ଜଗତ୍ସିଂହପୁର ଅଫିସ, ୨୯ା୧: ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ଜଗତ୍ସିଂହପୁର ଜିଲାର ବିଭିନ୍ନ ଗଁା ଗହଳିରେ ପ୍ରଚାର ଆରମ୍ଭ ହୋଇଗଲାଣି। ପ୍ରାର୍ଥୀମାନେ ଘରକୁ ଘର ବୁଲି ଭୋଟ ଭିକ୍ଷା କଲେଣି। କୋଭିଡ୍ କଟକଣାକୁ ବେଖାତିର କରି କର୍ମୀ ସମ୍ମିଳନୀ ଓ ଭୋଜିର ଆସର ଜମିଲାଣି। ୱାର୍ଡଠାରୁ ଆରମ୍ଭ କରି ଜିଲା ପରିଷଦ ସଭ୍ୟ ପର୍ଯ୍ୟନ୍ତ ପ୍ରତ୍ୟେକେ ନିଜ ସପକ୍ଷରେ ଭୋଟ ଜୁଟାଇବାକୁ ଉଦ୍ୟମ ଜୋରଦାର କରୁଛନ୍ତି। ପ୍ରମୁଖ ରାଜନୈତିକ ଦଳ ବିଜେଡି, କଂଗ୍ରେସ ଓ ଭାଜପା ପକ୍ଷରୁ ଦଳୀୟ କାର୍ଯ୍ୟକ୍ରମକୁ ଅଧିକ କ୍ରିୟାଶୀଳ କରି ଦିଆଯାଇଛି। ବିଶେଷକରି ଜିଲା ପରିଷଦ ସଭ୍ୟ ପ୍ରାର୍ଥୀଙ୍କୁ ଜିତାଇବାକୁ ଦଳ ପକ୍ଷରୁ ସମସ୍ତ ଉଦ୍ୟମ ଚାଲିଛି।
ଜଗତ୍ସିଂହପୁର ଜିଲା ପରିଷଦ ୨ ନଂ.ଜୋନ୍ରେ ବିଜେଡି, କଂଗ୍ରେସ ଏବଂ ଭାଜପା ମଧ୍ୟରେ ତ୍ରିମୁଖୀ ପ୍ରତିଦ୍ୱନ୍ଦ୍ୱିତା ହେବ ବୋଲି ଆଲୋଚନା ଚାଲିଛି। ଏହି ଜୋନର ବିଗତ ୫ଟି ନିର୍ବାଚନ ଫଳାଫଳକୁ ଅନୁଶୀଳନ କଲେ ଜଣାଯାଏ, ପ୍ରଥମେ କଂଗ୍ରେସର ରାଜଲକ୍ଷ୍ମୀ ସାମନ୍ତରାୟ ଜିଲା ପରିଷଦ ସଭ୍ୟା ହୋଇଥିଲେ। କିନ୍ତୁ ପରେ ନିର୍ବାଚନରେ ଲୋକେ ବିଜେଡିର ବାଦଲ ନାୟକଙ୍କୁ ଜିତାଇଥିଲେ। ଏହାର ପରବର୍ତ୍ତୀ ୩ ନିର୍ବାଚନରେ ଯଥାକ୍ରମେ କଂଗ୍ରେସର କୈଳାସ ବେହେରା, ବିଜେଡିର କନକପ୍ରଭା ଲେଙ୍କା ଓ ଗତ ନିର୍ବାଚନରେ ଜଗନ୍ନାଥ ମୁଦୁଲି ଜିତିଥିଲେ।
ଏହି ଜୋନ ଆଳିପିଙ୍ଗଳ, ଯଶୋବନ୍ତପୁର, ତୁମ୍ବାଅଣ୍ଢେଇସାହି, ପଲ୍ଲୀ, ଜଁକୋଟି, ଶାଳଜଙ୍ଗା ଓ ଖଇରଙ୍ଗ ପଞ୍ଚାୟତକୁ ନେଇ ଗଠିତ। ଗତଥର ଏଠାରୁ ବିଜେଡିର ଜଗନ୍ନାଥ ମୁଦୁଲି, କଂଗ୍ରେସ ଲିପକ କୁମାର ସାହୁ ଏବଂ ଭାଜପାରୁ କୁତାମ କିଶୋର ସର୍ଜନସିଂହ ପ୍ରାର୍ଥୀ ହୋଇଥିଲେ। କିନ୍ତୁ କଂଗ୍ରେସକୁ ପରାସ୍ତ କରି ବିଜେଡି ପ୍ରାର୍ଥୀ ବିଜୟୀ ହୋଇଥିଲେ। ଏଥର ବିଜେଡିର କନକ ସ୍ବାଇଁ, କଂଗ୍ରେସର ପ୍ରତିମା ମିଶ୍ର ଓ ଭାଜପାରୁ ପୁଣି ଥରେ କଳ୍ପନା ମହାନ୍ତି ସର୍ଜନସିଂହ ପ୍ରାର୍ଥୀ ହୋଇଛନ୍ତି। କଂଗ୍ରେସ ପ୍ରାର୍ଥୀ ମିଶ୍ର କହିଛନ୍ତି, ବ୍ୟକ୍ତି ସମ୍ପର୍କ ହେଉଛି ତାଙ୍କର ସମ୍ବଳ। ଗତ ୨ଟି ନିର୍ବାଚନରେ ବିଜେଡି ପ୍ରାର୍ଥୀ ଜିତିଥିଲେ ସୁଦ୍ଧା ଲୋକଙ୍କ ସମସ୍ୟା ଦୂର କରିବାରେ ସଫଳ ହୋଇନାହାନ୍ତି। ଏ ନେଇ ଏବେ ତାଙ୍କ ପ୍ରତି ଜନ ସମର୍ଥନ ବଢୁଛି। ଜୋନର ସବୁ ପଞ୍ଚାୟତରେ ସ୍ଥିତି ଭଲ ଥିଲେ ସୁଦ୍ଧା ଶାଳିଜଙ୍ଗା, ଖଇରଙ୍ଗ, ତୁମ୍ବା ଅଣ୍ଢେଇସାହି, ଆଳିପିଙ୍ଗଳ ଆଦି ପଞ୍ଚାୟତରେ ସ୍ଥିତି ଅଧିକ ସୁଦୃଢ ରହିଛି। ତେଣୁ ଏଥର ଜନମତ କଂଗ୍ରେସ ସପକ୍ଷରେ ଯିବ ବୋଲି ଜିଲା ଯୁବ କଂଗ୍ରେସ ସଭାପତି ପ୍ରଶାନ୍ତ ମଲ୍ଲିକ କହିଛନ୍ତି। ସେ କହିଛନ୍ତି, ମିଶ୍ର ପୂର୍ବରୁ ତୁମ୍ବାଅଣ୍ଢେଇସାହି ସମିତି ସଭ୍ୟା ଥିଲେ। ତାଙ୍କ ଶ୍ୱଶୁର ବିଚିତ୍ରାନନ୍ଦ ମିଶ୍ର ମଧ୍ୟ ପୂର୍ବରୁ ସରପଞ୍ଚ ଥିଲେ। ଏସବୁକୁ ଦୃଷ୍ଟିରେ ରଖି ମିଶ୍ରଙ୍କୁ ଏଥର କଂଗ୍ରେସ ପକ୍ଷରୁ ଜିଲା ପରିଷଦ ପ୍ରାର୍ଥୀ କରାଯାଇଛି। ଭାଜପା ପ୍ରାର୍ଥୀ ସର୍ଜନସିଂହ କହିଛନ୍ତି, ଗତ ନିର୍ବାଚନରେ ଭାଜପା ସଙ୍ଗଠନ ସେଭଳି ଆଗେଇ ନ ଥିଲେ ସୁଦ୍ଧା ତାଙ୍କ ଲୋକ ସମ୍ପର୍କ କାରଣରୁ ଦଳ ସପକ୍ଷରେ ପାଖାପାଖି ୭ ହଜାର ଭୋଟ ଯାଇଥିଲା। ଏଥର ସାଙ୍ଗଠନିକ କାର୍ଯ୍ୟ ଅଧିକ କ୍ରିୟାଶୀଳ ହୋଇଛି। ତେଣୁ ଫଳ ନିଶ୍ଚୟ ମିଳିବ। ଯଶୋବନ୍ତପୁର, ତୁମ୍ବା ଅଣ୍ଢେଇସାହି, ପଲ୍ଲୀ, ଶାଳଜଙ୍ଗା ଓ ଖଇରଙ୍ଗ ପଞ୍ଚାୟତରେ ଭାଜପା ସମର୍ଥିତ ସରପଞ୍ଚ ଓ ସମିତି ସଭ୍ୟ ପ୍ରାର୍ଥୀମାନେ ଜବରଦସ୍ତ ଲଢେଇ କରିବେ। ପ୍ରତି ପଞ୍ଚାୟତରେ ବିରୋଧୀଙ୍କ ଗୋଷ୍ଠୀ କନ୍ଦଳର ଫାଇଦା ଭାଜପା ମିଳିବ ବୋଲି ସେ ଆଶାବ୍ୟକ୍ତ କରିଛନ୍ତି। ବିଜେଡି ପ୍ରାର୍ଥୀ ସ୍ବାଇଁ କହିଛନ୍ତି, ମୁଖ୍ୟମନ୍ତ୍ରୀଙ୍କ ଭାବମୂର୍ତ୍ତି, ଉନ୍ନୟନମୂଳକ ଯୋଜନା ଦଳ ସପକ୍ଷରେ ଜନମତ ବୃଦ୍ଧି କରୁଛି। ଗତ ନିର୍ବାଚନ ପରି ଏଥର ମଧ୍ୟ ବିଜେଡି ସପକ୍ଷରେ ଅଧିକ ଭୋଟ ଯିବ ବୋଲି ସ୍ବାଇଁ କହିଛନ୍ତି।
