୩ ଜଣଙ୍କୁ ଲକ୍ଷ୍ନୌରୁ ଗିରଫ କଲା ସାଇବର ପୋଲିସ
8:12 amAugust 9, 2022 / 07

ଭୁବନେଶ୍ୱର,(ବ୍ୟୁରୋ)୯ା୮:ରାଜଧାନୀରେ ଦିନକୁ ଦିନ ବଢିବାରେ ଲାଗିଛି ସାଇବର ଠକଙ୍କ ଉତ୍ପାତ । ବାରମ୍ବାର ସଚେତନ ସତ୍ତ୍ୱେ ସହରବାସୀ ଚେତୁ ନାହାନ୍ତି। ବିଭିନ୍ନ ପ୍ରକାର ଲୋଭ ଦେଖାଇ ଲୋକଙ୍କଠାରୁ ଠକି ନେଉଛନ୍ତି ଲକ୍ଷ ଲକ୍ଷ ଟଙ୍କା। ଏବେ କୌନ୍‌ ବନେଗା କୋରଡ ପତି (କେବିସି)ର ଲଟେରୀ ଲୋଭ ଦେଖାଇ ଜଣେ ଯୁବକଙ୍କଠାରୁ ୨ ଲକ୍ଷ ୪୦ ହଜାର ଟଙ୍କା ଠକି ନେଇଛନ୍ତି। ଏଥିରେ ସମ୍ପୃକ୍ତ ୩ ଠକଙ୍କୁ ଲକ୍ଷ୍ନୌରୁ ଗିରଫ କରିଛି ସାଇବର ଓ ଅର୍ଥନୈତିକ ଅପରାଧ ଥାନା ପୋଲିସ। ସେମାନେ ହେଲେ ବିହାରର ଦୀପକ କୁମାର, ଲକ୍ଷ୍ନୌର ମୋହିତ ସିଂହ ଓ ମୋବିନ କୁମାର। ୩ ସାଇବର ଠକଙ୍କୁ ସାଇବର ଥାନା ପୋଲିସ ରବିବାର ଗିରଫ କରିବା ପରେ ଲକ୍ଷ୍ନୌ କୋର୍ଟରେ ହାଜର କରିଥିଲା। ଏହାପରେ ସେମାନଙ୍କୁ ଟ୍ରାଞ୍ଜିଟ ରିମାଣ୍ଡରେ ଆଣି ସୋମବାର ଭୁବନେଶ୍ୱର ପହଞ୍ଚତ୍ଛି। ଏଥିସହ ଗିରଫ ଅଭିଯୁକ୍ତଙ୍କ ଆକାଉଣ୍ଟ ସହ ସେଥିରେ ଥିବାବା ୯୦ ହଜାର ଟଙ୍କାକୁ ଜବତ କରାଯାଇଥିବା ସାଇବର ଥାନା ଅଧିକାରିଣୀ ରଶ୍ମିତା ଜେନା କହିଛନ୍ତି। ଅଭିଯୁକ୍ତ ଦୀପକ କେବିସିର ସ୍ବପ୍ନ ଦେଖାଇ ଲୋକଙ୍କଠାରୁ ୩୦ଟି ଆକାଉଣ୍ଟ ଆଣି ବିହାରର ମୁଖ୍ୟ ଅଭିଯୁକ୍ତ ରତନଙ୍କୁ ଦେଉଥିବା ପୋଲିସ ତଦନ୍ତବେଳେ ଜାଣିବାକୁ ପାଇଛି। ତେଣୁ ମୁଖ୍ୟ ଅଭିଯୁକ୍ତଙ୍କୁ ଧରିବା ଲାଗି ତଦନ୍ତ ଚାଲିଛି। ମଙ୍ଗଳବାର ୩ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯିବ ବୋଲି ସାଇବର ଥାନା ପକ୍ଷରୁ ସୂଚନା ଦିଆଯାଇଛି।
ସୂଚନାନୁସାରେ, କେନ୍ଦ୍ରାପଡା ରାଜକନିକାର ବାବୁରାମ ସାମଲ ଚନ୍ଦ୍ରଶେଖରପୁର ଥାନା ଅଞ୍ଚଳରେ ରହି ଏକ ସିକ୍ୟୁରିଟି ସଂସ୍ଥାରେ କାମ କରନ୍ତି । ୨୬ ଜୁଲାଇରେ ବାବୁରାମଙ୍କ ହ୍ବାଟ୍ସଆପ୍‌କୁ ଏକ ମେସେଜ ଆସିଥିଲା। ଯେଉଁଥିରେ କେବିସିର ୨୫ ଲକ୍ଷ ଟଙ୍କାର ଏକ ଲଟେରି ତାଙ୍କ ନାମରେ ଉଠିଥିବା ଓ ଏକ ନମ୍ବରରେ ଯୋଗାଯୋଗ କରିବାକୁ ଉଲ୍ଲେଖ ଥିଲା। ଏହାପରେ ବାବୁରାମ ଉକ୍ତ ନମ୍ବରକୁ ଫୋନ କରିବାରୁ ଅଭିଯୁକ୍ତ ଠକ ବାବୁରାମଙ୍କୁ ଲଟେରି ଜିତିଛ ବୋଲି କହିଥିଲେ। ଏଥିପାଇଁ ଟାକ୍ସ ବାବଦକୁ ୨ ଲକ୍ଷ ୪୦ ହଜାର ଡିପୋଜିଟ୍‌ କଲେ ତୁବମ ଆକାଉଣ୍ଟକୁ ୨୫ ଲକ୍ଷ ଟଙ୍କା ଟ୍ରାନ୍ସଫର ହେବ। ସାଇବର ଠକ କଥାକୁ ବିଶ୍ୱାସ କରି ବାବୁରାମ ୩ଟି ଆକାଉଣ୍ଟରେ ୨ ଲକ୍ଷ ୪୦ ଟଙ୍କା ଟ୍ରାନ୍ସଫର କରିଥିଲେ। ହେଲେ ଏହାପରେ କୌଣସି ଟଙ୍କା ତାଙ୍କ ଆକାଉଣ୍ଟକୁ ଆସି ନ ଥିଲା। ଏହାପରେ ବାବୁରାମ ଉକ୍ତ ନମ୍ବରରେ ଯୋଗାଯୋଗ କରିବାରୁ ଫୋନ ସୁଇଚ୍‌ ଅଫ୍‌ ଦେଖାଇଲା। ସେ ଠକେଇର ଶିକାର ହେବା ଜାଣିବା ପରେ ଗତ ୫ ତାରିଖରେ ସାଇବର ଥାନାରେ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ସାଇବର ଥାନା ପୋଲିସ ଉକ୍ତ ଆକାଉଣ୍ଟକୁ ଯାଞ୍ଚ କରିବାରୁ ଏହା ଲକ୍ଷ୍ନୌର ବୋଲି ଜାଣିବାକୁ ପାଇଲେ। ତୁରନ୍ତ ସାଇବର ଥାନା ପୋଲିସ ଗତ ୬ ତାରିଖରେ ଲକ୍ଷ୍ନୌ ଯାଇ ୭ ତାରିଖରେ ୩ ଅଭିଯୁକ୍ତଙ୍କୁ ଧରିବାରେ ସଫଳ ହୋଇଥିଲା।