ଭୁବନେଶ୍ୱର,୪।୨(ବ୍ୟୁରୋ): କେନ୍ଦ୍ର ବଜେଟ ୨୦୨୩-୨୪ରେ ଓଡ଼ିଶାକୁ ୧୦,୦୧୨ କୋଟି ଟଙ୍କାର ରେଳ ଅନୁଦାନ ଆବଣ୍ଟିତ ହୋଇଛି। ଏନେଇ ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ ଶୁକ୍ରବାର ଘୋଷଣା କରିଛନ୍ତି। ରାଜ୍ୟକୁ ମିଳିଥିବା ରେଳ ଅନୁଦାନ ମଧ୍ୟରେ ଏହା ସବୁଠୁ ଅଧିକ। ଏପରି କି କେନ୍ଦ୍ର ସରକାର ପୁଣି ଥରେ ରାଜ୍ୟ ମାଗିଥିବା ପରିମାଣଠାରୁ ଅଧିକ ଅନୁଦାନ ଦେଇଛନ୍ତି। ଏହି ଅନୁଦାନ ମଧ୍ୟରେ ୩୭ଟି ନୂଆ ରେଳ ଲାଇନ୍ ପ୍ରକଳ୍ପ ପାଇଁ ୨,୫୬୪ କୋଟି ଏବଂ ୪,୬୪୩ କି.ମି. ରେଳ ଲାଇନର ଦୋହରୀକରଣ ଲାଗି ୩,୮୦୦ କୋଟି ଟଙ୍କା ବ୍ୟୟବରାଦ ହୋଇଛି। ୨୮୯ କିଲୋମିଟର ଖୋର୍ଦ୍ଧା ରୋଡ୍- ବଲାଙ୍ଗୀର ରେଳ ଲାଇନ ପ୍ରକଳ୍ପ କାର୍ଯ୍ୟ ତ୍ୱରାନ୍ବିତ ପାଇଁ ସର୍ବାଧିକ ୧,୫୯୯ କୋଟି ମଞ୍ଜୁୁର କରାଯାଇଥିବାବେଳେ ତାଳଚେର-ବିମଳାଗଡ଼ ରେଳ ଲାଇନ ପାଇଁ ୩୦୦ କୋଟି ଏବଂ ଅନୁଗୋଳ- ସୁକିନ୍ଦା ରୋଡ୍ ପାଇଁ ୨୦୦ କୋଟି ଟଙ୍କାର ବ୍ୟୟବରାଦ କରାଯାଇଛି। ଏହାସହିତ କେତେକ ଘୋଷଣା ମଧ୍ୟ କରାଯାଇଛି। ତଦନୁଯାୟୀ ଭୁବନେଶ୍ୱରର ଲିଙ୍ଗରାଜ ରୋଡ୍ ଷ୍ଟେଶନରୁ ପୁରୀ ପର୍ଯ୍ୟନ୍ତ ବନ୍ଦେ ମେଟ୍ରୋ ଟ୍ରେନର ଚଳାଚଳ କରାଯିବ। ରାଜ୍ୟର ୫୭ଟି ଷ୍ଟେଶନକୁ ନବୀକରଣ କରାଯିବ। ନୂତନ ଭାବେ ଜନ ଜାତୀୟ ଗୌରବ କରିଡର ଏବଂ ଶକ୍ତି କରିଡର ବ୍ୟବସ୍ଥା ହୋଇଛି। ଏଥିନିମନ୍ତେ ୨୮୪ କୋଟି ଟଙ୍କା ଲେଖାଏ ବ୍ୟୟବରାଦ କରାଯାଇଛି। ନୂତନ ପୋର୍ଟ ସଂଯୋଗୀକରଣ ପାଇଁ ୫୭ କୋଟି ଟଙ୍କା ମଞ୍ଜୁର ହୋଇଛି। ସେହିପରି ରାଜ୍ୟରେ ୨୮୦ କିଲୋମିଟର ନୂଆ ରେଳ ଲାଇନ୍ ନିର୍ମାଣ କରାଯିବାକୁ ଘୋଷଣା ହୋଇଛି।
