ରଣପୁର,୨୩ା୭ (ସ୍ବ.ପ୍ର.): ବର୍ଷା ଅଭାବରୁ ରଣପୁର ବ୍ଲକ ଅଞ୍ଚଳରେ ଜମି ଫାଟି ଆଁ କଲାଣି। କେଉଁଠି ବର୍ଷା ପାଇଁ ବେଙ୍ଗ ବିବାହ ତ ଆଉ କେଉଁଠି ଡାଳମାଙ୍କୁଡି ନୃତ୍ୟ କରାଗଲାଣି ା ତଥାପି ଇନ୍ଦ୍ର ଦେବଙ୍କ କୋପ ଚାଷୀଙ୍କ ଉପରୁ ଦୂର ହେଉନି ା ସରକାର ଚାଷ ପାଇଁ ଜଳସେଚନକୁ ଗୁରୁତ୍ୱ ଦେଉଥିବାବେଳେ ଏଠାରେ କେନାଲରେ ପାଣି ନାହିଁ। ବୋରୱେଲ୍ ଥିଲେ ବି କାମରେ ଲାଗୁନି। ସେହିପରି ଚେକ୍ଡ୍ୟାମ ଅବସ୍ଥା ନ କହିବା ଭଲ ା ଏଭଳି ସ୍ଥିତିରେ ଚାଷୀର ଭରସା ହେଉଛି ବର୍ଷା ଜଳ। ହେଲେ ଚଳିତବର୍ଷ ସ୍ବଳ୍ପ ବୃଷ୍ଟି କାରଣରୁ ଚାଷ କାର୍ଯ୍ୟରେ ଘୋର ବ୍ୟାଘାତ ସୃଷ୍ଟି ହୋଇଛି ା ଯେଉଁ ସମୟରେ ଧାନକ୍ଷେତରେ ବେଉଷଣ କରିବା କଥା ସେତେବେଳେ ଚାଷୀ ହାତବାନ୍ଧି ବସିଛି। ଏହି ପରିସ୍ଥିତି ବ୍ଲକ ଅଧୀନ ବିଭିନ୍ନ ପଞ୍ଚାୟତର ଚାଷୀଙ୍କ ଚିନ୍ତା ବଢାଇଦେଇଛି।
ଏହି ବ୍ଲକରେ ସମୁଦାୟ ୨୦ହଜାର ୨୨୭ ହେକ୍ଟର ଚାଷ ଜମି ରହିଛି ା ଚାଷୀମାନେ ଧାନଚାଷ ପାଇଁ ମୁଖ୍ୟତଃ ବର୍ଷାଜଳ ଉପରେ ନିର୍ଭର କରିଥାନ୍ତି। ଯେଉଁ ବର୍ଷ ଭଲ ବର୍ଷା ହୁଏ ସେବର୍ଷ ଚାଷୀ ମନରେ ଉତ୍ସାହ ଦେଖିବାକୁ ମିଳେ। ଚାଷ କାର୍ଯ୍ୟ ମଧ୍ୟ ଭଲ ହୋଇଥାଏ। ବ୍ଲକରେ ଜଳସେଚନର ଉନ୍ନତି ପାଇଁ ସରକାର କୋଟି କୋଟି ଟଙ୍କା ଖର୍ଚ୍ଚ କରି ଚେକ୍ଡ୍ୟାମ୍, ବନ୍ଧ ଆଦି ନିର୍ମାଣ କରିଛନ୍ତି। ହେଲେ ନିମ୍ନମାନର ଯୋଗୁ ଚାଷୀମାନେ ସେଥିରୁ ସୁଫଳ ପାଇପାରୁ ନ ଥିବା ପ୍ରକାଶ କରିଛନ୍ତି। ଅପରପକ୍ଷେ ସରକାରଙ୍କ ପକ୍ଷରୁ ବିଭିନ୍ନ ସ୍ଥାନରେ ବୋର୍ୱେଲ ଖନନ କରାଯାଇଛି। ସେଥିମଧ୍ୟରୁ କେଉଁଠି ବିଦ୍ୟୁତ୍ ସଂଯୋଗ ନାହିଁ ତ କେଉଁଠି ଖୁଣ୍ଟି ପୋତା ନ ଯିବାରୁ ସେଗୁଡିକ ଚାଷୀଙ୍କ କାମରେ ଆସୁନି। ବ୍ଲକର ମାତ୍ର ୧୫ ପ୍ରତିଶତ ଜମିକୁ ଜଳସେଚନ ସୁବିଧା ରହିଛି, ଯାହା ସମୁଦ୍ରକୁ ଶଙ୍ଖେ। ଚଳିତବର୍ଷ ବ୍ଲକରେ ୧୭ହଜାର ୩୨୫ ହେକ୍ଟର ଜମିରେ ଖରିଫ ଧାନ ଚାଷ ହୋଇଛି। କମ୍ ଜମିରେ ଧାନରୁଆ ହୋଇଥିଲା ବେଳେ ଅଧିକ ଜମିରେ ଚାଷୀମାନେ ଧାନ ବୁଣିଛନ୍ତି। ଅକ୍ଷୟତୃତୀୟାଠାରୁ ଅଖିମୁଠି ଅନୁକୁଳ କରି ଚାଷୀମାନେ ଧାନ ବୁଣିଥିଲେ। ମାତ୍ର ବର୍ଷା ଅଭାବରୁ ଜମିରେ ଧାନ ଗଜା ନ ହୋଇ ନଷ୍ଟ ହୋଇଗଲାଣି। ଯେଉଁଠି ଗଜା ବାହାରି ଗଛ ହୋଇଥିଲା ପାଣି ଅଭାବରୁ ଉକ୍ତ ଜମି ଫାଟି ଆଁ କରିଛି। ବର୍ଷା ପରିମାଣ ଦେଖିଲେ ଜୁନ ୨୦୧୮ରେ ବ୍ଲକରେ ୧୬୪.୪ ମିଲିମିଟର ବର୍ଷା ହୋଇଥିଲା ବେଳେ ୨୦୧୯ ଜୁନରେ ତାହା ୮୫.୦୦ ମିମିରେ ସୀମିତ ରହିଛି ା ସେହିପରି ଜୁଲାଇ ୨୦୧୮ରେ ୩୪୩.୮ ମିଲିମିଟର ବର୍ଷା ହୋଇଥିଲାବେଳେ ୨୦୧୯ ଜୁଲାଇ ୨୧ ତାରିଖ ସୁଦ୍ଧା ୧୬୪.୨ମିମି ବର୍ଷା ରେକର୍ଡ ହୋଇଛି ା ଏହି ତଥ୍ୟରୁ କେତେ ପରିମାଣ କମ୍ ବର୍ଷା ହୋଇଛି ତାହା ସ୍ପଷ୍ଟ ହେଉଛି।
ଏ ସମ୍ପର୍କରେ ରଣପୁର କୃଷି ବିଭାଗ ଅଧିକାରିଣୀ ରାଜଶ୍ରୀ ସାହୁଙ୍କୁ ପଚାରିବାରୁ ସେ କହିଥିଲେ, ଅଗଷ୍ଟ, ସେପ୍ଟେମ୍ବର ମାସରେ ଭଲ ବର୍ଷା ହେଲେ ଚାଷୀଙ୍କ ଖରିଫ ଧାନ ଚାଷ ଭଲ ହେବ। ଯଦି ନ ହେବ ଚାଷକାର୍ଯ୍ୟ କ୍ଷତିଗ୍ରସ୍ତ ହେବ ା ଏଠାରେ କରାଯାଇଥିବା ଜଳସେଚନ ପ୍ରକଳ୍ପଗୁଡିକରେ ଜଳ ନ ରହିବାରୁ ଚାଷୀମାନେ ଚାଷ କାର୍ଯ୍ୟରେ ଅଧିକ କ୍ଷତିଗ୍ରସ୍ତ ହେଉଛନ୍ତି। ବିଲଗାଡିଆ ଗ୍ରାମର ଚାଷୀ ଅଖିଳ ପଟ୍ଟନାୟକ କୁହନ୍ତି, ଅକ୍ଷୟ ତୃତୀୟାଠାରୁ ଜମିରେ ଧାନ ବୁଣିଥିଲେ ମଧ୍ୟ ଗଜା ହେଉ ନ ଥିବାରୁ ମରୁଡି ହେବା ଆଶଙ୍କା ଦେଖାଦେଇଛି। ସରକାର ଜଳସେଚନ ବ୍ୟବସ୍ଥା କରି ନ ଥିବାରୁ ଚାଷୀମାନେ ବର୍ଷା ଜଳ ଉପରେ ନିର୍ଭର କରି ହଇରାଣ ହେଉଛନ୍ତି। ଚାଷୀ ଭିକାରୀ ବୈରୀଗଞ୍ଜନ, ରାଉଳ ମାଝି, ସଦାଶିବ ପରିଡା, କୋଳଥପଙ୍ଗି ଗ୍ରାମର ଗୋଲଖ ବିହାରୀ ସାହୁ, ହରିହର ପ୍ରଧାନ, ଭିକାରୀ ସାହୁ କୁହନ୍ତି, ଜମିରେ ବୁଣିଥିବା ଧାନ ଗଛ ଛୋଟ ହୋଇଥିଲା ବେଳେ ବର୍ଷା ଓ ଜଳସେଚନ ଅଭାବରୁ ଜମି ଫାଟି ଆଁ କରିଛି ା ଆମେ ଧାରକରଜ କରି ଚାଷ କରିଛୁ ା ଯଦି ଭଲ ବର୍ଷା ନ ହେବ ଫସଲ ନଷ୍ଟ ହେବ।
