ଖୋର୍ଦ୍ଧା ଅଫିସ,୩ା୧୨: ଖୋର୍ଦ୍ଧା ଅବକାରୀ ସ୍କ୍ବାଡ୍ ଓ ଜିଲା ମୋବାଇଲ ସ୍କ୍ବାଡ୍ ମିଳିତଭାବେ ସୋମବାର ଖୋର୍ଦ୍ଧାର ୪ ସ୍ଥାନରେ ଚଢ଼ାଉ କରି ୪ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି। ସେମାନେ ହେଲେ ପଶ୍ଚିମବଙ୍ଗ ମାଲଦା ଜିଲା କାଳିଆ ଚୌକ ଥାନା ମୋଜନପୁରର ଏମ.ଡି. କାବତ ଉଲାସ ଏସ୍.କେ.(୧୯), କାଳିଆ ଚୌକଗାଁ ଏମ.ଡି. ଆସିକ୍ ଏସ୍.କେ.(୨୫), ଏମ.ଡି. ସୁରଜ ଏସ୍.କେ.(୨୦), ନୟାଗଡ ଜିଲା ନୂଆଗାଁ ଥାନା ନୂଆଗାଁ ହରିଜନ ସାହିର ଦାଶରଥି ନାୟକ(୨୬)। ଏମାନଙ୍କ ନିକଟରୁ ୧୬କେଜି ଗଞ୍ଜେଇ ଜବତ ହୋଇଛି। ଏହାର ଆନୁମାନିକ ମୂଲ୍ୟ ୮୦ହଜାର ଟଙ୍କା ହେବ ବୋଲି ଜଣାପଡିଛି। ସୂଚନା ଅନୁଯାୟୀ, ଜିଲାପାଳଙ୍କ କାର୍ଯ୍ୟାଳୟଠାରୁ ମୋଜନପୁରର ଏମ.ଡି. କାବତ ଉଲାସ ଏସ୍.କେ.ଙ୍କଠାରୁ ୩ କେଜି, କାଳିଆ ଚୌକ ଗାଁର ଏମ.ଡି. ଆସିକ୍ ଏସ୍.କେ.ଙ୍କଠାରୁ ୫ କେଜି ଓ ଏମ.ଡି. ସୁରଜ ଏସ୍.କେ.ଙ୍କଠାରୁ ୪କେଜି ଗଞ୍ଜେଇ ଜବତ ହୋଇଛି। ସେହିପରି ଖୋର୍ଦ୍ଧା ନୂଆ ବସଷ୍ଟାଣ୍ଡଠାରୁ ନୟାଗଡ ଜିଲା ନୂଆଗାଁର ଦାଶରଥି ନାୟକଙ୍କଠାରୁ ୪କେଜି ଗଞ୍ଜେଇ ଅନୁରୂପ ଭାବେ ଜବତ କରାଯାଇଛି।
