ବାରିପଦା ଅଫିସ, ୧୫ା୪-ଏବେ କରୋନାକୁ ନେଇ ସାରା ବିଶ୍ୱବାସୀ ଚିନ୍ତିତ। ଏହି ମହାମାରୀ ସଂକ୍ରମଣକୁ ରୋକିବା ପାଇଁ ବିିିଭିନ୍ନ ସ୍ତରରେ ପଦକ୍ଷେପ ନିଆଯାଉଛି। ଏହିଭଳି ଘଡିସନ୍ଧି ମୁହୂର୍ତ୍ତରେ ମୟୂରଭଞ୍ଜ ଜିଲା ବାରିପଦା ସହରର ୨୮ନଂ. ୱାର୍ଡ଼ ବାଗଡିହା ଅଞ୍ଚଳର ଦୁଇ ଭାଇ ସାନିଟାଇଜର ରୁମ୍ ପ୍ରସ୍ତୁତ କରି ଚର୍ଚ୍ଚାକୁ ଆସିଛନ୍ତି। ସେମାନେ କହିଛନ୍ତି ଯେ, ଏହି ରୁମ୍ରେ ଜଣେ ବ୍ୟକ୍ତି ୧୦ସେକେଣ୍ଡ ରହିବା ପରେ ସମୂର୍ଣ୍ଣ ସାନିଟାଇଜ (ବିଶୋଧନ) ହୋଇପାରିବ। ଏହି ଦୁଇ ଭାଇ ହେଲେ ବିଜେନ୍ଦ୍ର କୁମାର ଗିରି ଓ ତାଙ୍କ ସମ୍ପର୍କୀୟ ଭାଇ ସୁରଜ କୁମାର କଅଁର। ଏହି ସାନିଟାଇଜ ରୁମ୍ ପାଇଁ ଖର୍ଚ୍ଚ ହୋଇଛି ମାତ୍ର ୮୬୦୦ ଟଙ୍କା। ଏହି ରୁମ୍ ଦ୍ୱାରା ସଂକ୍ରମଣକୁ ରୋକାଯାଇପାରିବ ବୋଲି ସେମାନେ ଦାବି କରିଛନ୍ତି।
ବିଜେନ୍ଦ୍ର ନେସ୍କୋର ଜଣେ ଲାଇନ୍ମ୍ୟାନ୍ ହୋଇଥିବା ବେଳେ ସୁରୁଜ ଏକ ଘରୋଇ ସଂସ୍ଥାରେ କାର୍ଯ୍ୟ କରୁଛନ୍ତି। ମଧ୍ୟପ୍ରଦେଶରେ ଜଣେ ଯୁବକ ଏପରିି ସାନିଟାଇଜର ସ୍ପ୍ରେ ରୁମ୍ ତିଆରି କରିଥିବା ବିଜେନ୍ଦ୍ର ୩ଦିନ ତଳେ ୟୁଟ୍ୟୁବ୍ରେ ଦେଖି ସୁରଜଙ୍କୁ କହିଥିଲେ। ଓଡ଼ିଶାରେ ଏଭଳି ରୁମ୍ ହେବା ଦରକାର ବୋଲି ଉଭୟେ ଚିନ୍ତା କରିଥିଲେ। ପରେ ଦୁଇ ଭାଇ ମିଶିି ଦୁଇ ଦିନ ମଧ୍ୟରେ ପ୍ରସ୍ତୁତ କରିଥିଲେ ସାନିଟାଇଜର ରୁମ୍। ଏହାର ନାମ ଦିଆଯାଇଛି ‘ଦିଲ୍ ସେ ମୟୂରଭଞ୍ଜିଆ’। ବିଜେନ୍ଦ୍ର କହିଛନ୍ତି ଯେ, ଏଭଳିି ରୁମ୍କୁ କୋଭିଡ଼ ହସ୍ପିଟାଲ କେନ୍ଦ୍ର ନିକଟରେ ରଖାଗଲେ ସେଠାକୁ ଯାଉଥିବା ବ୍ୟକ୍ତିବିଶେଷ ଆସିବା ପରେ ଏହି ରୁମ୍ରେ ପଶି ନିଜକୁ ବିଶୋଧନ କରିପାରିବେ। ବୁଧବାର ଜିଲାର ବାଙ୍କିଶୋଳଠାରେ କୋଭିଡ଼ ହସ୍ପିଟାଲ ଉଦ୍ଘାଟନ ହେବ। ଜିଲା ପ୍ରଶାସନକୁ ଅନୁରୋଧ କରି ପ୍ରାଥମିକ ପର୍ଯ୍ୟାୟରେ ଏହି ରୁମ୍କୁ ସେଠାରେ ରଖିବେ ବୋଲି ବିଜେନ୍ଦ୍ର ପ୍ରକାଶ କରିଛନ୍ତି। ଏହି ସାନିଟାଇଜ ରୁମ୍ ପ୍ରସ୍ତୁତ କରିବା ପାଇଁ ୧୨ଭୋଲଟର ପାଣିମୋଟର, ୟୁପିଏସ୍, ପାଇପ୍, ରୁମ୍ ତିଆରି କରିବା ପାଇଁ ବିଭିନ୍ନ ସରଞ୍ଜାମ ଆବଶ୍ୟକ ପଡ଼ୁଛି। ଦୁଇ ଭାଇ ମିଶି ଏହି ସାନିଟାଇଜର ରୁମ୍ ପ୍ରସ୍ତୁତ କରିଥିବା ଜାଣିବା ପରେ ଜିଲାର ବିଭିନ୍ନ ସ୍ଥାନରୁ ଉଭୟଙ୍କ ନିକଟକୁ ପ୍ରଂଶସାରୁ ସୁଅ ଛୁଟୁଛି।
