କଟକ ଅଫିସ, ୩୧ା୧୦: କଟକ ଜିଲା ଖୁଣ୍ଟୁଣୀ ଥାନା ନିକଟରେ ମଙ୍ଗଳବାର ଘଟିଥିବା ୧୮ ଲକ୍ଷ ଟଙ୍କା ଲୁଟ୍ ଘଟାଣର ବୁଧବାର ପର୍ଦ୍ଦାଫାଶ ହୋଇଛି। କୌଣସି ଦୁର୍ବୃତ୍ତ ଏହି ଲୁଟ୍ରେ ସାମିଲ ନାହାନ୍ତି। ଟଙ୍କା ନେଇ ଯାଉଥିବା କର୍ମଚାରୀ ଜଣଙ୍କ ନିଜେ ହିଁ ଲୁଟ୍ ମାଷ୍ଟରମାଇଣ୍ଡ ସାଜି ଏକ ନାଟକ ରଚିଥିବା ପୋଲିସ କହିଛି। ପୋଲିସ ସମ୍ପୃକ୍ତ କମ୍ପାନୀର କର୍ମଚାରୀ ତଥା ଢେଙ୍କାନାଳ ଜିଲା ହରେକୃଷ୍ଣପୁରର ସନ୍ତୋଷ କୁମାର ରାଜଙ୍କୁ ଗିରଫ କରି ବୁଧବାର କୋର୍ଟଚାଲାଣ କରିଛି। ଏ ସମ୍ପର୍କରେ କଟକ ଗ୍ରାମାଞ୍ଚଳ ଏସ୍ପି ରାଧା ବିନୋଦ ପାଣିଗ୍ରାହୀ ବୁଧବାର ତାଙ୍କ କାର୍ଯ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି।
ପାଣିଗ୍ରାହୀଙ୍କ ସୂଚନା ଅନୁଯାୟୀ, ସନ୍ତୋଷ ଏକ ପାନମସଲା କମ୍ପାନୀରେ ଢେଙ୍କାନାଳ-ଅନୁଗୋଳ ଜିଲାର ମାର୍କେଟିଂ ମ୍ୟାନେଜର ଭାବେ କାମ କରନ୍ତି। ମଙ୍ଗଳବାର ସେ ବିଭିନ୍ନ ହୋଲସେଲରଙ୍କଠାରୁ ୧୮ଲକ୍ଷ ଟଙ୍କା ଆଦାୟ କରି ଭୁବନେଶ୍ୱର ମୁଖ୍ୟ କାର୍ଯ୍ୟାଳୟରେ ଡିପୋଜିଟ କରିବାକୁ ଯାଉଥିଲେ। ତେବେ ଖୁଣ୍ଟୁଣୀ ଥାନା ଅଧୀନ ଓମ୍ଫେଡ୍ ପାର୍ଲର ନିକଟରେ ପୂର୍ବାହ୍ନ ସାଢ଼େ ୧୦ଟାରେ ୪ଜଣ ଦୁର୍ବୃତ୍ତ ବାଇକ୍ରେ ଆସି ତାଙ୍କୁ ବନ୍ଧୁକ ଦେଖାଇ ଉକ୍ତ ଟଙ୍କା ଲୁଟ୍ି ନେଇଥିବା ସନ୍ତୋଷ ଅନ୍ୟଜଣଙ୍କ ମୋବାଇଲ୍ ମାଧ୍ୟମରେ ନିଜ ଭାଇଙ୍କୁ ଜଣାଇଥିଲେ। ଏ ନେଇ ସନ୍ତୋଷଙ୍କ ଭାଇ ଢେଙ୍କାନାଳ ସଦର ଥାନାରେ ଜଣାଇଲେ। ପରେ ଉକ୍ତ ଥାନା ପୋଲିସ ଖୁଣ୍ଟୁଣୀ ପୋଲିସକୁ ଘଟଣା ସମ୍ପର୍କରେ ଜଣାଇଥିଲା। ଲୁଟ୍ ହୋଇଥିବା ସ୍ଥାନରୁ ଥାନା ମାତ୍ର ୧ କିମି ଦୂର ହୋଇଥିବାବେଳେ ସନ୍ତୋଷ ଥାନାକୁ ନ ଯାଇ ଭାଇଙ୍କୁ ଜଣାଇବା ନେଇ ପୋଲିସ ମନରେ ସନ୍ଦେହ ସୃଷ୍ଟି କରିଥିଲା। ସେହିପରି ପୋଲିସ ପଚରାଉଚରା କରିବା