ଭୁବନେଶ୍ୱର,୧୭।୩(ବ୍ୟୁରୋ): କରୋନା ପ୍ରଭାବରେ ରାଜ୍ୟର ହୋଟେଲ ଓ ଟ୍ରାଭେଲ ଶିଳ୍ପ ସର୍ବାଧିକ କ୍ଷତିଗସ୍ତ ହୋଇଛି। ପ୍ରଳୟଙ୍କରୀ ବାତ୍ୟା ଫନୀ ପରେ ହୋଟେଲ ଶିଳ୍ପକୁ ଆଉଥରେ ଏକ ବଡ଼ ଝଟ୍କା ଲାଗିଛି। ଇନ୍ବାଉଣ୍ଡ୍ ଟୁରିଷ୍ଟମାନେ ସେମାନଙ୍କ ବୁକିଂ ବାତିଲ କରୁଥିବାରୁ ଏହାର କ୍ଷତି ହୋଟେଲ ଶିଳ୍ପକୁ ମୁଣ୍ଡାଇବାକୁ ପଡ଼ିଛି। ରାଜ୍ୟର ଅଧିକାଂଶ ହୋଟେଲରେ ପୂର୍ବରୁ ହୋଇଥିବା ବଙ୍କେଟ ବୁକିଂ, ବାହାଘର ଏବଂ ବଡ଼ ବଡ଼ ସମ୍ମିଳନୀ ବୁକିଂକୁ ବାତିଲ କରିଦିଆଯାଇଛି। ଏହାକୁ ନଜରରେ ରଖି ଓଡ଼ିଶା ସରକାର ହୋଟେଲ ଶିଳ୍ପକୁ ସହାୟତାର ହାତ ବଢାଇବାକୁ ଦାବି କରିଛି ହୋଟେଲ ଆଣ୍ଡ୍ ରେଷ୍ଟୁରାଣ୍ଟ ଆସୋସିଏଶନ ଅଫ୍ ଓଡ଼ିଶା(ଏଚ୍ଆର୍ଏଓ)।
ସୋମବାର ଅନୁଷ୍ଠିତ ବୈଠକରେ ଏଚ୍ଆର୍ଏଓ ଅଧ୍ୟକ୍ଷ ଜେ.କେ. ମହାନ୍ତି କହିଲେ, ଅଧିକାଂଶ ହୋଟେଲ ମାଲିକ ବ୍ୟାଙ୍କ ଋଣରେ ବୁଡ଼ି ରହିଛନ୍ତି। ବାତ୍ୟା ପରଠାରୁ ଋଣ ପରିଶୋଧ କରିବା କଷ୍ଟକର ହୋଇପଡୁଛି। ଏବେ କରୋନା ଚିନ୍ତା ବଢ଼ାଇଛି। ଏଭଳିସ୍ଥଳେ ରାଜ୍ୟ ସରକାର ପରିସ୍ଥିତି ସ୍ବାଭାବିକ ନ ହେବା ପର୍ଯ୍ୟନ୍ତ ବ୍ୟାଙ୍କ୍ଗୁଡ଼ିକୁ କୋହଳ ନୀତି ଅବଲମ୍ବନ କରିବାକୁ ନିର୍ଦ୍ଦେଶ ଦେବା ଉଚିତ୍। ଏହାବ୍ୟତୀତ ଓଡ଼ିଶା ସରକାର ହୋଟେଲ ଶିଳ୍ପ ଉପରୁ ଏସ୍ଜିଏସ୍ଟି ଉଠାଇ ରାଜ୍ୟର ପର୍ଯ୍ୟଟନ ଓ ହସ୍ପିଟାଲିଟି ଶିଳ୍ପକୁ ସମର୍ଥନ କରିବାକୁ ଆସୋସିଏଶନ ଦାବି ରଖିଛି। ବିଏମ୍ସି ହୋଲ୍ଡିଂ ଟ୍ୟାକ୍ସ, ବାର୍ ଲାଇସେନ୍ସ ଫି, ଗ୍ରାଉଣ୍ଡ୍ ଓ୍ବାଟର ଫି, ଇଲେକ୍ଟ୍ରିସିଟି ଫି ଆଦିକୁ କିଛି ସମୟ ପାଇଁ ଉଠାଇଦେବା ସହ ଆସନ୍ତା ୧ ବର୍ଷ ପର୍ଯ୍ୟନ୍ତ ଟୁରିଜମ୍, ଟ୍ରାଭେଲ ଓ ହସ୍ପିଟାଲିଟି ଶିଳ୍ପରୁ ଜିଏସ୍ଟି ସମ୍ପୂର୍ଣ୍ଣଭାବେ ଉଠାଇବାକୁ ଦାବି କରାଯାଇଛି। କର୍ମଚାରୀଙ୍କୁ ଠିକ୍ ସମୟରେ ଦରମା ଦେବା, ସ୍ବଚ୍ଛତା ଏବଂ ପରିଚ୍ଛନ୍ନତା ବଜାୟ ରଖିବାକୁ ଗୁରୁତ୍ୱ ଦିଆଯାଉଛି। ଏଥିଲାଗି ହୋଟେଲଗୁଡ଼ିକୁ ଅଧିକ ଖର୍ଚ୍ଚ ବୋଝ ମୁଣ୍ଡାଇବାକୁ ପଡ଼ୁଛି। ଗତ ମେ’ ମାସରେ ହୋଇଥିବା ବାତ୍ୟା ଫନୀରେ ହୋଟେଲ ଶିଳ୍ପ ସର୍ବାଧିକ କ୍ଷତିଗସ୍ତ ହୋଇଥିଲା। ହୋଟେଲ ଶିଳ୍ପକୁ ପୁଣିଥରେ ମୁଣ୍ଡଟେକି ଛିଡା କରାଇବାକୁ ଆସୋସିଏଶନ ସରକାରଙ୍କୁ ସହାୟତା ମାଗିଥିଲା। ହେଲେ କୌଣସି ଗୋଟିଏ ବି ହୋଟେଲ ଏବେସୁଦ୍ଧା କ୍ଷତିପୂରଣ ପାଇ ନ ଥିବା ମହାନ୍ତି କହିଛନ୍ତି।
