କପ୍ତିପଦା,୧୨ା୫(ଡି.ଏନ.ଏ)- ସୁରତ ଫେରନ୍ତା ଲିଙ୍କ୍ରେ ମୟୂରଭଞ୍ଜ ଜିଲା କପ୍ତିପଦା ବ୍ଲକ୍ରୁ ୯ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ଏନେଇ ଭୟର ବାତାବରଣ ସୃଷ୍ଟି ହେବା ସହ ୨ ଆକ୍ରାନ୍ତଙ୍କ ଟ୍ରାଭେଲ୍ ହିଷ୍ଟ୍ରିକୁ ନେଇ ଅଞ୍ଚଳବାସୀ ଛାନିଆ ହୋଇ ପଡ଼ିଛନ୍ତି। ଏସଂକ୍ରାନ୍ତରେ ପଦକ୍ଷେପ ଗ୍ରହଣ କରିବାକୁ ସେମାନେ ଜିଲାପାଳଙ୍କ ଉଦ୍ଦେଶ୍ୟରେ ଏକ ଦାବିପତ୍ର କପ୍ତିପଦା ତହସିଲଦାରଙ୍କୁ ପ୍ରଦାନ କରିଛନ୍ତି।
ଚିହ୍ନଟ ହୋଇଥିବା ୯ ଆକ୍ରାନ୍ତଙ୍କ ମଧ୍ୟରୁ ୭ ଜଣ ପିଙ୍ଗୁ ଗ୍ରାମର, ଜଣେ ଜେଏସଜାମୁଡିହା ପଞ୍ଚାୟତ ଅନ୍ତର୍ଗତ ଭଣ୍ଡାରିପାଳ ବାଲିପୋଷି ଗ୍ରାମର ଓ ଅନ୍ୟ ଜଣେ କପ୍ତିପଦା ତେନ୍ତୁଳିସାହିର। ସମସ୍ତଙ୍କୁ କଟକସ୍ଥିତ ଅଶ୍ୱିନୀ କୋଭିଡ୍-୧୯ ହସ୍ପିଟାଲକୁ ଚିକିତ୍ସା ପାଇଁ ପଠାଇ ଦିଆଯାଇଛି। ସେଥି ମଧ୍ୟରୁ ୨ ନମ୍ବର ଆକ୍ରାନ୍ତ ପିଙ୍ଗୁ ଓ ୮ ନମ୍ବର ତେନ୍ତୁଳିସାହିର। ଆକ୍ରାନ୍ତଙ୍କ ସଂସ୍ପର୍ଶରେ ଜଣେ ଘରୋଇ କାର ଡ୍ରାଇଭର ଓ କପ୍ତିପଦା କଲେଜ କ୍ୱାରାଣ୍ଟାଇନ୍ ସେଣ୍ଟରର ଜଣେ ସଫେଇ କର୍ମଚାରୀ ଆସି ଥିବାରୁ ସେମାନଙ୍କ ଟ୍ରାଭେଲ ହିଷ୍ଟ୍ରିକୁ ନେଇ ଅଞ୍ଚଳବାସୀ ନାନା ଆଶଙ୍କାରେ ଦିନ କାଟୁଛନ୍ତି।୨ ନମ୍ବର ଆକ୍ରାନ୍ତ ଜଣକ ପିଙ୍ଗୁ ପଞ୍ଚାୟତର। ସେ ୪ ତାରିଖରେ କପ୍ତିପଦା କ୍ୱାରାଣ୍ଟାଇନ୍ ସେଣ୍ଟରଠାରେ ଓହ୍ଲାଇବା ପରେ ପ୍ରଶାସନର ଗାଡ଼ିରେ ନ ଆସି ନିଜ କାରରେ ପରିବାର ଲୋକଙ୍କ ସହିତ ପଞ୍ଚାୟତ କ୍ୱାରାଣ୍ଟାଇନ୍ ସେଣ୍ଟରକୁ ଆସିଥିଲେ। ସେହି ସମୟରେ ସେ କପ୍ତିପଦା, ଉଦଳା ଓ ପିଙ୍ଗୁର ବିଭିନ୍ନ ଜାଗା ବୁଲିବା ସହିତ ବହୁ ଲୋକଙ୍କ ସଂସ୍ପର୍ଶରେ ଆସିଥିବା ଅଞ୍ଚଳବାସୀ ଅଭିଯୋଗପତ୍ରରେ ଦର୍ଶାଇଛନ୍ତି। ପ୍ରଶାସନ ଏଥିପ୍ରତି ଗୁରୁତ୍ୱ ଦେଉ ନ ଥିବାରୁ ଅସନ୍ତୋଷ ଦେଖାଦେଇଛି। ସେହିପରି ଅନ୍ୟ ଜଣେ ଆକ୍ରାନ୍ତ ସୁରଟରୁ ବସ୍ରେ ଆସି ବାଲେଶ୍ୱର ଜିଲା ସୋରରେ ଓହ୍ଲାଇଥିଲେ। ସେଠାରୁ ଏକ ଘରୋଇ କାରରେ କପ୍ତିପଦା ଆସିଥିଲେ। ସେ କ୍ୱାରାଣ୍ଟାଇନ୍ ନିୟମ ନ ମାନି ପରିବାର ଲୋକଙ୍କ ସହ ମିଳାମିଶା କରିବା ସହ କପ୍ତିିପଦା ବଜାରରେ ବୁଲାବୁଲି କରିଥିଲେ। ତେଣୁ ତାଙ୍କ ଟ୍ରାଭେଲ ହିଷ୍ଟ୍ରିକୁ ପ୍ରଶାସନ ଭଲ ଭାବେ ଯାଞ୍ଚ କରିବାକୁ ଦାବିପତ୍ରରେ ଉଲ୍ଲେଖ କରାଯାଇଛି। ଏନେଇ ତହସିଲଦାର ରାଧାରଞ୍ଜନ ଦାସଙ୍କୁ ପଚାରିବାରୁ କାର ଡ୍ରାଇଭରଙ୍କୁ କ୍ୱାରାଣ୍ଟାଇନ୍କୁ ନେଇ ରବିବାର ତାଙ୍କ ସ୍ବାବ ସଂଗ୍ରହ ପରେ ପରୀକ୍ଷା ପାଇଁ ପଠାଯାଇଥିବା ପ୍ରକାଶ କରିଛନ୍ତି।