ଅର୍ଥମନ୍ତ୍ରୀ ନିର୍ମଳା ସୀତାରାମନ ଗତ ୧ ତାରିଖରେ ଲୋକ ସଭାରେ ୨୦୨୩-୨୪ ଆର୍ଥିକ ବର୍ଷର କେନ୍ଦ୍ର ବଜେଟ୍ ଉପସ୍ଥାପନ କରିଥିଲେ। ସେଥିରେ ଭାରତୀୟ ରେଳର ବିକାଶ ଏବଂ ଭିତ୍ତିଭୂମି ସୁୁଦୃଢ଼ ପାଇଁ ୨.୪ ଲକ୍ଷ କୋଟି ଟଙ୍କାର ବ୍ୟୟବରାଦ କରାଯାଇଥିଲା। ତଦନୁଯାୟୀ ରେଳ ମନ୍ତ୍ରଣାଳୟ ପକ୍ଷରୁ ଶୁକ୍ରବାର ରେଳ ବଜେଟରେ ବିଭିନ୍ନ ରାଜ୍ୟ ପାଇଁ ଆବଣ୍ଟିତ ଅର୍ଥ ସମ୍ପର୍କରେ ବିସ୍ତୃତ ସୂଚନା ଦିଆଯାଇଛି। ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଓଡ଼ିଶାକୁ ମିଳିଥିବା ଟଙ୍କାର ପରିମାଣ ଓ ରେଲଓ୍ବେ ସମ୍ବନ୍ଧୀୟ ଅନ୍ୟାନ୍ୟ ସୂଚନା ଦେଇଛନ୍ତି। ରାଜ୍ୟ ସରକାର ବଜେଟ ବହୁ ପୂର୍ବରୁ କେନ୍ଦ୍ର ସରକାର ଓ ରେଳ ମନ୍ତ୍ରଣାଳୟକୁ ପ୍ରାୟ ୮,୪୦୦ କୋଟି ଟଙ୍କାର ବ୍ୟୟବରାଦ ପାଇଁ ଅନୁରୋଧ କରିଥିଲେ। କିନ୍ତୁ କେନ୍ଦ୍ର ସରକାର ୧୦,୦୧୨ କୋଟି ଟଙ୍କା ଆବଣ୍ଟନ କରିଥିବା ବୈଷ୍ଣବ କହିଛନ୍ତି। ସୂଚନାଥାଉ କି, ୨୦୨୨-୨୩ ବଜେଟ୍ ପୂର୍ବରୁ ୭,୬୦୦ କୋଟି ଟଙ୍କା ଦାବି କରିଥିବା ବେଳେ କେନ୍ଦ୍ର ସରକାର ୯,୭୩୪ କୋଟି ଟଙ୍କାର ରେଳ ଅନୁଦାନ ଘୋଷଣା କରିଥିଲେ। ମନ୍ତ୍ରୀ ସୂଚନା ଦେଇ କହିଛନ୍ତି, ୨୦୦୯ରୁ ୨୦୧୪ ମଧ୍ୟରେ ଓଡ଼ିଶା ବାର୍ଷିକ ହାରାହାରି ୮୩୪ କୋଟି ଟଙ୍କା ରେଳ ଅନୁଦାନ ମିଳୁଥିଲା। ଏହାର ୧୨ ଗୁଣ ଅଧିକ ଅନୁଦାନ ୨୦୨୩-୨୪ ନିମନ୍ତେ ଓଡ଼ିଶାକୁ ଯୋଗାଇ ଦିଆଯାଇଥିବା ସେ କହିଛନ୍ତି। ରେଳମନ୍ତ୍ରୀ ବୈଷ୍ଣବଙ୍କ ସୂଚନା ଅନୁଯାୟୀ, ୨୦୨୩-୨୪ ଆର୍ଥିକ ବର୍ଷମଧ୍ୟରେ ପ୍ରାୟ ୨୮୦ କି.