ରାସୋଳ, ୧୨।୧୨(ଡି.ଏନ୍.ଏ.): ଫସଲ ଅମଳ ସମୟରେ ମାତିଛନ୍ତି ହାତୀ। ବର୍ଷସାରା ହାଡ଼ଭଙ୍ଗା ପରିଶ୍ରମ କରିଥିବା ଚାଷୀ ଘରକୁ ଧାନ ଆଣିବାକୁ ଆଶା ବାନ୍ଧି ବସିଥିବାବେଳେ ମାତ୍ର କେଇ ଘଣ୍ଟାରେ ଉଜାଡ଼ି ଦେଉଛନ୍ତି ଚାଷ। ଆଖି ଆଗରେ ସୁନାର ଫସଲ ନଷ୍ଟ ହୋଇଯାଉଥିବା ବେଳେ ମୁଣ୍ଡରେ ହାତ ଦେଇ ବସିଛନ୍ତି ଢେଙ୍କାନାଳ ଜିଲା ହିନ୍ଦୋଳ ବ୍ଲକ ରାସୋଳ ଅଞ୍ଚଳର ଚାଷୀ।
ବୁହାଳିପାଳ କାଳିଯୋଡ଼ି କ୍ଷୁଦ୍ର ଜଳସେଚନ ପ୍ରକଳ୍ପ ନିକଟରେ ଦଳବଦ୍ଧ ଭାବେ ରହୁଥିବା ୬୦ ହାତୀ ଏବେ ବିଭିନ୍ନ ପଲରେ ବିଭକ୍ତ ହୋଇ ଧାନ ଜମି ମୁହଁା ହୋଇଛନ୍ତି। ସମାନ ଦୃଶ୍ୟ ଦେଖିବାକୁ ମିଳିଛି ଦଣ୍ଡିରି ଅଞ୍ଚଳରେ। ଏଠାରେ ମଧ୍ୟ ୪୦ ହାତୀ ଦୀର୍ଘଦିନ ହେଲା ଉପଦ୍ରବ ସୃଷ୍ଟି କରି ଚାଲିଛନ୍ତି। ନବକିଶୋରପୁର, ବୁହାଳିପାଳ, କୁନୁଆ, ଗଣ୍ଡାନାଳୀ, ଦଣ୍ଡିରି ଅଞ୍ଚଳରେ ହାତୀ ଦୌରାତ୍ମ୍ୟ ଚରମ ସୀମାରେ ପହଞ୍ଚତ୍ଛି। କୁନୁଆ ଗ୍ରାମର ବାବୁଲି ନାୟକ ୧୨୦ ବସ୍ତା ଧାନ ଅମଳ କରି ରଖିଥିବାବେଳେ ଶନିବାର ରାତିରେ ୧୩ ହାତୀ ସେସବୁ ନଷ୍ଟ କରି ଦେଇଛନ୍ତି। ମାତ୍ର କେଇଘଣ୍ଟାରେ ବର୍ଷକର ପରିଶ୍ରମ ହରାଇ ସମ୍ପୃକ୍ତ ଚାଷୀ ଧୈର୍ଯ୍ୟହରା ହୋଇପଡ଼ିଛନ୍ତି। ସେହିପରି ଗ୍ରାମର ଲମ୍ବୋଦର ସାମଲଙ୍କ ୧ ଏକର, ଜୟନ୍ତ ସାମଲ ୧ ଏକର, କାଟେଣୀ ଗ୍ରାମର ଅଖିଳ ନାୟକ, ବାଙ୍କଟିଆର ମନୋଜ ମିଶ୍ର, ରଘୁନାଥ ପାଳ, ଶୁଶୀଳ ପାଳ ସମେତ ବହୁ ଚାଷୀଙ୍କ ଜମିରେ ବ୍ୟାପକ କ୍ଷୟକ୍ଷତି କରିଛନ୍ତି ହାତୀପଲ। ପ୍ରତିକୂଳ ପାଣିପାଗ ସତ୍ତ୍ୱେ ଚଳିତ ବର୍ଷ କଠିନ ପରିଶ୍ରମରେ ଭଲ ଫସଲ ହୋଇଥିଲା। ହେଲେ ସେସବୁ ନିମିଷକ ମଧ୍ୟରେ ହାତୀପଲ ନଷ୍ଟ କରି ପକାଉଥିବାବେଳେ ବନ ବିଭାଗର ସମସ୍ତ ଯୋଜନା ଫେଲ୍ ମାରୁଛି। ସ୍ବଳ୍ପ କର୍ମଚାରୀ ଏତେ ସଂଖ୍ୟକ ହାତୀଙ୍କୁ ଘଉଡ଼ାଇବାରେ ବିଫଳ ହେଉଥିବାବେଳେ କ୍ଷତିଗ୍ରସ୍ତ ଚାଷୀଙ୍କ ଆର୍ଥିକ ସ୍ଥିତି ଦୋହଲି ଗଲାଣି। ଏଭଳି ସ୍ଥିତି ଲାଗି ରହିଲେ ଚାଷୀକୁଳ ସର୍ବସ୍ବାନ୍ତ ହୋଇପଡ଼ିବେ ବୋଲି ଆଶଙ୍କା ପ୍ରକାଶ ପାଇଛି।
ଏ ନେଇ ଖଲିବୋରେଇ ଫରେଷ୍ଟର ହିମାଂଶୁ ପୃଷ୍ଟି କୁହନ୍ତି, ବୁହାଳିପାଳରେ ଥିବା ୬୦ ହାତୀ ବିଭିନ୍ନ ଦଳରେ ବିଭକ୍ତ ହୋଇ ବିଲରେ ପଶୁଛନ୍ତି। ଅଳ୍ପ କର୍ମଚାରୀରେ ଏତେ ସଂଖ୍ୟକ ହାତୀଙ୍କୁ ଘଉଡ଼ାଇବା ସମ୍ଭବପର ହେଉନାହିଁ। ତଥାପି ରାତିସାରା ହାତୀଙ୍କ ଉପରେ ନଜର ରଖାଯାଉଛି। ଧନଜୀବନ ହାନି ଆଶଙ୍କା ଏଡ଼ାଇବାକୁ ଲୋକଙ୍କୁ ସଚେତନ କରାଯାଉଛି।
