କାବୁଲ୍,୨୮।୭: ଆଫଗାନିସ୍ତାନରୁ ଆମେରିକା ସୈନ୍ୟ ସ୍ବଦେଶ ଫେରୁଥିବାରୁ ଦେଶରେ ପୁଣି ତାଲିବାନ ସକ୍ରିୟ ହେବାରେ ଲାଗିଛି। ଆଫଗାନିସ୍ତାନର ଅସ୍ଥିର ସ୍ଥିତିରୁ ପାକିସ୍ତାନ ଲାଭ ଉଠାଇବାର ଉଦ୍ୟମ କରୁଛି। ସମ୍ପ୍ରତି ୧୦ ହଜାରରୁ ଅଧିକ ପାକିସ୍ତାନୀ ଆତଙ୍କବାଦୀ ଆଫଗାନିସ୍ତାନରେ ପ୍ରବେଶ କରିସାରିଛନ୍ତି। ସେମାନେ ତାଲିବାନକୁ ସହାୟତା କରୁଛନ୍ତି। ପାକିସ୍ତାନୀ ଆତଙ୍କବାଦୀମାନେ ବାଲୁଚିସ୍ତାନ ଏବଂ ସିନ୍ଧ୍ ବାଟ ଦେଇ ଆଫଗାନିସ୍ତାନରେ ପ୍ରବେଶ କରିଥିବା କୁହାଯାଉଛି । ଆତଙ୍କବାଦୀମାନେ ଆଫଗାନ ସୈନ୍ୟମାନଙ୍କୁ ଟାର୍ଗେଟ କରିବା ସହିତ ଚେକ ପୋଷ୍ଟଗୁଡିକୁ କାବୁ କରିବାକୁ ଚେଷ୍ଟା କରୁଛନ୍ତି। ଯାହାଫଳରେ କାନ୍ଦାହାର ଏବଂ କାବୁଲ ଆଦି ସହରରେ ଅତ୍ୟାବଶ୍ୟକ ଜିନିଷର ଅଭାବ ସୃଷ୍ଟି ହେବାର ଆଶଙ୍କା ଦେଖାଦେଇଛି। ତେବେ ତାଲିିବାନ ଉପରେ ଏୟାର ଷ୍ଟ୍ରାଇକ ଜାରି କରିବାକୁ ଆମେରିକା ନିଷ୍ପତ୍ତି ନେଇଛି। ଗତ କିଛି ଦିନ ହେବ ଆମେରିକା ତାଲିବାନର ବିଭିନ୍ନ ଶିବିର ଉପରେ ଜୋରଦାର ବୋମା ମାଡ଼ କରିଥିଲା। ଆମେରିକା ସହିତ ଆଫଗାନିସ୍ତାନ ବାୟୁସେନା ମଧ୍ୟ ଏହି ଆକ୍ରମଣରେ ସାମିଲ୍ ହୋଇଥିଲା। ଆମେରିକାର ମେରାଇନ୍ ଜେନେରାଲ କେନେଥ ଏଫ୍. ମ୍ୟାକେଞ୍ଜି କହିଛନ୍ତି ଯେ ତାଲିବାନ ଉପରେ ଆକ୍ରମଣ ଜାରି ରହିବ। ତେବେ ଅଗଷ୍ଟ ୩୧ ସୁଦ୍ଧା ଆଫଗାନିସ୍ତାନରେ ଆମେରିକାର ସାମରିକ ମିଶନ ସଂପୂର୍ଣ୍ଣ ସମାପ୍ତ ହେବ କି ନାହିଁ ପ୍ରଶ୍ନର ଉତ୍ତର ଦେବାକୁ ମାକେଞ୍ଜି ମନା କରି ଦେଇଛନ୍ତି। ନିକଟରେ ଆମେରିକାର ରାଷ୍ଟ୍ରପତି ଜୋ ବାଇଡେନ ଆଫଗାନିସ୍ତାନରୁ ତାଙ୍କର ସୈନ୍ୟ ପ୍ରତ୍ୟାହାର ସେପ୍ଟେମ୍ବର ସୁଦ୍ଧା ଶେଷ ହେବ ବୋଲି ଘୋଷଣା କରିଥିଲେ। ଏପର୍ଯ୍ୟନ୍ତ ଆଫଗାନିସ୍ତାନ ସରକାର ଏବଂ ଆଫଗାନିସ୍ତାନ ସୈନ୍ୟ ଆମେରିକାର ସହାୟତା ପାଇଛନ୍ତି। ମାତ୍ର ଆଗାମୀ ଦିନରେ ସ୍ଥିତି ସଙ୍କଟ ଜନକ ହେବ ବୋଲି କୁହାଯାଉଛି।
