ଯାଜପୁର ଅଫିସ,୫ା୨: ଯାଜପୁର ଜିଲା ବ୍ୟାସନଗରରେ କେନ୍ଦ୍ର ସରକାରଙ୍କ ଦ୍ୱାରା ପରିଚାଳିତ କେନ୍ଦ୍ରୀୟ ବିଦ୍ୟାଳୟରେ ଭିତ୍ତିଭୂମି ସାଙ୍ଗକୁ ଶିକ୍ଷକ ଅଭାବ ପ୍ରାଥମିକ ଓ ଉଚ୍ଚପ୍ରାଥମିକ ଶିକ୍ଷାକୁ ରସାତଳଗାମୀ କରିଛି। ପ୍ରଥମରୁ ଦଶମ ଶ୍ରେଣୀ ପର୍ଯ୍ୟନ୍ତ ୪୯୩ ଛାତ୍ରୀଛାତ୍ରଙ୍କ ପାଇଁ ଏବେ ମାତ୍ର ୩ ଶିକ୍ଷକରେ ଶିକ୍ଷାଦାନ ଚାଲିଛି। ୧୫ ଶିକ୍ଷକଙ୍କ ଆବଶ୍ୟକତା ଥିବାବେଳେ ୧୧ଜଣ ଥିଲେ। କିନ୍ତୁ ଗତ ଶନିବାର ବିନା ରିଲିଭରରେ ଏକସଙ୍ଗେ ୮ ଶିକ୍ଷୟିତ୍ରୀ ଓ ଶିକ୍ଷକଙ୍କୁ ବଦଳି ପରେ ଏଭଳି ପରିସ୍ଥିତି ସୃଷ୍ଟି ହୋଇଛି। ଏହାବାଦ୍ ପ୍ରାୟ ୭ ମାସ ହେବ ସ୍କୁଲ ଗୃହ ନିର୍ମାଣ ପାଇଁ ପ୍ରାୟ ୩୩ କୋଟି ଟଙ୍କା ଅନୁଦାନ ମଞ୍ଜୁର ହୋଇଥିଲେ ହେଁ ଟେଣ୍ଡର ପ୍ରକ୍ରିୟା ଆରମ୍ଭ ହୋଇନାହିଁ। ଭଙ୍ଗାରୁଜା ନରସିଂହ ଚୌଧୁରୀ(ଏନ୍ସି) ହାଇସ୍କୁଲ ପରିସରରେ ବିପଦସଙ୍କୁଳ ଅବସ୍ଥାରେ ଏବେ ଅସ୍ଥାୟୀ ଭାବେ ଶିକ୍ଷାଦାନ ଚାଲିଛି। ଆଗକୁ ସ୍କୁଲ ଖୋଲିବାକୁ ଯୋଜନା ଥିବା ସମୟରେ ଏଭଳି ଦୁରବସ୍ଥାକୁ ନେଇ ଅଭିଭାବକ ମହଲରେ ଉଦବେଗ ପ୍ରକାଶ ପାଇଛି। ବ୍ୟାସନଗର ସହରରେ ୨୦୧୬ରେ କେନ୍ଦ୍ରୀୟ ବିଦ୍ୟାଳୟ ପ୍ରତିଷ୍ଠା ହୋଇଥିଲା। ମୁଣ୍ଡମାଳ-ଗଣେଶବଜାର ମୁଖ୍ୟ ରାସ୍ତାରୁ ଏନ୍ସି ହାଇସ୍କୁଲ ପଡିଆ ନିକଟରେ ଏହି ବିଦ୍ୟାଳୟ ଅସ୍ଥାୟୀ ଭାବେ ଖୋଲିଛି। ୧୦ଟି ଶ୍ରେଣୀ ପାଇଁ ଏଠାରେ ଆବଶ୍ୟକ ଶ୍ରେଣୀଗୃହ ନ ଥିବାରୁ ନିୟମିତ ସ୍କୁଲ ଖୋଲାଯାଇ ପାରୁନାହିଁ। ସ୍କୁଲକୁ ତରବରିଆ ଭାବେ ନିର୍ମାଣ ହୋଇଥିବା କଂକ୍ରିଟ ରାସ୍ତା ଅବସ୍ଥା ଶୋଚନୀୟ ହୋଇ ପଡିଛି। ଶିକ୍ଷକଙ୍କୁ ଅନ୍ୟତ୍ର ସ୍ଥାନାନ୍ତର କରାଯାଇଥିବାରୁ ପାଠପଢ଼ାରେ ବାଧା ସୃଷ୍ଟି ହେଉଛି। ୧୫ ଶିକ୍ଷକଙ୍କ ଆବଶ୍ୟକତା ରହିଥିବାବେଳେ ବର୍ତ୍ତମାନ ମାତ୍ର ୩ ଶିକ୍ଷକ ଅଛନ୍ତି। ଇଂଲିଶ, ହିନ୍ଦୀ, ଗଣିତ, ସୋସିଆଲ ସାଇନ୍ସ ଇତ୍ୟାଦି ପ୍ରମୁଖ ବିଷୟରେ ପାଠପଢ଼ା ହୋଇ ପାରୁନି। ୬ ଅଣଶିକ୍ଷକ ପଦବୀ ଖାଲି ପଡ଼ିଛି। ଶିକ୍ଷକଙ୍କ ଅଭାବରେ ପିଲାଙ୍କ ପାଠପଢ଼ା କେମିତି ହେବ ଏବଂ ଏଭଳି ଦୁରବସ୍ଥା ଆହୁରି କେତେ ଦିନ ଯାଏ ଲାଗି ରହିବ ସେନେଇ ଅଭିଭାବକମାନେ ଚିନ୍ତାରେ ରହିଛନ୍ତି। ପ୍ରାୟ ୫୦୦ ଛାତ୍ରୀଛାତ୍ରଙ୍କ ଭବିଷ୍ୟତ ଗଢିବା ଦାୟିତ୍ୱ ରଖୁଥିବା ଏହି କେନ୍ଦ୍ରୀୟ ବିଦ୍ୟାଳୟ ପ୍ରତି ଅବହେଳା କେନ୍ଦ୍ର ସରକାରଙ୍କ ଶିକ୍ଷାପ୍ରତି ରହିଥିବା ଆନ୍ତରିକତା କେତେ ତାହା ଜଳଜଳ ଦିଶୁଛି। ଏ ସଂକ୍ରାନ୍ତରେ କେନ୍ଦ୍ରୀୟ ବିଦ୍ୟାଳୟର ଅଧ୍ୟକ୍ଷ ସିଦ୍ଧାର୍ଥ ଚନ୍ଦନ ପଟ୍ଟନାୟକଙ୍କୁ ପଚାରିବାରେ ସେ କହିଛନ୍ତି, ସାରା ଦେଶରେ ଶିକ୍ଷକ ବଦଳି ହୋଇଛି। ତେବେ ଏଠାକୁ ଶିକ୍ଷକଙ୍କ ନିଯୁକ୍ତି ନେଇ ବିଭାଗସ୍ତରରେ ଯୋଜନା ଚାଲିଛି।
