ତୁମୁଡିବନ୍ଧ,୪।୭,(ଦିପକ କୁମାର ପରାସେଠ): ପ୍ରାୟ ୧୧ ଦିନ ହେବ ସିର୍ଲା ପଞ୍ଚାୟତ ଅନ୍ଧାରରେ ରହିଛି। ଏଥିରେ ଅତିଷ୍ଠ ହୋଇ ପଞ୍ଚାୟତ ବାସୀ ବିଦ୍ୟୁତ କାର୍ଯ୍ୟାଳୟ ଘେରାଉ କରିଛନ୍ତି।ଏହି ଘଟଣା କନ୍ଧମାଳ ଜିଲା ତୁମୁଡିବନ୍ଧ ବ୍ଲକ ଆମ୍ବେଦକର ଛକ ସ୍ଥିତ ବିଦ୍ୟୁତ କାର୍ଯ୍ୟାଳୟରେ ଶନିବାର ପୂର୍ବାହ୍ନରେ ଦେଖିବାକୁ ମିଳିଛି। ସୂଚନା ଅନୁସାରେ ସିର୍ଲା ପଞ୍ଚାୟତ ଏଗାର ଗୋଟି ୱାର୍ଡ ଓ କୋଟଗ ବ୍ଲକ ସର୍ତ୍ତୁଲ ପଞ୍ଚାୟତର ଦୁଇ ଗୋଟି ୱାର୍ଡ ଏପରି ୧୩ଟି ୱାର୍ଡ ୧୧ ଦିନ ହେବ ବିଦ୍ୟୁତ ନଥିବାରୁ ଅନ୍ଧାରରେ ରହିଛନ୍ତି ଅଞ୍ଚଳବାସୀ। ବିଦ୍ୟୁତ ନଥିବାରୁ ପିଲା ମାନଙ୍କର ପାଠ ପଢା ପ୍ରଭାବିତ ହୋଇଛି। ମୋବାଇଲ ସ୍ବଚି ଅଫ ହେବାରୁ ଜ୍ୱର ବେମାର କେହି ଯଦି ପୀଡ଼ିତ ହେଲେ ୧୦୮ ଆମ୍ବୁଲାନ୍ସକୁ ଯୋଗା ଯୋଗ କରିବାରେ ମଧ୍ୟ ବିଫଳ ହୋଇଛନ୍ତି। ରାତି ସାରା ଅନ୍ଧାରରେ ରହିବା ବି କଷ୍ଟ ହେଉଛି। ଦୂରରେ ଅବା ବିଦେଶରେ ରହିଥିବା ନିଜ ପରିଜନମାନଙ୍କ ସହିତ ଯୋଗାଯୋଗ ବିଚ୍ଛିନ୍ନ ହେବା ଭଳି ବିଭିନ୍ନ ଅସୁବିଧାର ସମ୍ମୁଖୀନ ହେଉଛନ୍ତି। ହେଲେ ଉକ୍ତ ବାବଦରେ ଗ୍ରାମବାସୀମାନେ ବିଭାଗୀୟ ଅଧିକାରୀଙ୍କୁ ବାରମ୍ବାର ଫୋନରେ ଜଣାଇବା ପାଇଁ ପ୍ରୟାସ କରିଥିଲେ ମଧ୍ୟ ଫୋନ ରିସିଭ କରୁନଥିବା ଅଭିଯୋଗ କରିଛନ୍ତି। ଦୀର୍ଘ ୪ଘଣ୍ଟା କାର୍ଯ୍ୟାଳୟ ଘେରାଉ କରିବା ପରେ ଖବର ପାଇ ତୁମୁଡିବନ୍ଧ ପୋଲିସ ଓ ତହସିଲଦାର ଦୋଳ ଗୋବିନ୍ଦ ସାହୁ ଘଟଣା ସ୍ଥଳରେ ପହଞ୍ଚି ବୁଝାସୁଝା କରିବା ସହିତ ଏକ ପ୍ରତିନିଧି ଦଳ ଗଠନ କରି ତୁମୁଡିବନ୍ଧ ଥାନାକୁ ଯାଇ ସେଠାରେ ବିଭାଗୀୟ ଅଧିକାରୀ,ତହସିଲଦାର ଓ ଥାନା ଅଧିକାରୀ ଆଶୁତୋଷ ଜେନାଙ୍କ ଉପସ୍ଥିତିରେ ଆଲୋଚନା କରି ସ୍ଥାୟୀ ସମାଧାନ କରିବା ଏବଂ ତୁରନ୍ତ ବିଦ୍ୟୁତ ସେବା ଯୋଗାଇ ଦେବା ପାଇଁ ନିଷ୍ପତ୍ତି ନିଆଯିବା ପରେ ଘେରାଉ ହଟିଲା ବୋଲି ସିର୍ଲା ସରପଞ୍ଚ ନୁସୁଙ୍ଗା ମାଝୀ କହିଛନ୍ତି। ଏହି ବାବଦରେ ତୁମୁଡିବନ୍ଧ ବିଦ୍ୟୁତ ବିଭାଗର ଯନ୍ତ୍ରୀ ପ୍ରଭୁ ଦତ୍ତ ସାହୁଙ୍କୁ ପଚାରିବାରୁ ସେ ବର୍ଷା ଯୋଗୁ ବିଦ୍ୟୁତ ବିଭ୍ରାଟ ହୁଏ ବୋଲି କହିଛନ୍ତି। ସେଥିପାଇଁ ଆବଶ୍ୟକ ପଦକ୍ଷେପ ନିଆଯିବ ବୋଲି କହିଛନ୍ତି।
