରକୁ ମୃତ୍ୟୁଦଣ୍ଡ ସହ ତୁଳନା କରିଥିଲେ।
ମହୁଆ ଲୋକସଭାର ୧୨ତମ ସଦସ୍ୟ ଯିଏ ଅନୈତିକ ଆଚରଣ ହେତୁ ସଦସ୍ୟତା ହରାଇଛନ୍ତି। କଂଗ୍ରେସ ଏମପି ଏସ.ଜି ମୁଗଦଲ ପ୍ରଥମ ଏମପି ଥିଲେ ୧୯୫୧ରେ ଯାହାଙ୍କ ସଦସ୍ୟତା ଲାଞ୍ଚ ନେଇ ପ୍ରଶ୍ନ ପଚାରିବାରୁ ଚାଲିଯାଇଥିଲା। ସଂସଦରେ ପ୍ରଶ୍ନ ପଚାରିବା ବଦଳରେ ମୁଗଦଲ ଜଣେ ବ୍ୟବସାୟୀଙ୍କଠାରୁ ୫ହଜାର ଟଙ୍କା ନେଇଥିଲେ।
