ଭୁବନେଶ୍ୱର,୭।୬(ବ୍ୟୁରୋ): ଯାତ୍ରୀମାନଙ୍କୁ ସ୍ବଚ୍ଛ ବାତାବରଣ ଓ ସୁଗମ ଯାତ୍ରା ସୁବିଧା ଦେବାଲାଗି ଭାରତୀୟ ରେଳ ପକ୍ଷରୁ ‘ସ୍ବଚ୍ଛ ଭାରତ, ସ୍ବଚ୍ଛ ରେଳ’ ଅଭିଯାନରେ ବିଭିନ୍ନ ପଦକ୍ଷେପ ନିଆଯାଇଛି। ବିଶେଷକରି ଷ୍ଟେଶନ ଏବଂ ଟ୍ରେନ୍ଗୁଡ଼ିକରେ ପ୍ଲାଷ୍ଟିକ୍ ବ୍ୟବହାର କମାଇବାକୁ ଗୁରୁତ୍ୱ ଦିଆଯାଇଛି। ରେଳ ମନ୍ତ୍ରଣାଳୟର ସୂଚନା ମୁତାବକ, ୨୦୧୯-୨୦ରେ ୧୪,୯୧୬ଟି ରେଳ ଡବାରେ ୪୯,୪୮୭ ଜୈବ ଶୌଚାଳୟ ସଂଯୁକ୍ତ କରାଯାଇଛି। ଶତ ପ୍ରତିଶତ ଶୌଚାଳୟ ସୁବିଧା ସହିତ ମୋଟ ୬୮,୮୦୦ କୋଚ୍ରେ ୨ ଲକ୍ଷ ୪୫ ହଜାରରୁ ଅଧିକ ଜୈବ ଶୌଚାଳୟ ଲଗାଯାଇଛି। ମହାତ୍ମା ଗାନ୍ଧୀଙ୍କ ୧୫୦ତମ ଜୟନ୍ତୀ ଉପଲକ୍ଷେ ୨୦୧୯ ଅକ୍ଟୋବର ୨ ପରଠାରୁ ଟ୍ରେନ୍ରେ ସିଙ୍ଗଲ୍ ୟୁଜ୍ ପ୍ଲାଷ୍ଟିକ ଉପଯୋଗ କରାଯାଉ ନାହିଁ। ଷ୍ଟେଶନରୁ ବାହାରୁଥିବା ପ୍ଲାଷ୍ଟିକ ବର୍ଜ୍ୟକୁ କମ୍ କରିବା, ତାହାର ପୁନଃଚକ୍ରଣ କରିବା ଏବଂ ପରିଚାଳନା ଲାଗି ଜୋନାଲ ରେଳପଥ ଦ୍ୱାରା ବିଭିନ୍ନ ସ୍ଥାନରେ ପ୍ଲାଷ୍ଟିକ ବୋତଲ କ୍ରସିଂ ମେଶିନ ସ୍ଥାପନ କରାଯାଇଛି। ବର୍ତ୍ତମାନ ଭାରତୀୟ ରେଳପଥ ବହୁ ଜିଲା ମୁଖ୍ୟାଳୟ ରେଳ ଷ୍ଟେଶନ ସମେତ ୨୨୯ ଷ୍ଟେଶନରେ ପାଖାପାଖି ୩୧୫ଟି ଏଭଳି ମେଶିନ ସ୍ଥାପନ କରିଛି। ଅନ୍ୟପକ୍ଷରେ ୨୦୧୯-୨୦ରେ ପରିବେଶ ପରିଚାଳନା ପ୍ରଣାଳୀ କାର୍ଯ୍ୟାନ୍ବୟନ ଲାଗି ୨୦୦ ରେଳ ଷ୍ଟେଶନକୁ ଆଇଏସଓ-୧୪୦୦୧ ମାନ୍ୟତା ପ୍ରଦାନ କରାଯାଇଛି। ରାଜଧାନୀ, ଶତାବ୍ଦୀ, ଦୂରୋନ୍ତୋ ଭଳି ମେଲ୍/ଏକ୍ସପ୍ରେସ ସହ ୧୧୦୦ ଯୋଡ଼ାରୁ ଅଧିକ ଟ୍ରେନ୍ରେ ଯାତ୍ରା ସମୟରେ ଶୌଚାଳୟ, ଦ୍ୱାର, କରିଡର ଏବଂ ଯାତ୍ରୀ ଡବାରେ ସଫେଇ ଲାଗି ଟ୍ରେନରେ ହାଉସ କିପିଂ ସେବା ଉପଲବ୍ଧ ରହିଛି। ସମନ୍ବିତ ମେଶିନ ଚାଳିତ ସଫେଇ କାର୍ଯ୍ୟ ୯୫୩ ଷ୍ଟେଶନରେ ପ୍ରଦାନ କରାଯାଉଥିବା ରେଳ ମନ୍ତ୍ରଣାଳୟ ପକ୍ଷରୁ କୁହାଯାଇଛି।
