କଟକ ଅଫିସ, ୭।୭: ଆସନ୍ତା ଅକ୍ଟୋବର ସୁଦ୍ଧା ଓଡ଼ିଶା ବାହ୍ୟ ମଳତ୍ୟାଗ ମୁକ୍ତ ରାଜ୍ୟ ହେବ ବୋଲି ରାଜ୍ୟ ସରକାର କେନ୍ଦ୍ରକୁ ପ୍ରତିଶ୍ରୁତି ଦେଇଛନ୍ତି। ଆସନ୍ତା ୩ମାସ ମଧ୍ୟରେ ଏହି ଲକ୍ଷ୍ୟ ପୂରଣ କରିବା ପାଇଁ ରାଜ୍ୟରେ ୧୦.୫ ଲକ୍ଷ ପାଇଖାନା ନିର୍ମାଣ କରିବାକୁ ସରକାର ଲକ୍ଷ୍ୟଧାର୍ଯ୍ୟ କରିଛନ୍ତି। ମାତ୍ର ବାସ୍ତବ କ୍ଷେତ୍ରରେ ପାଇଖାନା ନଁାରେ ବ୍ଲକସ୍ତରରେ ପ୍ରଶାସନ କିଭଳି ସରକାରଙ୍କୁ ଭୁଅଁା ବୁଲାଉଛି ତାହାର ଏକ ବଡ ପ୍ରମାଣ ଏବେ ଲୋକଲୋଚନକୁ ଆସିଛି। ବାହାରକୁ ଦେଖିବାକୁ ସ୍ବଛ ଭାରତ ଯୋଜନାରେ ପାଇଖାନା ନିର୍ମାଣ କରାଯାଇଛି କିନ୍ତୁ ପାଇଖାନା ଭିତରକୁ ଗଲେ ଜାଳ ଭାଡି। କାରଣ ପାଇଖାନା ପାଇଁ ଗୃହ ନିର୍ମାଣ କରାଯାଇଛି। ପାଇଖାନା କାନ୍ଥରେ ସ୍ବଛ ଭାରତ ମିଶନ ଲେଖାଯାଇଛି। ଏହାପରେ ହିତାଧିକାରୀଙ୍କୁ ପାଇଖାନା ବାବଦରେ ୧୨ହଜାର ଟଙ୍କା ମଧ୍ୟ ମଞ୍ଜୁର କରାଯାଇଛି। ହେଲେ ନିର୍ମିତ ପାଇଖାନା ଘର ଭିତରେ ପାଇଖାନା ବଦଳରେ ବର୍ଷାଦିନ ପାଇଁ ଜାଳ ସାଇତା ହୋଇ ରହିଛି। ମାହାଙ୍ଗା ବ୍ଲକରେ ଏଭଳି ଦୃଶ୍ୟ ସରକାରଙ୍କ ସ୍ବଛ ଭାରତ ମିଶନର ଅସଲ ଚେହେରାକୁ ପଦାରେ ପକାଇଛି। ସୂଚନାଥାଉ କି, ଜିଲା ଜଳ ଓ ପରିମଳ ବିଭାଗ ପକ୍ଷରୁ ୨୦୧୨ରେ ବେସ ଲାଇନ ସର୍ଭେ ଅନୁଯାୟୀ, ଜିଲାରେ ୪୦୮୩୭୯ଜଣଙ୍କର ପାଇଖାନା ନ ଥିବା ଜଣାପଡିଥିଲା। ସେଥିମଧ୍ୟରୁ ୩୫୬୯୮୭ଜଣଙ୍କର ପାଇଖାନା ନିର୍ମାଣ ଶେଷ ହୋଇଥିବା ବେଳେ ୫୧୩୯୨ଜଣ ଅଦ୍ୟାବଧି ପାଇଖାନା ଅପେକ୍ଷାରେ ଥିବା ଜିଲା ଜଳ ଓ ପରିମଳ ବିଭାଗ ପକ୍ଷରୁ ତଥ୍ୟ ଦିଆଯାଇଛି।
ଜିଲାର ବାରଙ୍ଗ ଓ ତିଗିରିଆ ବ୍ଲକରେ ପାଇଖାନା ନିର୍ମାଣ ଶତ ପ୍ରତିଶତ କରାଯାଇଥିବା ସୂଚନା ମିଳିଛି। ବାକି ବ୍ଲକଗୁଡିକରେ ଏହି ହାର କେଉଁଠି ୯୦ ପ୍ରତିଶତ ତ କେଉଁଠି ୮୦ ପ୍ରତିଶତ ରହିଛି। ମୋଟାମୋଟି ଭାବେ ଜିଲାରେ ପାଇଖାନା ନିର୍ମାଣ ହାର ୮୭.