ବମ୍ବେ: ବଲିଉଡ୍ର ଭାଇଜାନ୍ ସଲ୍ମାନଙ୍କ ଏକଦା ପ୍ରେମିକା ଥିବା କଟ୍ରିନା କୈଫ୍ ଏବେ ଆଉ ଜଣଙ୍କ ପ୍ରେମରେ। ସେ ଆଉ କେହି ନୁହନ୍ତି, ଅଭିନେତା ବିକ୍କି କୌଶଲ। ବିକ୍କି ଏକଦା ଏକ କାର୍ଯ୍ୟକ୍ରମରେ ସଲ୍ମାନଙ୍କ ସମ୍ମୁଖରେ କଟ୍ରିନାଙ୍କୁ ପସନ୍ଦ କରୁଥିବା କହିଥିଲେ। ଏବେ ଉଭୟଙ୍କ ମଧ୍ୟରେ କୁଆଡ଼େ ମିଳାମିଶା ବଢ଼ିଛି। ଏକାଧିକ ଇଭେଣ୍ଟରେ ଉଭୟ ନଜରକୁ ଆସୁଛନ୍ତି। ଫଳରେ ବିକ୍କି-କଟ୍ରିନା ବଲିଉଡ୍ର ନୂଆ ଲଭ୍ବାର୍ଡ ବୋଲି କୁହାଯାଉଛି।
ହୋଲି ପୂର୍ବରୁ ଶନିବାର ନିଜ ଘରେ ପାର୍ଟିର ଆୟୋଜନ କରିଥିଲେ ମୁକେଶ ଅମ୍ବାନୀଙ୍କ ଝିଅ ଇଶା ଅମ୍ବାନୀ। ଏଥିରେ ବଲିଉଡର ପ୍ରାୟ ସମସ୍ତ କଳାକାର ଯୋଗ ଦେଇଥିଲେ। ଏହି ସମୟର ଏକ ଭିଡିଓ ଭାଇରାଲ ହେଉଛି। ଭିଡିଓରେ କଟ୍ରିନାଙ୍କୁ ବିକ୍କି ରଙ୍ଗ ଲଗାଉଥିବା ଦେଖାଯାଉଛି।
ଉଭୟ ଅଭିନେତାଙ୍କ ଆଗାମୀ ଫିଲ୍ମ ବିଷୟରେ ଯଦି କଥା ହେବା, ତେବେ ବିକ୍କି ସରଦାର ଉଧମ ସିଂ, ତଖ୍ତରେ ନଜରକୁ ଆସିବେ। ସେହିଭଳି କଟ୍ରିନା ସୂର୍ଯ୍ୟବଂଶୀରେ ଅକ୍ଷୟ କୁମାରଙ୍କ ବିପକ୍ଷରେ କାମ କରିଛନ୍ତି। ଖୁବ୍ଶୀଘ୍ର ଏହା ପରଦାକୁ ଆସିବାକୁ ଯାଉଛି।
