ଫୁଲବାଣୀ ଅଫିସ, ୧୮ା୯ -ବଣ ପାହାଡଘେରା କନ୍ଧମାଳ ଜିଲାର ଅନେକ ସ୍ଥାନକୁ ଏବେ ବି ଯାତାୟାତ ସୁବିଧା ନାହିଁ। ରାସ୍ତା ଘାଟ ଅଭାବରୁ ସର୍ବଦା ଶିକ୍ଷା, ସ୍ବାସ୍ଥ୍ୟ ସମସ୍ୟା ଲାଗି ରହିଛି। ଏଭଳି ସ୍ଥିତିରେ ଶିକ୍ଷାର ଆଲୋକ ଦେଖି ନ ଥିବା ଲୋକେ ଗ୍ରାମରେ ଏକ ସ୍କୁଲ ଖୋଲିଥିବାରୁ ଖୁସି ହୋଇଥିଲେ ା କିଛି ବର୍ଷ ଉକ୍ତ ସ୍କୁଲ ଚାଲିବା ପରେ ତାହାକୁ ଏବେ ବନ୍ଦ କରି ଦିଆଗଲା ା ଯାହାକୁ ନେଇ ଅସନ୍ତୋଷ ଦେଖାଦେଇଛି। କ.ନୂଆଗାଁ ବ୍ଲକ କୁଡ଼ୁତୁଲି ପଞ୍ଚାୟତର କିରାକେତା ସ୍କୁଲରେ ପିଲା କମ୍ ଥିବା ଦର୍ଶାଇ ଶିକ୍ଷା ବିଭାଗ ଏହାକୁ ବନ୍ଦ କରିଦେଇଛି। ଆବଶ୍ୟକଠାରୁ ମାତ୍ର ଗୋଟିଏ ପିଲା କମ୍ ହେବାରୁ ବିଭାଗ ଏପରି ନିଷ୍ପତ୍ତି ନେଇଛି। ଫଳରେ କେତେଜଣ ପିଲା ଅଧାରୁ ପାଠ ଛାଡିବାକୁ ବାଧ୍ୟ ହୋଇଛନ୍ତି। କାରଣ ସେମାନଙ୍କ ପକ୍ଷେ ଅନ୍ୟ ସ୍କୁଲ ୩/୪ କିମି ଦୂର ପାହାଡ ଜଙ୍ଗଲ ଦେଇ ଯିବା ସମ୍ଭବ ହେଲାନାହିଁ ା ବିଦ୍ୟାଳୟ କର୍ତ୍ତୃପକ୍ଷ ଚାହିଁଥିଲେ ଆଖ ପାଖରୁ ଗୋଟିଏ ପିଲା ସ୍କୁଲକୁ ଆଣି ବହୁ ଦିନର ଅନୁଷ୍ଠାନକୁ ବଞ୍ଚାଇ ପାରିଥାନ୍ତା ବୋଲି ଏବେ ସାଧାରଣରେ ଆଲୋଚନା ହେଉଛି ା
କ.ନୂଆଗାଁ ଓ ଫିରିଙ୍ଗିଆ ବ୍ଲକ ସୀମାନ୍ତରେ ଥିବା କିରାକେତା ଗ୍ରାମରେ ୩୦ ପରିବାର ବସବାସ କରୁଛନ୍ତି। ରାସ୍ତା, ପାନୀୟ ଜଳ, ଶିକ୍ଷା ଓ ସ୍ବାସ୍ଥ୍ୟସେବା ଆଦି ଏଠାକୁ ଅପହଞ୍ଚ। ଶିକ୍ଷାର ଆଲୋକ ପାଇଁ ଗ୍ରାମରେ ୨୦୧୩ରେ ଏକ ପ୍ରାଥମିକ ବିଦ୍ୟାଳୟ ଖୋଲା ଯାଇଥିଲା। ସେଠାରେ ଗ୍ରାମର ପିଲା ପଢ଼ିଲେ ା ଗ୍ରାମରେ ହସଖୁସିର ବାତାବରଣ ଚାଲି ଆସିଲା ା ହେଲେ ଚଳିତବର୍ଷ ୯ ଛାତ୍ରୀଛାତ୍ର ପଢ଼ୁଥିବା ଦର୍ଶାଇ ଶିକ୍ଷା ବିଭାଗ ଏହାକୁ ବନ୍ଦ କରି ଦେଇଛି ା ଦିନ ଥିଲା କ.