ଭୁବନେଶ୍ୱର,୧୬ା୨(ବ୍ୟୁରୋ): ଯାତ୍ରୀ ପରିବହନ ସେବାକୁ ତ୍ୱରାନ୍ବିତ କରିବାକୁ ରାଜ୍ୟରେ ୧୦୫ଟି ଆଦର୍ଶ ବସ୍ଷ୍ଟାଣ୍ଡ ନିର୍ମାଣ କରାଯିବ। ପ୍ରଥମ ପର୍ଯ୍ୟାୟରେ ୫୫ଟି ବ୍ଲକସ୍ତରୀୟ ଆଦର୍ଶ ବସ୍ଷ୍ଟାଣ୍ଡ ନିର୍ମାଣ କରାଯିବ। ୨୦୨୩ ଡିସେମ୍ବର ସୁଦ୍ଧା ଏଗୁଡ଼ିକର ନିର୍ମାଣ କାର୍ଯ୍ୟ ଶେଷ ହେବ। ସେହିପରି ଦ୍ୱିତୀୟ ପର୍ଯ୍ୟାୟରେ ଆଉ ୫୦ଟି ବସ୍ଷ୍ଟାଣ୍ଡ ନିର୍ମାଣ ହେବ। ଏହା ୨୦୨୪ ମାର୍ଚ୍ଚ ସୁଦ୍ଧା ଶେଷ ହେବ। ବୁଧବାର କୋଣାର୍କ ଇକୋ-ରିଟ୍ରିଟ୍ଠାରେ ଅନୁଷ୍ଠିତ ବରିଷ୍ଠ ଅଧିକାରୀ ସମ୍ମିଳନୀର ଦ୍ୱିତୀୟ ଦିବସରେ ବାଣିଜ୍ୟ ଓ ପରିବହନ ସଚିବ ଉଷା ପାଢ଼ୀ ଏହି ସୂଚନା ଦେଇଛନ୍ତି। ସେ କହିଛନ୍ତି ଯେ, ଯାତ୍ରୀମାନଙ୍କ ସୁବିଧା ପାଇଁ ବିଜୁ ଗଁା ଗାଡ଼ି ଯୋଜନାକୁ ଆହୁରି ମଜଭୁତ କରିବା ସକାଶେ ଆଭ୍ୟନ୍ତର ଜଳ ପରିବହନକୁ ଏହି ଯୋଜନାରେ ସାମିଲ କରାଯାଇଛି। ଓଡ଼ିଶା ରାଜ୍ୟ ସଡ଼କ ପରିବହନ ନିଗମକୁ ବ୍ୟବସାୟିକ ଦୃଷ୍ଟିରୁ ଲାଭ ପ୍ରଦାନ କରୁଥିବା ମାର୍ଗଗୁଡ଼ିକରେ ବସ୍ ଚଳାଚଳ କରିବାକୁ ପ୍ରୋତ୍ସାହିତ କରାଯାଇଛି। ଏଥିସହିତ ସହର ପରିବହନ ବ୍ୟବସ୍ଥାରେ ଦ୍ୱିତୀୟ ଶ୍ରେଣୀ ସହରଗୁଡ଼ିକୁ ସାମିଲ କରାଯାଇଛି। ଯାନବାହନଗୁଡ଼ିକର ସମୟଭିତ୍ତିକ ସ୍ଥାନଗୁଡ଼ିକୁ ଯାଞ୍ଚ କରିବାକୁ ଆସନ୍ତା ଅକ୍ଟୋବର ସୁଦ୍ଧା ଜିପିଏସ୍/ ଜିପିଆର୍ଏସ୍ ପଦ୍ଧତି କାର୍ଯ୍ୟକାରୀ କରାଯିବ। ସଡ଼କ ସୁରକ୍ଷା ପାଇଁ ପ୍ରତ୍ୟେକ ମଙ୍ଗଳବାରକୁ ଶୂନ ସହନଶୀଳତା ଦିବସ ଭାବେ ରାଜ୍ୟରେ ପାଳନ କରିବାକୁ ନିଷ୍ପତ୍ତି ହୋଇଛି।
ଅନ୍ୟପକ୍ଷରେ ଦୀର୍ଘ ବର୍ଷ ଧରି ପଡ଼ିରହିଥିବା ଅସ୍ତରଙ୍ଗ ଓ ସୁବର୍ଣ୍ଣରେଖା ବନ୍ଦର ଖୁବ୍ଶୀଘ୍ର କାର୍ଯ୍ୟକ୍ଷମ ହେବ। ସୁବର୍ଣ୍ଣରେଖା ବନ୍ଦରର ମାଲ ପରିବହନ କ୍ଷମତା ୨୫ରୁ ୫୫ ଏମ୍ଏମ୍ଟିପିଏ ହୋଇଥିବା ବେଳେ ଅସ୍ତରଙ୍ଗ ବନ୍ଦରର କ୍ଷମତା ୧୭ରୁ ୭୧ ଏମ୍ଏମ୍ଟିପିଏ ଏବଂ ମହାନଦୀରେ ନିର୍ମାଣ ହେଉଥିବା ନଦୀଭିତ୍ତିକ ବନ୍ଦର କ୍ଷମତା ୪୫ ଏମ୍ଏମ୍ଟିପିଏ ରହିବ। ବିମାନ ଉଡ଼ାଣ ତାଲିମକୁ ତ୍ୱରାନ୍ବିତ କରିବାକୁ ଢେଙ୍କାନାଳର ବିରାସାଳସ୍ଥିତ ବିଜୁ ପଟ୍ଟନାୟକ ଏରୋସ୍ପେସ୍ ଏକାଡେମୀରୁ ପ୍ରତିବର୍ଷ ୫୦୦ ପାଇଲଟ ପ୍ରସ୍ତୁତ କରାଯିବ। ଏହାର ପ୍ରଥମ ପର୍ଯ୍ୟାୟ କାର୍ଯ୍ୟ ସମ୍ପୂର୍ଣ୍ଣ ହୋଇଥିବା ବେଳେ ଦ୍ୱିତୀୟ ପର୍ଯ୍ୟାୟ କାର୍ଯ୍ୟ ଚାଲୁ ରହିଛି ବୋଲି ସଚିବ କହିଛନ୍ତି।
ନୂତନ ଓଡ଼ିଶା-ସଶକ୍ତ ଓଡ଼ିଶାର ସଫଳ ରୂପାୟନ ମୁଖ୍ୟମନ୍ତ୍ରୀଙ୍କ ଲକ୍ଷ୍ୟ। ଏଥିପାଇଁ ବାଣିଜ୍ୟ ଓ ପରିବହନ ବିଭାଗ ବିଭିନ୍ନ ପଦକ୍ଷେପ ଗ୍ରହଣ କରିଛି। ଓଡ଼ିଶାର ସମସ୍ତ ଗ୍ରାମପଞ୍ଚାୟତକୁ ଯାତ୍ରୀବାହୀ ବସ୍ସେବା ପ୍ରଚଳନ କରିବାକୁ ଯୋଜନା ଥିବାବେଳେ ସମସ୍ତ ଜିଲାକୁ ରେଳ ସଂଯୋଗ ଏବଂ ସେବା ଯୋଗାଣରେ ସ୍ବଚ୍ଛତା ଓ ସୁବିଧା ରକ୍ଷା ପାଇଁ ନାଗରିକ ସୁବିଧାଯୋଗ୍ୟ ପ୍ରଯୁକ୍ତିବିଦ୍ୟାର ଉପଯୋଗ କରାଯାଉଛି। ଉପକୂଳ ଓଡ଼ିଶାରେ ବନ୍ଦର ଭିତ୍ତିଭୂମିର ବିକାଶ କରି ଓଡ଼ିଶାକୁ ଏକ ଶକ୍ତିଶାଳୀ ସମୁଦ୍ରତଟ ରାଜ୍ୟରେ ରୂପାନ୍ତର କରାଯିବାକୁ ସରକାର ଲକ୍ଷ୍ୟ ରଖିଛନ୍ତି॥ ସଡ଼କ ଦୁର୍ଘଟଣା ଓ ତଜ୍ଜନିତ ମୃତ୍ୟୁକୁ ହ୍ରାସକରିବା ପାଇଁ ସମ୍ପୃକ୍ତ ବିଭାଗଗୁଡ଼ିକ ସହିତ ପରାମର୍ଶ କରି କାର୍ଯ୍ୟାବଳୀ ପ୍ରସ୍ତୁତ କରିବାକୁ ଜିଲାପାଳଙ୍କୁ ନିର୍ଦ୍ଦେଶ ଦିଆଯାଇଛି। ବିଭାଗୀୟ ସଚିବ ରାଜ୍ୟର ବିଭିନ୍ନ ପରିବହନ କ୍ଷେତ୍ର ଯଥା- ସଡ଼କ, ରେଳ, ଆଭ୍ୟନ୍ତର ଜଳ ପରିବହନ ଓ ବେସାମରିକ ବିମାନ ଚଳାଚଳଗୁଡ଼ିକର ଉନ୍ନତି ପାଇଁ ଏକ ଯୋଜନା ଉପସ୍ଥାପନ କରିଥିଲେ। ୨୦୨୧-୨୨ ଆର୍ଥିକ ବର୍ଷରେ ବାଣିଜ୍ୟ ଓ ପରିବହନ ବିଭାଗର ବଜେଟ ୮୭୦ କୋଟି ଟଙ୍କା ଥିଲା। ୨୦୨୨-୨୩ରେ ୬୧% ବୃଦ୍ଧି ହୋଇ ୧୪୩୨ କୋଟି ଟଙ୍କାରେ ପହଞ୍ଚିଛି। ଏହି ଅଭିବୃଦ୍ଧି ବଜେଟ ଦ୍ୱାରା ବିଭାଗ ଭିତ୍ତିଭୂମିକୁ ସ୍ଥିତିସ୍ଥାପକ ଓ ଉନ୍ନତମାନର କରିବାକୁ ଲକ୍ଷ୍ୟ ରଖିଛି। ଯଦ୍ଦ୍ବାରା ଜନସାଧାରଣ ସୁଚାରୁରୂପେ ଏବଂ ନିର୍ବିଘ୍ନରେ ଚଳାଚଳ କରିପାରିବେ। ସୁନ୍ଦରଗଡ଼ ଜିଲାପାଳ ଗାଭାଲି ପି ହର୍ଶଦ ଏବଂ ଭଦ୍ରକ ଜିଲାପାଳ ସିଦ୍ଧେଶ୍ୱର ବଳିରାମ ବୋନ୍ଦର ସେମାନଙ୍କ ଜିଲାର ଆକାଂକ୍ଷୀ ବିଷୟ ବୈଠକରେ ଉପସ୍ଥାପନ କରିଥିଲେ।
