ପରଜଙ୍ଗ, ୨୯।୪(ଡି.ଏନ.ଏ.) ଢେଙ୍କାନାଳ ଜିଲା ପରଜଙ୍ଗ ଦେଇ ଯାଇଥିବା ୫୩ନଂ. ଜାତୀୟ ରାଜପଥ ସମ୍ପ୍ରସାରଣ କାର୍ଯ୍ୟରେ ବ୍ୟବହୃତ ପାଉଁଶଗୁଣ୍ଡ ଚିନ୍ତା ବଢ଼ାଇଛି। ରାସ୍ତା ନିର୍ମାଣକାରୀ ସଂସ୍ଥା ଆଇନକୁ ମାଡ଼ିମକଚି କାମ କରୁଥିବାବେଳେ ଉଡୁଥିବା ବିଷାକ୍ତ ପାଉଁଶରେ ଅଣନିଃଶ୍ୱାସୀ ହୋଇଗଲେଣି ଜନସାଧାରଣ। ପ୍ରଶାସନ ପକ୍ଷରୁ ଏହାର ପ୍ରତିକାର କରାଯାଉ ନ ଥିବାରୁ ପ୍ରଭାବିତ ଅଞ୍ଚଳବାସୀ ଏବଂ ବ୍ୟବସାୟୀମାନେ ଆନ୍ଦୋଳନକୁ ଓହ୍ଲାଇବାକୁ ସଜବାଜ ହେଉଛନ୍ତି।
କୁନାଲ ଷ୍ଟ୍ରକ୍ଚର ପ୍ରାଇଭେଟ ଲିମିଟେଡ୍ ୫୩ନଂ. ଜାତୀୟ ରାଜପଥ ସମ୍ପ୍ରସାରଣ କାର୍ଯ୍ୟ କରୁଛି। ପାଉଁଶ ପରିବହନ ଲାଗି ମୁଖ୍ୟତଃ ହାଇଓ୍ବା ବ୍ୟବହାର କରାଯାଉଛି। ପାଉଁଶ ଗୁଣ୍ଡ ପରିବହନ ବେଳେ ଅଧିକାଂଶ ଗାଡ଼ିରେ ପାଲ ବନ୍ଧାଯାଉନାହିଁ। ସାମାନ୍ୟ ପବନରେ ପାଉଁଶ ଗୁଣ୍ଡ ଉଡ଼ି ଯାତାୟାତରେ ସମସ୍ୟା ସୃଷ୍ଟି କରୁଛି। ଏଥିରେ ବିଶେଷ ଭାବେ ପ୍ରଭାବିତ ହେଉଛନ୍ତି ଯାତ୍ରୀ ଏବଂ ବାଇକ୍ ଆରୋହୀ। ସେହିପରି ବଜାର ମଧ୍ୟରେ ପାଉଁଶ ପଡୁଥିବାରୁ ବ୍ୟବସାୟୀମାନେ ବେପାର କରିପାରୁନାହାନ୍ତି। ବାରମ୍ବାର ଅଭିଯୋଗ ସତ୍ତ୍ୱେ ବଜାର ରାସ୍ତାରେ ପାଣି ସିଞ୍ଚନ କରାଯାଉନାହିଁ।
ରାସ୍ତା କାର୍ଯ୍ୟରେ ନିୟୋଜିତ ଅସାଧୁ କର୍ମଚାରୀଙ୍କୁ ହାତକରି କେତେଜଣ ହାଇୱା ଚାଳକ ଡିଜେଲ ବଞ୍ଚାଇବା ଉଦ୍ଦେଶ୍ୟରେ ଠିକଣା ସ୍ଥାନରେ ପାଉଁଶ ନ ପକାଇ ଅନ୍ୟ ସ୍ଥାନରେ ଅନ୍ଲୋଡ୍ କରୁଛନ୍ତି। ଡିହଡୋଳ-ମହାବିରୋଡ଼ ପୂର୍ତ୍ତ ବିଭାଗ ରାସ୍ତା ପାର୍ଶ୍ୱରେ ପାଉଁଶ ଗଦା କରାଯାଉଛି। କନ୍ତୋର ଗ୍ରାମ ନିକଟ ରେଙ୍ଗାଲି ବାମ କେନାଲ ହୁଡ଼ାରେ ବ୍ୟାପକ ପରିମାଣରେ ପାଉଁଶ ଜମା ହୋଇରହିଛି। ବର୍ଷା ହେଲେ ଉକ୍ତ ପାଉଁଶ କେନାଲରେ ପଶି ପାଣିକୁ ବିଷାକ୍ତ କରୁଛି। ଏଥିସହ କେନାଲ ପୋତି ହୋଇଯିବା ଆଶଙ୍କା ସୃଷ୍ଟି ହୋଇଛି। ଉଡ଼ନ୍ତା ପାଉଁଶ ଜନଜୀବନକୁ ଅତିଷ୍ଠ କରି ରଖିଥିବାବେଳେ ଏହାକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ କରିଛି ବ୍ୟବସାୟୀ ସଂଘ। ପାଉଁଶ ପରିବହନ ବେଳେ ପାଣି ସିଞ୍ଚନ ନ କଲେ କିମ୍ବା ହାଇଓ୍ବାରେ ପାଲ ନ ବାନ୍ଧିଲେ ଗାଡ଼ି ଛଡ଼ାଯିବନାହିଁ ବୋଲି ବ୍ୟବସାୟୀମାନେ ଚେତାବନୀ ଦେଇଛନ୍ତି।
ଏ ନେଇ ଜଣେ ହାଇଓ୍ବା ଚାଳକ ନାମ ଗୋପନ ରଖି କୁହନ୍ତି, ନିର୍ଦ୍ଧାରିତ ସ୍ଥାନ ପରିବର୍ତ୍ତେ ନିକଟତମ ସ୍ଥାନରେ ପାଉଁଶ ପକାଇଲେ ତେଲ ଖର୍ଚ୍ଚ ବଞ୍ଚତ୍ୟାଉଛି। ଏଥିପାଇଁ ସୁପରଭାଇଜରଙ୍କୁ ଅର୍ଥ ଦେବାକୁ ପଡୁଛି। ବିଳମ୍ବ ହେବା ଆଶଙ୍କା ଥିବାରୁ ପାଲ ବାନ୍ଧୁ ନ ଥିବା ସେ କହିଛନ୍ତି। ବିଭାଗୀୟ ସହକାରୀ ନିର୍ବାହୀ ଯନ୍ତ୍ରୀ ତ୍ରିଲୋଚନ ମଲ୍ଲିକ କୁହନ୍ତି, କେନାଲ ପାର୍ଶ୍ୱରେ ପାଉଁଶ ଢଳାଯାଉଥିବା ସମ୍ପର୍କରେ କୌଣସି ସୂଚନା ନାହିଁ। କ୍ଷେତ୍ର ପରିଦର୍ଶନ କରି ପଦକ୍ଷେପ ନିଆଯିବ ବୋଲି ସେ କହିଛନ୍ତି।