ନୂଆଗାଁ ବ୍ଲକର ପୂର୍ବତନ ଅଧ୍ୟକ୍ଷ ତଥା ବର୍ତ୍ତମାନର ବାଲିଗୁଡ଼ା ବିଧାୟକ ଚକ୍ରମଣି କହଁର ଏହି ସ୍କୁଲରେ ଗଣଶିକ୍ଷକ ଭାବେ ପିଲାଙ୍କୁ ପାଠ ପଢାଉଥିଲେ। ହେଲେ ସ୍କୁଲରେ ଗୋଟିଏ ପିଲା କମି ଯିବାରୁ ରାଜ୍ୟ ସରକାରଙ୍କର ନୂତନ ଆଇନ ଦ୍ୱାରା ଏହାକୁ ବନ୍ଦ କରି ଦିଆଯାଇଛି। ଫଳରେ କେତେଜଣ ବସ୍ତାନୀରେ ଡୋରି ବନ୍ଧା ଯାଇଥିବା ବେଳେ କେତେଜଣ ପାହାଡ଼ିଆ ରାସ୍ତାରେ ୩/୪ କିମି ଚାଲି ଚାଲି ଯାଇ ନନ୍ଦମାହା ସ୍କୁଲରେ ପାଠ ପଢ଼ୁଛନ୍ତି। ଯାହାକୁ ନେଇ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ସୃଷ୍ଟି ହୋଇଛି ା ଅନ୍ୟପକ୍ଷରେ ଗ୍ରାମବାସୀଙ୍କ ପାଇଁ ଆଉ ଏକ ସମସ୍ୟା ଛିଡ଼ା ହୋଇଛି। ଗ୍ରାମ ଅଙ୍ଗନୱାଡ଼ିରୁ ୧୨ଜଣ ପିଲା ସ୍କୁଲରେ ନାମ ଲେଖାଇବା ଅପେକ୍ଷାରେ ଅଛନ୍ତି। ଏମାନଙ୍କୁ ନନ୍ଦମାହା ସ୍କୁଲକୁ ନେବାକୁ ହେଲେ ରାସ୍ତାରେ ଦୁଇଟି ପାହାଡ଼ ଏବଂ ଗୋଟିଏ ନଦୀ ପାର ହେବାକୁ ପଡିବ ା ଗ୍ରାମରେ ଥିବା ସ୍କୁଲକୁ ବନ୍ଦ କରି ଦିଆଯିବାରୁ ପିଲାମାନେ ଏବେ ପଢ଼ିବାକୁ ହଇରାଣ ହେଉଛନ୍ତି। ପିଲା ପାଖ ସ୍କୁଲକୁ ଯିବା ସମ୍ଭବ ନୁହେଁ। କାରଣ ଜଙ୍ଗଲ ପାହଡ଼ ରାସ୍ତାରେ ଭାଲୁ ତଥା ଅନ୍ୟ ଜନ୍ତୁ ଭୟ ରହିଛି ା ଗାଁକୁ ଲାଇନ ଆସିନାହିଁ। ଜଣେ ଠିକାଦାର ଆସି ଗାଁରେ ବିଦ୍ୟୁତ ଖୁଣ୍ଟ ପକାଇବା ପାଇଁ ୧୨ ହଜାର ଟଙ୍କା ଆଦାୟ କରି ପଳାଇଛନ୍ତି। ଏପରିକି ଗ୍ରାମକୁ ନିତିଦିନିଆ ରାସ୍ତା ହୋଇ ପାରିଲା ନାହିଁ ବୋଲି ଅଭିଭାବକଙ୍କ ସମେତ ଗ୍ରାମବାସୀ ପ୍ରକାଶ କରିଛନ୍ତି। ଅନ୍ୟପକ୍ଷରେ ସରକାରଙ୍କ ନିୟମ ଅନୁସାରେ ସ୍କୁଲ ବନ୍ଦ କରାଯାଉଥିବା ଜିଲା ଶିକ୍ଷାଧିକାରୀ ବିକାଶ ଚନ୍ଦ୍ର ପ୍ରଧାନ ସୂଚନା ଦେଇଛନ୍ତି।
