ନୂଆଦିଲ୍ଲୀ,୯।୫: ଭାରତରେ କରୋନା ଥମିବାର ନାଁ ଧରୁନି। ବିଶେଷଜ୍ଞଙ୍କ ଅନୁସାରେ ସଂକ୍ରମଣ ଶୀର୍ଷ ଛୁଇଁବା ପରେ କମିବ। ଏଥିପାଇଁ ଆଉ କିଛି ସପ୍ତାହ ସମୟ ଲାଗିବ ବୋଲି ଭାରତୀୟ ମେଡିକାଲ ରିସର୍ଚ୍ଚ ପରିଷଦ(ଆଇସିଏମ୍ଆର୍) ପକ୍ଷରୁ ମଧ୍ୟ ସତର୍କ ସୂଚନା ଦିଆଯାଇଛି। କରୋନା ସଂକ୍ରମଣ ଯୋଗୁ ଦେଶର ଦିଲ୍ଲୀ, ମହାରାଷ୍ଟ୍ର, ତାମିଲନାଡୁ, ଉତ୍ତରପ୍ରଦେଶ, ରାଜସ୍ଥାନ, ମଧ୍ୟପ୍ରଦେଶ, ଗୁଜରାଟ ଆଦି ୭ ରାଜ୍ୟ ହଟସ୍ପଟ୍ ପାଲଟିଛନ୍ତି। ଏସବୁ ରାଜ୍ୟଗୁଡ଼ିକର ଦେଶର ଜିଡିପିରେ ମୋଟ ୬୨ ପ୍ରତିଶତ ଯୋଗଦାନ ରହିଛି। ସେଥିମଧ୍ୟରୁ ଦିଲ୍ଲୀର ୧୦.୯, ମହାରାଷ୍ଟ୍ରର ୧୦.୪, ତାମିଲନାଡୁର ୯.୪, ଉତ୍ତରପ୍ରଦେଶର ୮.୪, ରାଜସ୍ଥାନର ୮.୨, ମଧ୍ୟପ୍ରଦେଶର ୭.୫ ଏବଂ ଗୁଜରାଟର ୭.୨ ପ୍ରତିଶତ ଯୋଗଦାନ ଅଛି। ଏସବୁ ରାଜ୍ୟଗୁଡ଼ିକର ପରିସୀମା ଭାରତର ୪୭ ପ୍ରତିଶତ ଏବଂ ଏଠାରେ ଦେଶର ମୋଟ ଜନସଂଖ୍ୟାର ୫୦ ପ୍ରତିଶତ ବାସ କରନ୍ତି। ପ୍ରଥମ ଲକ୍ଡାଉନ୍ ସମୟରେ ଏସବୁ ରାଜ୍ୟରେ କରୋନା ସଂକ୍ରମିତଙ୍କ ସଂଖ୍ୟା ୪୯ ପ୍ରତିଶତ ଥିବାବେଳେ ଏବେ ଏହା ୮୨ ପ୍ରତିଶତକୁ ବୃଦ୍ଧି ପାଇଛି। ଦେଶର ମୋଟ ସଂକ୍ରମିତଙ୍କ ସଂଖ୍ୟାର ୪୪ ପ୍ରତିଶତ ଦୁଇ ପଶ୍ଚିମ ରାଜ୍ୟ ମହାରାଷ୍ଟ୍ର ଏବଂ ଗୁଜରାଟରେ ଅଛନ୍ତି। ସେହିପରି କରୋନ ସଂକ୍ରମିତଙ୍କ ମୋଟ ମୃତ୍ୟୁ ସଂଖ୍ୟାର ୬୦ ପ୍ରତିଶତ କେବଳ ଏହି ଦୁଇ ରାଜ୍ୟରେ ହୋଇଛି। ଲକ୍ଡାଉନ୍ ଯୋଗୁ ମହାରାଷ୍ଟ୍ର, ତାମିଲନାଡୁ, ଉତ୍ତରପ୍ରଦେଶ, ଗୁଜରାଟ ଆଦି ୪ ବଡ଼ ରାଜ୍ୟର ଅର୍ଥବ୍ୟବସ୍ଥା ଦୋହଲି ଯାଇଥିବା କୁହାଯାଉଛି।
