ନୟାଗଡ଼ ଅଫିସ,୧୦।୭-କିଛି ଦିନ ତଳେ ନୟାଗଡ ଜିଲା ମୁଖ୍ୟ ଚିକିତ୍ସାଳୟର ପଛ ପାର୍ଶ୍ୱରେ ଥିବା ଦିଆନକ ବନ୍ଧ ନାମକ ଏକ ପୋଖରୀ ଉପରେ ଘର ତିଆରି କରାଯାଇ ଚିଲିକା ଫ୍ରେସ୍ ଖୋଲା ହେଲା। ହେଲେ ୨ ବର୍ଷ ତଳେ ଦିଆନକ ବନ୍ଧଠାରେ ଅସ୍ଥାୟୀ ଭାବେ ହେବାକୁ ଥିବା ମାଛପିଣ୍ଡି ବ୍ୟବସ୍ଥା କରାଗଲା ନାହିଁ। ଫଳରେ ରାଜପଥ କଡରେ କଟା ହେଉଛି ମାଛ, ଛେଳି ଓ କୁକୁଡା। ଏ ନେଇ କର୍ତ୍ତୃପକ୍ଷ ଦୃଷ୍ଟି ଦେଉ ନ ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଉଛି।
ଯେ, ସହରର ବିଭିନ୍ନ ସ୍ଥାନରେ ମାଛ , ମାଂସ ବିକ୍ରି କରୁଥିବା ବେପାରୀମାନେ ମାଛ ମାର୍କେଟ କରାଯାଇ ଗୋଟିଏ ସ୍ଥାନରେ ଆମିଷଦ୍ରବ୍ୟ ବିକ୍ରି କରିବା ଲାଗି ଦୁଇ ବର୍ଷ ତଳେ ତତ୍କାଳୀନ ଜିଲାପାଳ ଅରିନ୍ଦମ ଡାକୁଆଙ୍କ ନିକଟରେ ଅଭିଯୋଗ କରିଥିଲେ। ଏହା ପରେ ଏନ୍ଏସି (ବର୍ତ୍ତମାନ ମ୍ୟୁନିସିପାଲିଟି) ପକ୍ଷରୁ ଜିଲା ମୁଖ୍ୟ ଚିକିତ୍ସାଳୟ ପଛପଟେ ଥିବା ଦିଆନକ ବନ୍ଧଠାରେ ଅସ୍ଥାୟୀ ମାଛ ମାର୍କେଟ କରାଯାଇ ପରେ ଏହାକୁ ପ୍ରିୟଦର୍ଶନୀ ମାର୍କେଟକୁ ସ୍ଥାନାନ୍ତର କରାଯିବ ଓ ସେଠାରେ ସ୍ଥାୟୀ ମାଛ ମାର୍କେଟ କରାଯିବ ବୋଲି କୁହାଯାଇଥିଲା। ବେପାରୀମାନେ ଆଉ ରାସ୍ତାକଡ଼ରେ ବିକ୍ରି ନ କରି ଏକାଠି ଗୋଟିଏ ସ୍ଥାନରେ ଆମିଷ ଦ୍ରବ୍ୟ ବିକ୍ରି କରିବେ । ହେଲେ ବର୍ତ୍ତମାନ ସୁଦ୍ଧା କୌଣସି ବ୍ୟବସ୍ଥା ନ କରି ମ୍ୟୁନିସିପାଲିଟି କର୍ତ୍ତୃପକ୍ଷ ହାତ ଟେକି ଦେଇଛନ୍ତି। ଫଳରେ ଯିଏ ଯେଉଁଠି ପାରିଲା ମାଛ, ମାଂସ, କୁକୁଡ଼ା ବିକ୍ରି କରୁଛନ୍ତି। ରାଜୀବ ମାକେର୍ଟ ପଛପଟ, ଗୁଣ୍ଡିଚା ମନ୍ଦିର ନିକଟ, ସଦର ଥାନା ନିକଟ, ଖଣ୍ଡପଡ଼ା ରୋଡ଼ ଏହିଭଳି ଅନେକ ସ୍ଥାନରେ ମାଛ, ମାଂସ ବେପାରୀ ତାଙ୍କ ପସରା ଖୋଲି ଦେଇଛନ୍ତି। ଯାହାଦ୍ୱାରା ସାଧାରଣ ଲୋକଙ୍କଠାରୁ ଆରମ୍ଭକରି ବେପାରୀମାନେ ହଇରାଣ ହେଉଥିବାର ଦେଖିବାକୁ ମିଳିଛି। ରାସ୍ତାକଡ଼ରେ ଛେଳି କଟା ହେଉଥିବାରୁ ଏହି ବାଟ ଦେଇ ସ୍କୁଲ ଯାଉଥିବା ଛାତ୍ରୀଛାତ୍ରଙ୍କ ମନରେ ଏହାର କୁପ୍ରଭାବ ପକାଉଛି । ସେହିଭଳି ସକାଳେ ମନ୍ଦିରକୁ ଯାଉଥିବା ଲୋକଙ୍କ ମନରେ ମଧ୍ୟ ଏହାର କୁପ୍ରଭାବ ପଡ଼ୁଛି।
ଯେ, ରାଜ୍ୟ ରାଜପଥ ଓ ଜାତୀୟ ରାଜପଥ କଡ଼ରେ ବିକ୍ରି କରୁଥିବା ମାଛ ମାଂସ ବେପାରୀଙ୍କୁ ଉଠାଇ ସ୍ଥାନାନ୍ତର କରିବା ପାଇଁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଥିଲେ। ହେଲେ ନୟାଗଡ଼ ମ୍ୟୁନିସିପାଲିଟି ଏହାକୁ ପାଳନ କରୁନାହିଁ। ରାଜୀବ ମାର୍କେଟ ପଛପଟେ ଥିବା ମାଛ ମାର୍କେଟ ସ୍ଥାନାନ୍ତର ହେବା ନେଇ କୁହାଯାଇଥିଲେ ମଧ୍ୟ ଏ ଦିଗରେ କୌଣସି ପଦକ୍ଷେପ ନିଆଯାଇ ନାହିଁ। ଦିଆନକ ବନ୍ଧ ନିକଟରେ ସଫା କରାଯାଇ ମାଛ ମାର୍କେଟ କରାଯିବା ପାଇଁ ପ୍ରସ୍ତୁତ କରାଯାଇଥିଲା। ମାତ୍ର କିଛି ଦିନ କାମ ହେବା ପରେ ଏହା ବନ୍ଦ ହୋଇଯିବା ଯୋଗୁ ଜିଲା ମୁଖ୍ୟ ଚିକିତ୍ସାଳୟକୁ ଆସୁଥିବା ଲୋକମାନେ ଏହି ସ୍ଥାନକୁ ଶୌଚାଳୟରେ ପରିଣତ କରିଦେଲେ। ବର୍ତ୍ତମାନ ଏହି ସ୍ଥାନଟି ସରୀସୃପଙ୍କ ବାସସ୍ଥଳୀ ପାଲଟିଛି। ଅନ୍ୟପକ୍ଷେ କିଛି ଦୂରରେ ବନ୍ଧ ଉପରେ ଚିଲିକା ଫ୍ରେସ ଖୋଲାଯାଇ ଆମିଷ ବିକ୍ରି କରାଯାଉଛି। କିନ୍ତୁ ସେଠାରେ ମାଛ ପିଣ୍ଡି କରା ନ ଯିବା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ରାଜୀବ ମାର୍କେଟ ପଛ ପଟେ ଦୋକାନ କରିଥିବା ଜଣେ ମାଛ ବେପାରୀ କୁହନ୍ତି ଏନ୍ଏସି ତରଫରୁ ଆମକୁ ପିଣ୍ଡି ଦିଆ ନ ଯିବାରୁ ବାଧ୍ୟ ହୋଇ ଆମେମାନେ ରାସ୍ତାକଡ଼ରେ ବସି ବେପାର କରୁଛୁ। ଏ ନେଇ ନୟାଗଡ଼ ମ୍ୟୁନିସିପାଲିଟିର ନିର୍ବାହୀ ଅଧିତ୍କାରୀ ସନ୍ତୋଷ କୁମାର ଜେନାଙ୍କୁ ପଚାରିବାରୁ ସେ କୌଣସି ମତାମତ ଦେଇ ନ ଥିଲେ।
