ଭୁବନେଶ୍ୱର,୧୮ା୧୦(ବ୍ୟୁରୋ) : ଲଣ୍ଡନରେ ପ୍ରଦର୍ଶିତ ହେବ ଭାରତୀୟ ରେଳପଥର ସର୍ବୋତ୍ତମ ବିଳାସପୂର୍ଣ୍ଣ ଟ୍ରେନ୍ ମହାରାଜା ଏକ୍ସପ୍ରେସ। ଆସନ୍ତା ୪ରୁ ୬ ନଭେମ୍ବର ପର୍ଯ୍ୟନ୍ତ ଭାରତର ଏହି ଉନ୍ନତ ରାଜକୀୟ ଆତିଥ୍ୟ ପ୍ରଦାନକାରୀ ବିଳାସପୂର୍ଣ୍ଣ ଟ୍ରେନ୍ ‘ଓ୍ବାର୍ଲ୍ଡ ଟ୍ରାଭେଲ ମାର୍କେଟ’ ମେଳାରେ ସାମିଲ ହେବ। ୨୦୦୯ରେ ଶୁଭାରମ୍ଭ ହୋଇଥିବା ଏହି ଟ୍ରେନ ଚଳିତବର୍ଷ ୧୦ ବର୍ଷରେ ପାଦ ଦେଇଛି। ଏହି ତିନିଦିନିଆ ଟ୍ରାଭେଲ ମାର୍କେଟିଂ କର୍ମଶାଳାରେ ରାଜକୀୟ ଟ୍ରେନ ମହାରାଜା ଏକ୍ସପ୍ରେସର ଅବିକଳ ରୂପ ପ୍ରଦର୍ଶିତ ହେବ। ମହାରାଜା ଏକ୍ସପ୍ରେସ ଭାରତୀୟ ରେଳପଥରେ ଯାତ୍ରୀମାନଙ୍କୁ ସମ୍ପୂର୍ଣ୍ଣ ନିଆରା ସେବା ଯୋଗାଇଥାଏ। ଦେଶର ବିଭିନ୍ନ ପର୍ଯ୍ୟଟନସ୍ଥଳୀର ସ୍ବତନ୍ତ୍ର ପ୍ୟାକେଜ ପ୍ରସ୍ତୁତ କରି ଦେଶ ବିଦେଶର ପର୍ଯ୍ୟଟକଙ୍କୁ ବିଳାସପୂର୍ଣ୍ଣ ସେବା ଯୋଗାଣ କ୍ଷେତ୍ରରେ ଏହି ଟ୍ରେନ୍ ସର୍ବାଗ୍ରେ ରହି ଆସିଛି। ଏହା କେବଳ ଭାରତରେ ନୁହେଁ, ବିଶ୍ୱ ତାଲିକାରେ ସ୍ଥାନ ପାଇଛି।
