ନୂଆଦିଲ୍ଲୀ,୫-୮: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶର ଅର୍ଥନୀତିକୁ ୫ ଲକ୍ଷ କୋଟି ଡଲାରରେ ପହଞ୍ଚାଇବାକୁ ଲକ୍ଷ୍ୟ ଧାର୍ଯ୍ୟ କରିଛନ୍ତି। ତେବେ ଏଥିପାଇଁ କ୍ରମାଗତ ୯ ପ୍ରତିଶତ ହାରରେ ବାର୍ଷିକ ଅଭିବୃଦ୍ଧି ଆବଶ୍ୟକ ହେବ। ଏଥିସହିତ ନିବେଶର ମୋଟ ହାରକୁ ଜିଡିପିର ୩୮ ପ୍ରତିିଶତରେ ପହଞ୍ଚାଇବାକୁ ପଡିବ ବୋଲି ୟର୍ନେଷ୍ଟ ଆଣ୍ଡ ୟଙ୍ଗ(ଇ ଆଣ୍ଡ ଓ୍ବାଇ) ପକ୍ଷରୁ ପ୍ରକାଶିତ ଏକ ରିପୋର୍ଟରେ କୁହାଯାଇଛି।
ଇ ଆଣ୍ଡ ଓ୍ବାଇର ‘ଇକୋନୋମୀ ଓ୍ବ୍ାଚ୍’ ରିପୋର୍ଟରେ କୁହାଯାଇଛି ଯେ, ୨୦୨୦ ମାର୍ଚ୍ଚ ୩୧ ସୁଦ୍ଧା ଶେଷ ହେଉଥିବା ଆର୍ଥିକ ବର୍ଷରେ ଭାରତର ଅର୍ଥନୀତି ଯଦି ୭ ପ୍ରତିଶତ ଅଭିବୃଦ୍ଧି ହାସଲ କରେ, ତେବେ ଦେଶର ଅର୍ଥନୀତିର ଆକାର ୨.୭ ଲକ୍ଷ କୋଟି ଡଲାରରୁ ବୃଦ୍ଧି ପାଇ ୩ ଲକ୍ଷ କୋଟି ଡଲାରରେ ପହଞ୍ଚତ୍ୟିବ। ରିପୋର୍ଟରେ କୁହାଯାଇଛି ଯେ, ଭାରତର ଆର୍ଥିକ ଅଭିବୃଦ୍ଧି ହାର କ୍ରମାଗତ ୫ ବର୍ଷ ଧରି ୯ ପ୍ରତିଶତ ହାରରେ ବଢ଼େ, ତେବେ ୨୦୨୦-୨୧ରେ ଏହାର ଆକାର ୩.୩ ଲକ୍ଷ କୋଟି ଡଲାର, ୨୦୨୧-୨୨ରେ ଏହା ୩.୬ ଲକ୍ଷ କୋଟି ଡଲାର, ୨୦୨୨-୨୩ରେ ୪.୧ ଲକ୍ଷ କୋଟି ଡଲାର, ୨୦୨୩-୨୪ରେ ୪.୫ ଲକ୍ଷ କୋଟି ଡଲାର ଏବଂ ୨୦୨୪-୨୫ରେ ୫ ଲକ୍ଷ କୋଟି ଡଲାର ହୋଇଯିବ। ଏଥିପାଇଁ ୨୦୨୪-୨୫ ପର୍ଯ୍ୟନ୍ତ ମୁଦ୍ରାସ୍ଫୀତି ହାର ୪ ପ୍ରତିଶତ ରହିବାକୁ ହେବ। ରିପୋର୍ଟରେ କୁହାଯାଇଛି ଯେ, ୨୦୨୦-୨୧ରେ ଅଭିବୃଦ୍ଧି ହାରକୁ ୯%ରେ ପହଞ୍ଚାଇବାକୁ ହେଲେ ନିବେଶ ହାରକୁ ମୋଟ ଘରୋଇ ଉତ୍ପାଦନ(ଜିଡିପି)ର ୩୮ ପ୍ରତିଶତରେ ପହଞ୍ଚାଇବାକୁ ହେବ, ଯାହା କି ୨୦୧୮-୧୯ରେ ୩୧.୩ ପ୍ରତିଶତ ରହିଥିଲା। ଆର୍ଥିକ ବର୍ଷ ୨୦୧୮-୧୯ରେ ୩୧.୩ ପ୍ରତିଶତ ନିବେଶ ହାର ରହିଥିବା ବେଳେ ବାସ୍ତବିକ ବିକାଶ ହାର ୬.୮ ପ୍ରତିଶତ ରହିଥିଲା। ସୂଚନାଥାଉ କି, ଭାରତରେ ଏଥିପୂର୍ବରୁ ୨୦୧୧-୧୨ରେ ସର୍ବାଧିକ ନିବେଶ ହାର ୩୯.୬ ପ୍ରତିଶତ ରହିଥିଲା।
