ମୁମ୍ବାଇ,୨୧ା୪: ମହାରାଷ୍ଟ୍ରର ପାଲ୍ଘର ଅଞ୍ଚଳରେ ଦୁଇଜଣ ସାଧୁ ଓ ସେମାନଙ୍କ ଡ୍ରାଇଭରକୁ କେତେକ ଲୋକ ପିଟି ମାରିଦେବା ଘଟଣାକୁ ନେଇ ସାରା ଦେଶରେ ପ୍ରତିକ୍ରିୟା ପ୍ରକାଶ ପାଇଛି। ଏହି ଘଟଣାରେ ୫ ମୁଖ୍ୟ ଅଭିଯୁକ୍ତଙ୍କ ସମେତ ଶତାଧିକଙ୍କୁ ଗିରଫ କରାଯାଇଥିବାବେଳେ କର୍ତ୍ତବ୍ୟରେ ଅବହେଳା ପାଇଁ ଦୁଇଜଣ ପୋଲିସ ଅଧିକାରୀଙ୍କୁ କାର୍ଯ୍ୟରୁ ନିଲମ୍ବନ କରାଯାଇଛି। ସିଆଇଡି କ୍ରାଇମ୍ର ଏଡିଜି ଅତୁଲଚନ୍ଦ୍ର କୁଲ୍କର୍ନିଙ୍କୁ ମାମଲାର ତଦନ୍ତ ଦାୟିତ୍ୱ ପ୍ରଦାନ କରାଯାଇଛି। ତେବେ ଏହି ଭିଡ଼ହିଂସା ସହ ସାମ୍ପ୍ରଦାୟିକତାର ସମ୍ପର୍କ ନ ଥିବା ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେ କହିଛନ୍ତି। ଏହାକୁ ଯେଉଁମାନେ ସାମ୍ପ୍ରଦାୟିକତାର ରଙ୍ଗ ଦେଉଛନ୍ତି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଉଦ୍ଧବ ସ୍ବରାଷ୍ଟ୍ର ମନ୍ତ୍ରୀ ଅମିତ୍ ଶାହାଙ୍କୁ ଅନୁରୋଧ କରିଛନ୍ତି। ସ୍ବରାଷ୍ଟ୍ର ମନ୍ତ୍ରୀ ଉଦ୍ଧବଙ୍କ ସହ କଥା ହୋଇ ଭିଡ଼ହିଂସାର ତଦନ୍ତ କରିବାକୁ କହିଥିଲେ।
ସ୍ବାମୀ କଳ୍ପବୃକ୍ଷ ଗିରି, ସ୍ବାମୀ ସୁଶୀଲ ଗିରି ଓ ସେମାନଙ୍କ ଡ୍ରାଇଭର ନିଲେଶ ତେଲଗାଡେ ମୁମ୍ବାଇର କାଣ୍ଡିଭାଲିରୁ ଗୁଜରାଟ ଯାଉଥିବାବେଳେ ପାଲ୍ଘର ଜିଲାର ଗଡଚିଞ୍ଚଲେ୍ଠାରେ ସ୍ଥାନୀୟ ଲୋକେ ସେମାନଙ୍କୁ ଚୋର ସନ୍ଦେହ କରି ପିଟି ମାରିଦେଇଥିଲେ। ୧୭ ତାରିଖ ଭୋର ସମୟରେ ସେମାନଙ୍କୁ ହସ୍ପିଟାଲ ନିଆଯାଇଥିଲେ ହେଁ ଡାକ୍ତର ମୃତ ଘୋଷଣା କରିଥିଲେ। ସାଧୁମାନେ ଆଭ୍ୟନ୍ତରୀଣ ରାସ୍ତା ଦେଇ ଗୁଜରାଟ ଯାଉଥିବାବେଳେ ଦାଦ୍ରା ଓ ନଗର ହାବେଲି ସୀମାରେ ପହଞ୍ଚତ୍ୟିବାରୁ କେନ୍ଦ୍ରୀୟ ସୁରକ୍ଷା ବଳ ସେମାନଙ୍କୁ ଫେରାଇ ଦେଇଥିଲେ। ଫେରୁଥିବାବେଳେ ସେମାନେ ଆକ୍ରମଣର ସମ୍ମୁଖୀନ ହୋଇଥିଲେ ବୋଲି ଉଦ୍ଧବ କହିଛନ୍ତି। ୧୬ ତାରିଖର ଏହି ଘଟଣାକୁ ସେ ଦୁର୍ଭାଗ୍ୟଜନକ ବୋଲି କହିବା ସହ ଅପରାଧୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି।