ମି. ରେଳଲାଇନ୍ ନିର୍ମାଣ ହେବ। ଗତ ଆର୍ଥିକ ବର୍ଷ ଅପେକ୍ଷା ଏଥର ଅନେକ ବିକାଶମୂଳକ କାର୍ଯ୍ୟ ଓ ପ୍ରକଳ୍ପକୁ ଗୁରୁତ୍ୱ ଦିଆଯାଇଛି। ଶତ ପ୍ରତିଶତ କାର୍ଯ୍ୟ ସହ ବ୍ୟୟବରାଦ ଟଙ୍କାର ପୂର୍ଣ୍ଣ ବିନିଯୋଗ ପାଇଁ ମନ୍ତ୍ରଣାଳୟ ଏବଂ ଓଡ଼ିଶା କ୍ଷେତ୍ରର ରେଳପଥ (ପୂର୍ବତଟ ରେଳପଥ) ପକ୍ଷରୁ ବ୍ୟାପକ ଆକ୍ସନ ପାଳନ ପ୍ରସ୍ତୁତ ହୋଇଥିବା ମନ୍ତ୍ରୀ କହିଛନ୍ତି। ୨୦୨୩ ଅଗଷ୍ଟ ଶେଷ ସୁଦ୍ଧା ଭାରତ ସରକାରଙ୍କ ମହତ୍ୱାକାଂକ୍ଷୀ ରେଳ ପ୍ରକଳ୍ପ ‘ବନ୍ଦେ ମେଟ୍ରୋ ଟ୍ରେନ’ ପ୍ରକଳ୍ପର ମାଷ୍ଟର ଡିଜାଇନ ଉନ୍ମୋଚନ କରାଯିବ। ଓଡ଼ିଶାର କେତେକ ସ୍ଥାନରେ ମଧ୍ୟ ବନ୍ଦେ ମେଟ୍ରୋ ଟ୍ରେନ ଚାଲିବ ବୋଲି ମନ୍ତ୍ରୀ ପ୍ରକାଶ କରିଛନ୍ତି। କଟକ-ଭୁବନେଶ୍ୱର, ପୁରୀ-କଟକ/ଭୁବନେଶ୍ୱର, ରାଉରକେଲା- ସମ୍ବଲପୁର ଅଥବା ରାଉରକେଲା-ସୁନ୍ଦରଗଡ଼ ଭଳି ରେଳ ଅଞ୍ଚଳରେ ଉକ୍ତ ଟ୍ରେନ ଚାଲିବା ଯୋଜନା ରହିଥିବା ସେ କହିଛନ୍ତି। ୨୦୨୨-୨୩ ଆର୍ଥିକ ବର୍ଷରେ ଆବଣ୍ଟିତ ଅର୍ଥର ୯୫% ଅର୍ଥ ବିଭିନ୍ନ ପ୍ରକଳ୍ପ ସାଙ୍ଗକୁ ରେଳପଥର ଉନ୍ନତୀକରଣ,ସୌନ୍ଦର୍ଯ୍ୟକରଣ ଓ ଭିତ୍ତିଭୂମି ଭଳି କାର୍ଯ୍ୟରେ ବ୍ୟବହୃତ ହୋଇଛି।
ଏହି ଅବସରରେ ପୂର୍ବତଟ ରେଳପଥ ପକ୍ଷରୁ ଶୁକ୍ରବାର ଏକ ଖବରଦାତା ସମ୍ମିଳନୀର ଆୟୋଜନ କରାଯାଇଥିଲା। ଉକ୍ତ ସମ୍ମିଳନୀରେ ପୂର୍ବତଟ ରେଳପଥର ମହାପ୍ରବନ୍ଧକ ମନୋଜ ଶର୍ମା ରେଳ ବଜେଟରେ ଓଡ଼ିଶା କ୍ଷେତ୍ରକୁ ଆବଣ୍ଟିତ ଅର୍ଥର ହିସାବ ଦେଇଥିଲେ। ପୂର୍ବତଟ ରେଳପଥର ଆଗାମୀ କାର୍ଯ୍ୟକଳାପ ଓ ଆକ୍ସନ ପ୍ଲାନ୍ ସମ୍ପର୍କରେ ସେ ବିସ୍ତୃତ ଆଲୋକପାତ କରିଥିଲେ। ପୂର୍ବତଟ ରେଳପଥ ଓଡ଼ିଶାରେ ଦଶଗୁଣ ବିକାଶମୂଳକ କାର୍ଯ୍ୟ ସାଙ୍ଗକୁ ଭିତ୍ତିଭୂମି ଓ ସୌନ୍ଦର୍ଯ୍ୟକରଣ ଉପରେ ବିଶେଷ କାର୍ଯ୍ୟ କରିବ ବୋଲି ଶର୍ମା କହିଛନ୍ତି।
