କେନ୍ଦୁଝର,୩୦ା୪(ଡି.ଏନ୍.ଏ): ସଂଗରୋଧ ଅବଧି ଶେଷ କରିବା ପରେ ୩୫ ଜଣ ଶ୍ରମିକଙ୍କୁ ଅନୁଗୁଳ ଜିଲା ପ୍ରଶାସନ ବସ୍ ଯୋଗେ କେନ୍ଦୁଝରକୁ ପଠାଇଛି। ଏହି ଶ୍ରମିକମାନେ ୧୪ ଦିନ ସଂଗରୋଧ ଅବଧି ଶେଷ କରିଥିବା ନେଇ ଅନୁଗୁଳ ଜିଲା ପ୍ରଶାସନ ପ୍ରମାଣପତ୍ର୍ର ପ୍ରଦାନ କରି ସ୍ବତନ୍ତ୍ର ବସ୍ ଯୋଗେ ପଠାଇଛି। ସୂଚନା ଅନୁଯାୟୀ, ଢ଼େଙ୍କାନାଳ ଜିଲା ହିନ୍ଦୋଳଠାରେ ଏକ ନିର୍ମାଣଧିନ ପେଟ୍ରୋଲ ପମ୍ପରେ ଘଟଗଁ। ବ୍ଲକ ଖଣ୍ଟଘର ପଞ୍ଚାୟତ ତଣ୍ଡିବେଡା ଗ୍ରାମର ୧୪ଜଣ ଶ୍ରମିକ କାର୍ଯ୍ୟ କରୁଥିଲେ। କରୋନା ପାଇଁ ସାରା ଦେଶ ଲକ୍ଡାଉନ୍ ହୋଇଯିବାରୁ ଏହି ଶ୍ରମିକମାନେ ଘରକୁ ଫେରି ପାରି ନ ଥିଲେ। ଲକ୍ଡାଉନ ସମୟରେ ଚାଲି ଚାଲି ଘରକୁ ଫେରୁଥିବାବେଳେ ଅନଗୁଳ ଜିଲା ବଅଁରପାଳଠାରେ ପୋଲିସ ସହାୟତାରେ ସେମାନଙ୍କୁ କ୍ୱାରାଣ୍ଟାଇନ ସେଣ୍ଟରରେ ରଖାଯାଇଥିଲା। ସେହିପରି ଭବାନୀପାଟଣାଠାରେ ପାଟଣା ବ୍ଲକ ଡୁମୁରିଆ ପଞ୍ଚାୟତ ପିଛୁଳାବେଡା ଗ୍ରାମର ୧୭ଜଣ ଶ୍ରମିକ ବିଏସ୍ଏନ୍ଏଲ କମ୍ପାନୀରେ କେବୁଲ କାମ କରୁଥିଲେ। ଲକ୍ଡାଉନ୍ ପରେ ଭବାନୀପାଟଣାରୁ ଅନୁଗୁଳକୁ ଏକ ଟ୍ରକ୍ ଯୋଗେ ଆସିଥିଲେ। ସେଠାରୁ ଚାଲି ଚାଲି କେନ୍ଦୁଝର ଅଭିମୁଖେ ଆସୁଥିବାବେଳେ ବଇଣ୍ଡା ନିକଟରେ ପୋଲିସ ସେମାନଙ୍କୁ ଅଟକାଇ ନିକଟସ୍ଥ ଲୁଆମୁଣ୍ଡା କ୍ୱାରାଣ୍ଟାଇନ ସେଣ୍ଟରରେ ରଖିଥିଲା। ତେଲକୋଇ ଅଞ୍ଚଳର ୪ଜଣ ଶ୍ରମିକଙ୍କୁ ପାଲଲହଡା କ୍ୱାରାଣ୍ଟାଇନ ସେଣ୍ଟରରେ ମଧ୍ୟ ରଖାଯାଇଥିଲା। ସମସ୍ତ ଶ୍ରମିକଙ୍କ ସଂଗରୋଧ ଅବଧି ଶେଷ ହେବା ପରେ ଅନୁଗୁଳ ଜିଲା ପ୍ରଶାସନ ସଂଗରୋଧ ଶେଷ କରିଥିବା ମୋଟ ୩୫ ଜଣ ଶ୍ରମିକଙ୍କୁ ବସ୍ ଯୋଗେ କେନ୍ଦୁଝରକୁ ପଠାଇଥିଲେ। ଏହି ଶ୍ରମିକମାନେ ବୁଧବାର ସକାଳେ କେନ୍ଦୁଝରରେ ପହଞ୍ଚିଥିବାବେଳେ କେନ୍ଦୁଝର ଜିଲା ଶ୍ରମ ଅଧିକାରୀ ଅଜୟ କୁମାର ପ୍ରଧାନ,ଗ୍ରାମୀଣ ଶ୍ରମ ନିରୀକ୍ଷକ ବୃନ୍ଦାବନ ଜୁଆଙ୍ଗ,ମୁଖ୍ୟ କିରାଣୀ ଲଳିତେନ୍ଦୁ ମହାନ୍ତ ସେମାନଙ୍କୁୁ ୨ଟି ଗାଡ଼ିରେ ନିଜ ନିଜ ଗଁାକୁ ପଠାଇବାର ବ୍ୟବସ୍ଥା କରିଥିଲେ।