୪୨ ପ୍ରତିଶତ ରହିଥିବା ଜିଲା ଜଳ ଓ ପରିମଳ ବିଭାଗ ପକ୍ଷରୁ ତଥ୍ୟ ଦିଆଯାଇଛି। ତେବେ ଉକ୍ତ ବିଭାଗ ଯେଉଁ ସଫଳତା ହାର ଦର୍ଶାଇଛି ତାହାର ବାସ୍ତବତାକୁ ନେଇ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି। କାରଣ ଯଦି ବାହାରକୁ ପାଇଖାନା ଦିଶୁଥିବା ଘର ଭିତର ଜାଳ ଭାଡି ତେବେ ପରିମଳ ବିଭାଗ ଯେଉଁ ୩୫୬୯୮୭ଟି ପାଇଖାନା ନିର୍ମାଣ ଶେଷ କରିଥିବା କହୁଛି ସେଥିରୁ କେତେ ପାଇଖାନା ନିର୍ମାଣ ପରେ ବ୍ୟବହାର ହେଉନି ତାହା ତଦନ୍ତ ସାପେକ୍ଷ ବୋଲି ମାହାଙ୍ଗା ଅଞ୍ଚଳର ସାମାଜିକ କର୍ମୀ ନବ କିଶୋର ବେହୁରା କହିଛନ୍ତି। ବେହୁରା କହିଛନ୍ତି, ଗୋଟିଏ ପାଇଖାନା ପାଇଁ ୨ଥର ବିଲ କରାଯାଉଛି। ପାଇଖାନା ଘର ନିର୍ମାଣ କରାଯାଉଛି ମାତ୍ର ତାହା ଭିତରେ ପ୍ୟାନ ନାହିଁ। ସାଲେପୁର ଅଞ୍ଚଳର ଯୁବକ ଆଲୋକ ଭୁୟଁା କୁହନ୍ତି, ଗ୍ରାମାଞ୍ଚଳର ଜଳ ଯୋଗାଣ ବ୍ୟବସ୍ଥା ଅତ୍ୟନ୍ତ ଦୟନୀୟ। ଲୋକେ ପିଇବା ପାଣି ପାଇଁ ବାର ହୀନସ୍ତା ଭୋଗୁଛନ୍ତି। ଯେଉଁଠି ପିଇବାକୁ ପାଣି ନାହିଁ ସେଠାରେ ପାଇଖାନା ପାଇଁ ପାଣି ଆଣିବେ କେଉଁଠୁ। ତେଣୁ ପ୍ରଥମେ ପାଣିର ବ୍ୟବସ୍ଥା କରି ତା’ ପରେ ପାଇଖାନା ନିର୍ମାଣ କରିବାକୁ ପ୍ରୋତ୍ସାହନ ଦେବା ଉଚିତ।
ପରିମଳ କ୍ଷେତ୍ରରେ ସଚେତନତା ସୃଷ୍ଟି କରୁଥିବା ସାମାଜିକ କର୍ମୀ ମଳୟ ଷଢଙ୍ଗୀ କହିଛନ୍ତି, ଲୋକେ ସଚେତନ ହେବା ସାଙ୍ଗକୁ ବ୍ୟବସ୍ଥା ସ୍ବଛ ନ ହେଲେ ଏହି ଯୋଜନା ଦିଗହରା ହେବ। ଯଦି ପାଇଖାନା ନ କରି ବିଲ ପଇଠ କରାଯାଉଛି ତେବେ ଯୋଜନା ସଫଳ ହେବ କିଭଳି ବୋଲି ସେ କହିଛନ୍ତି। ଏ ସମ୍ପର୍କରେ ଜିଲା ଜଳ ଓ ପରିମଳ ବିଭାଗର ନିର୍ବାହୀଯନ୍ତ୍ରୀ ସଞ୍ଜୟ କୁମାର ସାମଲଙ୍କ ମତାମତ ନେବା ପାଇଁ ବାରମ୍ବାର ଯୋଗାଯୋଗ କରାଯାଇଥିଲେ ମଧ୍ୟ ସେ ଫୋନ ଉଠାଇ ନ ଥିଲେ। ଜଳ ଓ ପରିମଳ ବିଭାଗ କାର୍ଯ୍ୟାଳୟକୁ ଯାଇଥିଲେ ମଧ୍ୟ ସେ କାର୍ଯ୍ୟାଳୟରେ ଅନୁପସ୍ଥିତ ଥିବାରୁ ମତାମତ ନେବା ସମ୍ଭବ ହୋଇ ନ ଥିଲା।