ଗୁରୁବାର ରାତିରେ ଏକ ଅନ୍ତ୍ୟେଷ୍ଟି କ୍ରିୟାରେ ଯୋଗଦେବା ଲାଗି ସୁରଟ ଯାଉଥିବା ୩ ଜଣଙ୍କୁ ପିଟି ମାରିଦେବା ଘଟଣାକୁ ବିଭିନ୍ନ ରାଜନୈତିକ ଦଳ, ସାମାଜିକ କର୍ମୀ ଓ ଧର୍ମୀୟ ସଂଗଠନଗୁଡ଼ିକ ନିନ୍ଦା କରିଛନ୍ତି। ଭାଜପା ଏହାକୁ ରାଜନୈତିକ ରଙ୍ଗ ଦେବାକୁ ଉଦ୍ୟମ କରୁଥିବା ଅଭିଯୋଗ କରି ଘଟଣାର ଉପଯୁକ୍ତ ତଦନ୍ତ ସହ ଅପରାଧୀଙ୍କୁ ଦଣ୍ଡିତ କରିବା ଲାଗି କଂଗ୍ରେସ ମୁଖ୍ୟମନ୍ତ୍ରୀଙ୍କଠାରେ ଦାବି କରିଛି। ଭାଜପାର ଏଭଳି ଉଦ୍ୟମକୁ ସବୁ ଦଳ ଓ ଗଣମାଧ୍ୟମ ବିରୋଧ କରିବାକୁ କଂଗ୍ରେସ ମୁଖପାତ୍ର ରଣଦୀପ୍ ସୁର୍ଜଓ୍ବୋଲା ଆହ୍ବାନ ଦେଇଛନ୍ତି। ପୋଲିସ ସମ୍ମୁଖରେ ଉତ୍ତ୍ୟକ୍ତ ଲୋକେ ଦୁଇ ସାଧୁ ଓ ସେମାନଙ୍କ ଡ୍ରାଇଭରଙ୍କୁ କାର୍ରୁ ଘୋଷାଡ଼ିନେଇ ମାରିଦେଇଥିଲେ। ବିଶ୍ୱ ହିନ୍ଦୁ ପରିଷଦର ଜାତୀୟ ମୁଖପାତ୍ର ଶ୍ରୀରାଜ ନାୟାର ଏହାକୁ ବର୍ବରତା କହିବା ସହ ଘଟଣାର ସିବିଆଇ ତଦନ୍ତ ଦାବି କରିଛନ୍ତି। ଏନ୍ସିପି ନିୟନ୍ତ୍ରଣରେ ଥିବା ଗୃହ ବିଭାଗ ଗୁଣ୍ଡାରାଜରେ ସମ୍ପୃକ୍ତ ବୋଲି ସାମାଜିକ କର୍ମୀ ଅଞ୍ଜଳି ଦାମାନିଆ କହିଛନ୍ତି। ପୂର୍ବରୁ ରାଜ୍ୟ ମନ୍ତ୍ରୀ ଜିତେନ୍ଦ୍ର ଅଓ୍ବଦଙ୍କ ସୁରକ୍ଷା କର୍ମୀଙ୍କୁ ପୋଲିସ ମାଡ଼ ମାରିଥିଲା। ୧୪ ତାରିଖରେ ବାନ୍ଦ୍ରା ମେଟ୍ରୋ ଷ୍ଟେଶନ ନିକଟରେ ଦାଦନ ଶ୍ରମିକ ରୁଣ୍ଡ ହେବା ଘଟଣାରେ ଜଣେ ଖବରଦାତାଙ୍କୁ ଗିରଫ କରଯାଇଥିଲା ବୋଲି ସେ କହିଛନ୍ତି। ଭିଡ଼ହିଂସା ଭିଡିଓରେ ପୋଲିସ ସମେତ କେତେଜଣ ବନ କର୍ମଚାରୀଙ୍କୁ ଦେଖିବାକୁ ମିଳିଛି। ସେମାନେ ହସ୍ତକ୍ଷେପ କରିଥିଲେ ସାଧୁମାନଙ୍କ ଜୀବନ ବଞ୍ଚତ୍ୟାଇଥାନ୍ତା। ତେଣୁ କେବଳ ପୋଲିସକୁ ଦୋଷ ନ ଦେଇ ଘଟଣାର ପୁଙ୍ଖାନୁପୁଙ୍ଖ ତଦନ୍ତ କରିବାକୁ ପୂର୍ବତନ ଆଇପିଏସ୍ ଅଫିସର ଓ୍ବାଇ.ପି. ସିଂ ଦାବି କରିଛନ୍ତି। ଅନ୍ୟପକ୍ଷରେ ମୁମ୍ବାଇ ଭାଜପାର ପୂର୍ବତନ ମୁଖ୍ୟ ଆଶିଷ ଶେଲାର ସ୍ଥାନୀୟ ଏସ୍ପିଙ୍କୁ ଦାୟୀ କରିଛନ୍ତି।
