ନୂଆଦିଲ୍ଲୀ,୨୧-୧: ସରକାର ୩ ରାଷ୍ଟ୍ରାୟତ୍ତ ବ୍ୟାଙ୍କରେ ନୂଆ ପରିଚାଳନା ନିର୍ଦ୍ଦେଶକ(ଏମ୍ଡି) ତଥା ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) ନିଯୁକ୍ତ ହୋଇଛନ୍ତି। ଏହି ବ୍ୟାଙ୍କଗୁଡିକ ମଧ୍ୟରେ ବ୍ୟାଙ୍କ ଅଫ ବରୋଦା (ବିଓବି), ବ୍ୟାଙ୍କ ଅଫ୍ ଇଣ୍ଡିଆ (ବିଓଆଇ)ଏବଂ କାନାରା ବ୍ୟାଙ୍କ ରହିଛି। ବିଓଆଇ ନୂଆ ସିଇଓ ଭାବେ ଓଡିଆ ଅଧିକାରୀ ଅତନୁ କୁମାର ଦାସ ଅବସ୍ଥାପିତ ହୋଇଛନ୍ତି। ସେ ବିଓଆଇର କାର୍ଯ୍ୟନିର୍ବାହୀ ନିର୍ଦ୍ଦେଶକ(ଇଡି) ଭାବେ ଏବେ କାର୍ଯ୍ୟରତ ଅଛନ୍ତି। ତାଙ୍କୁ ୩ ବର୍ଷ ଲାଗି ସିଇଓ ପଦବୀରେ ନିଯୁକ୍ତି ମିଳିଛି। ଜୁନ ୩୦ ପରଠାରୁ ଏହି ପଦବୀ ଖାଲି ପଡିଥିଲା। ସେହିଭଳି ବିଓବିର ନୂଆ ସିଇଓ ଭାବେ ସଞ୍ଜୀବ ଚଢା ନିଯୁକ୍ତ ହୋଇଛନ୍ତି। ତାଙ୍କୁ ମଧ୍ୟ ୩ ବର୍ଷ ଲାଗି ନିଯୁକ୍ତି ଦିଆଯାଇଛି। ଏସ୍ବିଆଇ କ୍ୟାପିଟାଲର ଏମ୍ଡି ତଥା ସିଇଓ ଭାବେ ଚଢା ବର୍ତ୍ତମାନ କାର୍ଯ୍ୟ କରୁଥିବା ବେଳେ ବ୍ୟାଙ୍କ ବୋର୍ଡ ବ୍ୟୁରୋ(ବିବିବି) ତାଙ୍କ ନାମକୁ ନୂଆ ପଦବୀ ଲାଗି ସୁପାରିସ କରିଥିଲା। ସେହିଭଳି ବାଙ୍ଗାଲୋର ଭିତ୍ତିକ କାନାରା ବ୍ୟାଙ୍କର ନୂଆ ସିଇଓ ଭାବେ ଏଲ୍.ଭି. ପ୍ରଭାକର ଫେବୃୟାରୀ ପହିଲାରୁ ଦାୟିତ୍ୱ ଗ୍ରହଣ କରିବେ। ସେ ବର୍ତ୍ତମାନ ପଞ୍ଜାବ ନ୍ୟାଶନାଲ ବ୍ୟାଙ୍କ ଇଡି ଭାବେ ଅବସ୍ଥାପିତ ଅଛନ୍ତି। ଅପରପକ୍ଷରେ ଏସ୍ବିଆଇର ନୂଆ ଏମ୍ଡି ଭାବେ ସି.ଏସ୍.ସେଟ୍ଟୀଙ୍କୁ ୩ ବର୍ଷ ଲାଗି ନିଯୁକ୍ତି ଦିଆଯାଇଛି।
