ଓ୍ବାଶିଂଟନ,୧୮।୯: ଡେଲ୍ ରିଓ ଇଣ୍ଟରନ୍ୟାଶନାଲ ବ୍ରିଜ୍। ଆମେରିକା ଯିବା ପାଇଁ ୩୭ ଡିଗ୍ରୀ ତାପମାତ୍ରାରେ ତମ୍ବୁ ତଳେ ଜୀବନ ବିତାଉଛନ୍ତି ହଜାର ହଜାର ହାଇତି ଶରଣାର୍ଥୀ। ସେମାନେ ମେକ୍ସିକୋ ଦେଇ ବ୍ରିଜ୍କୁ ଆସିଥିଲେ। ଅଧିକାରୀମାନେ ଘଉଡ଼ାଇ ଦେଉଥିବାରୁ ପୁଣି ମେକ୍ସିକୋ ଫେରିବାକୁ ବାଧ୍ୟ ହେଉଛନ୍ତି। ଏଭଳି ଶରଣାର୍ଥୀଙ୍କ ସଂଖ୍ୟା ୧୦,୫୦୩ ହେବ ବୋଲି ଡେଲ୍ ରିଓ ମେୟର ବ୍ରୁନୋ ଲୋଜାନୋ କହିଛନ୍ତି।
ଆମେରିକା-ମେକ୍ସିକୋ ସୀମାନ୍ତ ବ୍ରିଜ୍ ତଳେ କିଛିଦିନ ହେଲା ୧୦ ହଜାରରୁ ଊର୍ଦ୍ଧ୍ୱ ଶରଣାର୍ଥୀ ଆଶ୍ରୟ ନେଇଛନ୍ତି। ଏହା ସାମ୍ପ୍ରତିକ ସମୟରେ ବଢ଼ିଚାଲିଥିବା ମାନବୀୟ ସଙ୍କଟକୁ ଦର୍ଶାଉଛି। ଟେକ୍ସାସ୍ର ରେଲ୍ ରିଓ ଏବଂ ମେକ୍ସିକୋ ସ୍ଥିତ ସିଉଡାଡ୍ ଅକୁନାକୁ ସଂଯୋଗ କରୁଥିବା ବ୍ରିଜ୍ ତଳେ ଓ ଏହାର ଆଖପାଖରେ ଗଢ଼ିଉଠିଥିବା ଅସ୍ଥାୟୀ ଶିବିରଗୁଡ଼ିକରେ ଶରଣାର୍ଥୀଙ୍କ ଭିଡ଼ ଜମିବାରେ ଲାଗିଛି। ସେମାନଙ୍କ ମଧ୍ୟରୁ ଅଧିକାଂଶ ହେଉଛନ୍ତି କାରିବିଆନ୍ ରାଷ୍ଟ୍ର ହାଇତି ବାସିନ୍ଦା। ଅନ୍ୟମାନେ ହେଲେ କ୍ୟୁବା, ଭେନିଜୁଏଲା ଓ ନିକାରାଗୁଆର ଲୋକ। ନିଜ ନିଜ ଦେଶରେ ଆର୍ଥିକ ଓ ମାନବୀୟ ସଙ୍କଟ ଯୋଗୁ ଆମେରିକାର ଶରଣ ଆଶାରେ ରିଓ ଗ୍ରାଣ୍ଡେ ନଦୀ ଅତିକ୍ରମ କରି ଏହି ପୋଲ ତଳକୁ ଧାଇଁ ଆସିଛନ୍ତି। ଅତି ଦୟନୀୟ ଭାବେ ସେମାନେ ସେଠାରେ ଶୋଇରହିଥିବା ଫଟୋ ବିଭିନ୍ନ ଅନ୍ତର୍ଜାତୀୟ ଗଣମାଧ୍ୟମରେ ପ୍ରକାଶ ପାଇଛି।
ସୀମା ଅତିକ୍ରମ କରି ଆସୁଥିବା ଅଗନ୍ତୁକଙ୍କୁ ନେଇ ଆମେରିକା ସରକାର ବଡ଼ ଧରଣର ଶରଣାର୍ଥୀ ସମସ୍ୟାର ସମ୍ମୁଖୀନ ହୋଇଛନ୍ତି। ଚଳିତ ବର୍ଷ ଜୁଲାଇରେ ଆମେରିକା-ମେକ୍ସିକୋ ସୀମାରେ ୨ ଲକ୍ଷ ଶରଣାର୍ଥୀଙ୍କୁ ଅଟକ ରଖାଯାଇଥିଲା। ସରକାରୀ ତଥ୍ୟ ଅନୁସାରେ ଏହି ସଂଖ୍ୟା ବିଗତ ୨୧ ବର୍ଷ ବଧ୍ୟରେ ସର୍ବାଧିକ। ଗତମାସରେ ଅଧିକାରୀମାନେ ଆହୁରି ୧,୯୫,୦୦୦ ଶରଣାର୍ଥୀଙ୍କୁ ମେକ୍ସିକୋ ସୀମାରେ ଗିରଫ କରିଥିଲେ ବୋଲି ବୁଧବାର ପ୍ରକାଶିତ ଏକ ରିପୋର୍ଟରେ ଉଲ୍ଲେଖ କରାଯାଇଛି। ଏଥର ଗ୍ରୀଷ୍ମଋତୁ ସମୟରେ ଗିରଫଦାରି ସଂଖ୍ୟା ୨୦୧୯ ଅଗଷ୍ଟରେ ଗିରଫ ହୋଇଥିବା ଶରଣାର୍ଥୀଙ୍କଠାରୁ ୫୧,୦୦୦ ଅଧିକ। ୩୭ ଡିଗ୍ରୀ ତାପମାତ୍ରାରେ ଖାଦ୍ୟ ଓ ପିଇବା ପାଣି ନ ପାଇ ଜୀବନ ସହ ସଂଗ୍ରାମ କରୁଛନ୍ତି ଅନେକେ। ଏହି ସଙ୍କଟକୁ ଦେଖି ସମ୍ପୃକ୍ତ ଅଞ୍ଚଳରେ ବର୍ଡର ପାଟ୍ରୋଲିଂକୁ କଡ଼ାକଡ଼ି କରାଯାଇଛି। ସୋସିଆଲ ମିଡିଆରେ ଏହାର ଦୃଶ୍ୟ ଭାଇରାଲ ହେବାରେ ଲାଗିଥିବାରୁ ଆମେରିକା ରାଷ୍ଟ୍ରପତି ଜୋ ବାଇଡେନ୍ଙ୍କୁ ସମାଲୋଚନା କରାଯାଉଛି।
