ନୂଆଦିଲ୍ଲୀ,୧୩ା୬ : ଏଥର ପାର୍ଲାମେଣ୍ଟର ମୌସୁମୀ ଅଧିବେଶନ ହାଇବ୍ରିଡ୍ ହୋଇପାରେ। ଅର୍ଥାତ୍ ଉଭୟ ରାଜ୍ୟ ସଭା ଓ ଲୋକ ସଭାରେ ସଦସ୍ୟଙ୍କ ଉପସ୍ଥିତି ବ୍ୟକ୍ତିଗତ ଏବଂ ଭର୍ଚୁଆଲ (ଭିଡିଓ କନ୍ଫରେନ୍ସ ଜରିଆରେ) ହୋଇପାରେ। କାରଣ କରୋନା ଭାଇରସ୍ ସଂକ୍ରମଣ ଦୃଷ୍ଟିରୁ ସାମାଜିକ ଦୂରତ୍ୱ ଅବଲମ୍ବନ କରାଗଲେ ଉଭୟ ଉଚ୍ଚ ଓ ନିମ୍ନ ସଦନରେ ସ୍ଥାନାଭାବ ହେବ। ଭାରତ ସରକାରଙ୍କୁ ସାଇବର ଭିତ୍ତିଭୂମି ଯୋଗାଉଥିବା ନ୍ୟାଶନାଲ୍ ଇଫର୍ମେଟିକ୍ସ ସେଣ୍ଟର (ଏନ୍ଆଇସି) ମଧ୍ୟ ସମସ୍ତ ଏମ୍ପିଙ୍କ ଭର୍ଚୁଆଲ୍ ଯୋଗଦାନ ପାଇଁ ପ୍ଲାଟ୍ଫର୍ମ ବ୍ୟବସ୍ଥା କରିପାରି ନାହିଁ।
ଦେଶରେ ମହାମାରୀ କରୋନା ସଂକ୍ରମଣ ବୃଦ୍ଧି ପାଉଥିବାବେଳେ କମ୍ ସଂଖ୍ୟକ କର୍ମଚାରୀଙ୍କୁ ନେଇ ଅଫିସ ଓ ବ୍ୟବସାୟିକ ପ୍ରତିଷ୍ଠାନ ଖୋଲିବାକୁ ଅନୁମତି ମିଳିଛି। ଏଭଳି ସମୟରେ ଆସନ୍ତା ମୌସୁମୀ ଅଧିବେଶନ ଚଳାଇବା ଏକ ଚ୍ୟାଲେଞ୍ଜ ଭାବେ ଉଭା ହୋଇଛି। ଉଭୟ ରାଜ୍ୟ ସଭା ଓ ଲୋକ ସଭାର ସେକ୍ରେଟାରି ଜେନେରାଲ ପାର୍ଲାମେଣ୍ଟର ଭୌତିକ ଓ ଡିଜିଟାଲ ଭିତ୍ତିଭୂମିର ସମୀକ୍ଷା କରିବା ପରେ ପ୍ରିଜାଇଡିଂ ଅଫିସରମାନଙ୍କୁ ରିପୋର୍ଟିଂ କରିଛନ୍ତି। ସମସ୍ତ ସଦସ୍ୟ ଉପସ୍ଥିତ ରହି କିମ୍ବା ସମ୍ପୂର୍ଣ୍ଣ ଭାବେ ଭିଡିଓ କନ୍ଫରେନ୍ସ ଜରିଆରେ ମୌସୁମୀ ଅଧିବେଶନ ଚଳାଇବା ପାଇଁ ଉପଲବ୍ଧ ସୁବିଧା ପର୍ଯ୍ୟାପ୍ତ ନୁହେଁ ବୋଲି ସେମାନେ କହିଛନ୍ତି। ସୋସିଆଲ୍ ଡିଷ୍ଟାନ୍ସିଂ ନିୟମ ପାଳନ କରାଗଲେ ରାଜ୍ୟ ସଭାରେ ୨୪୫ରୁ ୬୦ ଏବଂ ଲୋକ ସଭାରେ ୫୪୩ ଜଣଙ୍କ ମଧ୍ୟରୁ ୧୦୦ରୁ ଅଳ୍ପ ଅଧିକ ସଦସ୍ୟଙ୍କ ପାଇଁ ବ୍ୟବସ୍ଥା କରାଯାଇପାରିବ ବୋଲି ସେକ୍ରେଟାରି ଜେନେରାଲ ଦ୍ୱୟ କହିଛନ୍ତି। ସୂତ୍ରରୁ ମିଳିଥିବା ସୂଚନାନୁସାରେ ଗୃହରେ ସ୍ଥାନାଭାବ, ଫିଜିକାଲ୍ ଡିଷ୍ଟାନ୍ସିଂ ନିୟମ ଏବଂ ଭର୍ଚୁଆଲ ଯୋଗଦାନ ପାଇଁ ଭିତ୍ତିଭୂମି ଯୋଗାଇବାରେ ଏନ୍ଆଇସିର ଅସାମର୍ଥ୍ୟକୁ ନେଇ ଏହି ଅଧିବେଶନ ହାଇବ୍ରିଡ୍ ହୋଇପାରେ।
ପାର୍ଲାମେଣ୍ଟ ଅଧିବେଶନରେ ଯୋଗଦେବା ସମସ୍ତ ଏମ୍ପିଙ୍କ ଅଧିକାର ଥିବାରୁ କେଉଁ ସଦସ୍ୟ ଉପସ୍ଥିତ ରହିବେ ଓ କିଏ ଭିଡିଓ କନ୍ଫରେନ୍ସ ଜରିଆରେ ପ୍ରତିନିଧିତ୍ୱ କରିବେ ତାହା ଚୟନ କରାଯାଇ ନ ପାରେ। ସେହିପରି ସେଣ୍ଟ୍ରାଲ ହଲ୍ କିମ୍ବା ବିଜ୍ଞାନ ଭବନରେ ମଧ୍ୟ ସମସ୍ତ ଏମ୍ପିଙ୍କୁ ସାମାଜିକ ଦୂରତ୍ୱ ନିୟମାନୁସାରେ ବସାଇହେବ ନାହିଁ। ତେଣୁ ଅଦ୍ୟାବଧି କେବଳ ହାଇବ୍ରିଡ୍ ଅଧିବେଶନ ଚଳାଇବା ବିକଳ୍ପ ରହିଛି। ତେବେ ଅଧିବେଶନ ପରିଚାଳନାରେ କୌଣସି ପ୍ରକାର ପରିବର୍ତ୍ତନ ଆଣିବାକୁ ହେଲେ ଉଭୟ ଗୃହରେ ପ୍ରସ୍ତାବ ଆଗତ କରିବାକୁ ପଡ଼ିବ। ମୌସୁମୀ ଅଧିବେଶନ ପରିଚାଳନା ପାଇଁ ରାଜ୍ୟ ସଭା ଅଧ୍ୟକ୍ଷ ଏମ୍. ଭେଙ୍କାୟା ନାଇଡୁ ଓ ଲୋକ ସଭା ବାଚସ୍ପତି ଓମ୍ ବିର୍ଲା ମଙ୍ଗଳବାର ବିଭିନ୍ନ ବିକଳ୍ପ ଉପରେ ସମୀକ୍ଷା କରିଛନ୍ତି।