ସୋହେଲା,୧୭ା୫(ଡି.ଏନ୍.ଏ): ବରଗଡ଼ ଜିଲା ସୋହେଲା ବ୍ଲକ ଅଧୀନ ଲୁହୁରାଚଟିରେ ଥିବାର ପମ୍ପ ହାଉସ ଆଏଜ୍କେ ୫ ବଛର ହେଲା ଅଚଲ ହେଇ ପଡ଼ିଛେ। ଯେନ୍ଥିରଲାଗି ଗଁାବାସୀ ପିଇଲା ପାଏନ୍ ପାଏବାରୁ ବଁଚିତ ହେବାର ସଂଗେ ନାନା ଅସବିଧାର ସାମନା କରୁଛନ୍।
ସୂଚନା ହିସାବେ ଅନେକ ବଛର ତଲେ ଗ୍ରାମ୍ୟ ଜଳଯୋଗାଣ ଓ ପରିମଳ ସଂସ୍ଥା ତରଫୁ ଲୁହୁରାଚଟି ସାପ୍ତାହିକ ବଜାର ପାସେ ଗୁଟେ ଗଭୀର ନଲ୍ଚୁଅଁା କୁଡ଼ି ପମ୍ପ ହାଉସ ଥାପନ କରିଥିଲା। ଇ ପମ୍ପ ହାଉସରୁ ଲୁହୁରାଚଟି ବସ୍ତି, ଜାତୀୟ ରାଜପଥ ତରେ ଥିବାର ମେହେରପଡ଼ା ଆର ୨ କି.ମି. ଦୂରେ ଥିବାର ପଣ୍ଡକିପାଲି ଗଁାକେ ପିଇଲା ପାଏନ୍ ଯୁଗେଇ ଦିଆଯାଉଥିଲା। ପାଇପ୍ ପାଏନ୍କେ ଲୋକ୍ ପିଇବା ଖାଏବାରେ ବେଭାର କରୁଥିଲେ। ପମ୍ପ ହାଉସରୁ ଜାତୀୟ ରାଜପଥ ପାଖାପାଖି ୨୫ ମିଟର ଦୂରେ ରହିଛେ। ବଛର କେତେଟା ତଲେ ଲୁହୁରାଚଟିରୁ ସମ୍ବଲପୁର ୬ ନମ୍ବର ଜାତୀୟ ରାଜପଥ ଉସାରପିସାର କାମ୍ ହେଇଥିଲା। ରାସ୍ତା କୁଡ଼ାକୁଡ଼ି ବେଲେ ବିଛାଯାଇଥିବାର ପ୍ରକଳ୍ପର ପାଏନ୍ ପାଇପ୍ ଫାଟି କୁରକୁଟି ହେଇଯାଇଥିଲା। ରାସ୍ତା କାମ୍ କରୁଥିବାର ଠିକା ସଂସ୍ଥା ସେ ପାଇପ୍ ଲାଇନ୍କେ ମରାମତି ନାଇଁ କଲା। ସେଦିନ୍ଠାନୁ ଇ ଗଁାମାନକେ ପାଏନ୍ ସପ୍ଲାଏ ବଁଦ୍ ହେଇଗଲା। ଏହେଦେ ପମ୍ପ ହାସ୍ ବି ଅସ୍କୁରା ହେଇ ପଡ଼ିଛେ। ପାଏନ୍ ସପ୍ଲାଏ ହେଉଥିବାର ଗଁାର ଲୋକ୍ମାନେ ଇ ମୁଡ଼ଫଟା ଖରା ଝାଉରେ ପିଇଲା ପାଏନ୍ ଲାଗି ନାନା ସମସିଆର ସାମନା କରୁଥିବାର ଅଭିଯୋଗ କରିଛନ୍। ଯେତେ ଜଲଦି ହେବା ପାଇପ୍ ଲାଇନ୍ ଠିକ୍ କରବାର ସଂଗେ ପମ୍ପ ହାଉସକେ ବି ସଚଲ କରବାକେ ଦାବି କରିଛନ୍। ଇ ବାବ୍ଦେ ଆର୍ଡବ୍ଲୁଏସ୍ଏସ୍ କନିଷ୍ଠ ଯନ୍ତ୍ରୀ ସୁରେନ୍ଦ୍ର ବେହେରାକୁ ପଚରାଲାରୁ ଜାତୀୟ ରାଜପଥ ଉସାର କାମ୍ ହେଲାବେଲେ ଲୁହୁରାଚଟିରୁ ମେହେରପଡ଼ାକେ ଯାଇଥିବାର ପାଇପ୍ ଲାଇନ୍ ଫାଟି କୁରକୁଟି ହେଇଗଲା। ଆମେ ବିଭାଗ ତରଫୁ ରାସ୍ତା କାମ୍ କରୁଥିବାର ଠିକା ସଂସ୍ଥାକେ ଚିଠି ଦେଇ ମରାମତି କରବାକେ ଅନୁରୋଧ କରିଥିଲୁଁ। ଏଷ୍ଟିମେଟ ବି ଦେଇଥିଲୁଁ। ହେଲେ ଠିକା ସଂସ୍ଥା ମରାମତି କି ମରାମତି ଲାଗି ବିଭାଗରେ ଟଁକା ଜମା ନାଇଁକଲା। ଯେନ୍ଥିରଲାଗି ପମ୍ପ ହାଉସଟା ଅଚଲ ହେଇପଡ଼ିଛେ ବଲି ସେ କହିଥିଲେ। ସେନ୍ତା ଇ ବାବ୍ଦେ ଗଁାର ଝନେ ମହିଲା ଯଶୋବନ୍ତୀ ଭୋଇକୁଁ ପଚରାଲାରୁ ପାଇପ୍ ଲାଇନ୍ ଫାଟଲା ଦିନୁ ଆମେ ସପ୍ଲାଏ ପାଏନ୍ ନାଇଁ ପାଏବାର। ଅନେକ ଥର ଅଫିସରମାନକୁ କହିଛୁଁ, ହେଲେ କେହି କିଛି ନାଇଁ ଶୁନବାର। ଇ ସପ୍ଲାଏ ପାଏନ୍ରେ ଭାତ୍ ତୁନ୍ ରଁଧାବଢ଼ା ଭଲ ହେସି। ଏହେଦେ ଦୂରିନୁ ପାଏନ୍ ଆନି ରଁଧାବଢ଼ା କାମ୍ ଚଲଉଛୁଁ। ଅନେକ ଦିନୁ ଆମେ ପ୍ରକଳ୍ପ ସଚଲ କରି ଗଁାମାନକୁ ପାଏନ୍ ଯୁଗେଇ ଦେବାକେ ଦାବି କରିଆସୁଛୁଁ ବଲି ସେ କହିଥିଲେ।
