ରାଜନଗର,୭ା୬(ଡି.ଏନ.ଏ.): ରାଜନଗରରେ ବର୍ଷା ପବନ ସାଙ୍ଗକୁ ବଜ୍ରପାତ ମଙ୍ଗଳବାର ଅପରାହ୍ନରେ ଆତଙ୍କ ସୃଷ୍ଟି କରିଥିଲା। ବାରମ୍ବାର ବଜ୍ରପାତ ଯୋଗୁ ଲୋକେ ଘରୁ ବାହାରି ପାରି ନ ଥିଲେ। ବ୍ଲକର ବ୍ରାହ୍ମଣସାହି ଅନ୍ତର୍ଗତ ବଡ଼ନାଉକୋଣା ଗଁାରେ ବଜ୍ରପାତ ଯୋଗୁ ୩ଟି ପରିବାରର ୧୦ ବଖରା ସହ ଲକ୍ଷାଧିକ ଟଙ୍କାର ଆସବାବପତ୍ର ପୋଡ଼ି ପାଉଁଶ ହୋଇଯାଇଛି। ବଜ୍ରପାତରେ ଘର ପୋଡ଼ି ଯାଇଥିଲେ ମଧ୍ୟ ପରିବାର ଲୋକେ ନିଜ ଜୀବନ ବଞ୍ଚାଇବାରେ ସକ୍ଷମ ହୋଇଛନ୍ତି। ଅପରାହ୍ନ ୫ଟାରେ ଏହି ଗାଁର ମନୋରଞ୍ଜନ ବାରିକ, ସୁରେନ୍ଦ୍ର ବାରିକ, ପରମାନନ୍ଦ ବାରିକଙ୍କ ଘର ଉପରେ ବଜ୍ରପାତ ହୋଇଥିଲା। ଘର ଭିତରେ ଥିବା ଲୋକେ ହଠାତ୍ ଘର ଜଳିବା ଦେଖି ଜୀବନ ବିକଳରେ ବାହାରି ଆସିଥିଲେ। ପିନ୍ଧାଲୁଗା ବ୍ୟତିତ ପରିବାର ଲୋକେ ଆଉ କୌଣସି ସାମଗ୍ରୀ ଉଦ୍ଧାର କରିପାରିନାହାନ୍ତି। ସେହି ସମୟରେ ଲଗାତର ବଜ୍ରପାତ ଯୋଗୁ ଜଳୁଥିବା ନିଆଁକୁ ଲିଭାଇବାକୁ କେହି ସାହାସ କରି ନ ଥିଲେ। ୩ଟି ପରିବାରର ୧୮ଜଣ ସଦସ୍ୟ ଗଁା ସ୍କୁଲରେ ଆଶ୍ରୟ ନେଇଛନ୍ତି। ସରପଞ୍ଚ ବୀଣାପାଣି ପ୍ରଧାନ, ସମିତିସଭ୍ୟ ରବିନ ମଳିକ ବିପନ୍ନ ପରିବାର ନିକଟରେ ପହଞ୍ଚତ୍ ସମବେଦନା ଜଣାଇବା ସହ ୭ଦିନ ପାଇଁ ରନ୍ଧାଖାଦ୍ୟ ଯୋଗାଇ ଦେଇଛନ୍ତି।