ସମୟରେ ସନ୍ତୋଷଙ୍କ ବୟାନରେ ତାଳମେଳ ନ ରହିବାରୁ ସନ୍ଦେହ ଦୃଢୀଭୂତ ହୋଇଥିଲା। ତେବେ ପୋଲିସର ପଚରାଉଚରାବେଳେ ସନ୍ତୋଷ ସବୁ ସତ କଥା ମାନିଯାଇଥିଲେ। ପୋଲିସ ସନ୍ତୋଷଙ୍କୁ ନେଇ ତାଙ୍କ ଘରକୁ ଯାଇଥିବାବେଳେ ତାଙ୍କ ବେଡ୍ର ଗଦି ତଳୁ ୧୫ଲକ୍ଷ ୩୦ ହଜାର ଟଙ୍କା ଜବତ କରିଥିଲା। ସେହିପରି ସନ୍ତୋଷ ଅନ୍ୟଜଣଙ୍କୁ ୨ଲକ୍ଷ ୬୬ ହଜାର ଟଙ୍କା ଦେଇଥିଲେ। ପରେ ପୋଲିସ ଉକ୍ତ ବ୍ୟକ୍ତିଙ୍କଠାରୁ ମଧ୍ୟ ଏହି ଟଙ୍କା ଜବତ କରିଛି। ତେବେ ଏହି ଘଟଣାରେ ଅନ୍ୟ କାହାର ସମ୍ପୃକ୍ତି ଅଛି କି ନାହିଁ ପୋଲିସ ତଦନ୍ତ ଜାରି ରଖିଛି।
ଲୁଟ୍ ନାଟକର ପୃଷ୍ଟଭୂମି
ମାସକ ପରେ ସନ୍ତୋଷଙ୍କ ବାହାଘର ପାଇଁ ଦିନଧାର୍ଯ୍ୟ ହୋଇଛି। ତେବେ ଏତେ ପରିମାଣର ଟଙ୍କା ଦେଖି ତାଙ୍କ ମନରେ ଲୋଭ ଜାଗ୍ରତ ହୋଇଥିଲା। ଡିଲରମାନଙ୍କ ଠାରୁ ଆଦାୟ କରିଥିବା ଟଙ୍କାକୁ ସନ୍ତୋଷ ଘରେ ରଖି ଖୁଣ୍ଟୁଣୀ ନିକଟରେ ପହଞ୍ଚିଥିଲେ। ପରେ ଲୁଟ୍ର ନାଟକ ଆରମ୍ଭ କରିଥିଲେ। ରାସ୍ତାରେ ଯାଉଥିବାବେଳେ ଖାଲ ପଡ଼ିବାରୁ ସନ୍ତୋଷ ତାଙ୍କ ଗାଡ଼ିର ବେଗ କମାଇଥିଲେ। ଏହି ସମୟରେ ୪ଜଣ ବ୍ୟକ୍ତି ତାଙ୍କୁ ବନ୍ଧୁକ ଦେଖାଇବା ସହ ଶାର୍ଟ ଟଣାଓଟରା କରି ଉକ୍ତ ଟଙ୍କା ଲୁଟ୍ କରି ନେଇଯାଇଥିବା ସନ୍ତୋଷ ପୋଲିସକୁ ଜଣାଇଥିଲେ। ସେହିପରି ଉକ୍ତ ୪ଜଣ ବ୍ୟକ୍ତି ମୁହଁରେ ରୁମାଲ ବାନ୍ଧିଥିବା ସନ୍ତୋଷ କହିଥିବାବେଳେ ପରବର୍ତ୍ତୀ ସମୟରେ ସେମାନେ ହେଲ୍ମେଟ୍ ପିନ୍ଧିଥିବା ସେ ବୟାନ ଦେଇଥିଲେ। ଲୁଟ୍ ସ୍ଥାନରେ କୌଣସି ଖାଲ ନ ରହିବା ଓ ତାଙ୍କ ବୟାନରେ ତାଳମେଳ ନ ରହିବାରୁ ପୋଲିସର ସନ୍ଦେହ ସନ୍ତୋଷଙ୍କ ଉପରେ ଦୃଢ଼ୀଭୂତ ହୋଇଥିଲା। ପୂର୍ବରୁ ମଧ୍ୟ ଏଭଳି ଅନେକ ଘଟଣାରେ ଲୁଟ୍ ନାଟକ ହୋଇଥିବା ନଜିର ରହିଥିବାରୁ ପୋଲିସ ସନ୍ତୋଷଙ୍କୁ ଅଟକ ରଖି ପଚାରାଉଚରା କରିବାରୁ ସେ ସବୁ ସତକଥା କହିଥିଲେ।
