ନୂଆଦିଲ୍ଲୀ, ୪-୧୨: ଯଦି କୌଣସି ବ୍ୟାଙ୍କ ଏହାର କାରବାରରେ ବିଫଳତା ଲାଗି ବନ୍ଦ ହୋଇଯାଏ ତେବେ ଗ୍ରାହକଙ୍କ ମୋଟ ଜମାର କେବଳ ଲକ୍ଷେ ଟଙ୍କା ଉପରେ ହିଁ ଗ୍ୟାରେଣ୍ଟି ରହିଛି। ଅର୍ଥାତ ଲୋକମାନେ ଯେତେ ଟଙ୍କା ବ୍ୟାଙ୍କରେ ଜମା କରିଥିଲେ ମଧ୍ୟ ଲକ୍ଷେ ଟଙ୍କା ହିଁ ଫେରିପାଇବେ। ଭାରତୀୟ ରିଜର୍ଭ ବ୍ୟାଙ୍କର ସହାୟକ କମ୍ପାନୀ ଡିପୋଜିଟ ଇନସ୍ୟୁରାନ୍ସ ଆଣ୍ଡ କ୍ରେଡିଟ ଗ୍ୟାରେଣ୍ଟି କର୍ପୋରେଶନ (ଡିଆଇସିଜିସି) ପକ୍ଷରୁ ଏହି ସୂଚନା ଦିଆଯାଇଛି। ସୂଚନା ଅଧିକାର ଆଇନ(ଆରଟିଆଇ) ଦ୍ୱାରା ମଗାଯାଇଥିବା ତଥ୍ୟରୁ ଏଭଳି କଥା ସାମ୍ନାକୁ ଆସିଛି। ବର୍ତ୍ତମାନ ବ୍ୟାଙ୍କ ଜମାରାଶି ଉପରେ ମାତ୍ର ୧ ଲକ୍ଷ ଟଙ୍କାର ବୀମା ରହିଛି। ଏହାକୁ ବଢାଇବା ଲାଗି ପାର୍ଲାମେଣ୍ଟର ଶୀତକାଳିନ ଅଧିବେଶନରେ ଏକ ବିଧେୟକ ଆଣିବା ଲାଗି ଅର୍ଥ ମନ୍ତ୍ରୀ କହିଥିଲେ। ବ୍ୟାଙ୍କ ଜମା ଉପରେ ବୀମା ରାଶିକୁ ୫ ଲକ୍ଷ ଟଙ୍କାକୁ ବଢାଇବାକୁ ଅଂଶୀଦାରଙ୍କ ପକ୍ଷରୁ ଦାବି କରାଯାଇଥିଲା। ମାତ୍ର ଏହି ସୀମା ବଢାଇବା ଲାଗି ଏଭଳି କୌଣସି ପ୍ରସ୍ତାବ ଉପରେ ବିଚାର କରାଯାଉ ନ ଥିବା ଡିଆଇସିଜିସି କହିଛି।
ସବୁ ବାଣିଜି୍ୟକ ବ୍ୟାଙ୍କ ସମେତ ଭାରତରେ କାର୍ଯ୍ୟ କରୁଥିବା ବିଦେଶର ବ୍ୟାଙ୍କଗୁଡିକୁ ଡିଆଇସିଜିସି ମଧ୍ୟ କଭର କରୁଛି। ସେହିଭଳି ସ୍ଥାନୀୟ ବ୍ୟାଙ୍କ ଆଞ୍ଚଳିକ ଗ୍ରାମୀଣ ବ୍ୟାଙ୍କ ମଧ୍ୟ ଏହା ପରିସରରେ ରହିଛି। ସମବାୟ ବ୍ୟାଙ୍କଗୁଡିକ ମଧ୍ୟ ଡିପୋଜିଟ ଇନସ୍ୟୁରାନ୍ସ ସ୍କିମ ମଧ୍ୟରେ ଆସୁଛନ୍ତି। ମୁମ୍ବାଇ ପୋଲିସର ଅର୍ଥନୈତିକ ଅପରାଧ ଶାଖା ସୂଚନା ମୁତାବକ ନିକଟରେ ସାମ୍ନାକୁ ଆସିଥିବା ପଞ୍ଜାବ ଆଣ୍ଡ ମହାରାଷ୍ଟ୍ର ବ୍ୟାଙ୍କ ଠକେଇରେ ନିୟାମକଙ୍କ ଆଖିରେ ଧୂଳୀ ଦେଇ ବୃହତ୍ତ ପରିମାଣର ଋଣ ଦିଆଯାଇଥିଲା। ବ୍ୟାଙ୍କର ପରିଚାଳନା ବୋର୍ଡ ଏଚଡିଆଇଏଲ୍କୁ ଏହି ଋଣ ଦେଇଥିଲା। ଋଣ ସୁଝିବାକୁ ଉକ୍ତ ଗ୍ରୁପ ସକ୍ଷମ ନ ହେବା ଯୋଗୁ ଲୋକମାନଙ୍କୁ ନାହିଁ ନ ଥିବା ହଇରାଣ ହେବାକୁ ପଡିଲା। ଉଠାଣ ଉପରେ କଟକଣା ଲାଗୁ କରାଗଲା। କିଛି ଲୋକଙ୍କ ଜୀବନ ହାନି ହେବାର ନଜିର ମଧ୍ୟ ରହିଛି। ମୋଟ ଅଗ୍ରୀମ ମଧ୍ୟରୁ କେବଳ ୭୦% ଏଚଡିଆଇଏଲ୍ ଗ୍ରୁପ ଲାଭ କରିଥିଲା। ଏପଟେ ଚଳିତ ଆର୍ଥିକ ବର୍ଷ ପ୍ରଥମ ମାସରେ ରାଷ୍ଟ୍ରାୟତ୍ତ ବ୍ୟାଙ୍କଗୁଡିକରେ ୭୫,୭୦୦ କୋଟି ଟଙ୍କାର ଋଣ ଠକେଇ ସାମ୍ନାକୁ ଆସିଛି। ଏହି ସମୟରେ ୫୭୪୩ ଠକେଇ ଘଟଣା ସାମ୍ନାକୁ ଆସିଥିବା ଅର୍ଥ ମନ୍ତ୍ରୀ ନିର୍ମଳା ସୀତାରାମନ ପାର୍ଲାମେଣ୍ଟକୁ ସୂଚନା ଦେଇଛନ୍ତି।
