ଗୁଆହାଟୀ,୧୧।୬: ଆସାମ ଦିସପୁରରେ ଥିବା ଅକ୍ଷର ଫୋରମ ସ୍କୁଲ ଏବେ ଅନ୍ୟମାନଙ୍କ ପାଇଁ ଉଦାହରଣ ପାଲଟିଛି। କାରଣ ଏଠାରେ ପାଖାପାଖି ୧୧୦ ଜଣ ପିଲା ପାଠ ପଢୁଥିବା ବେଳେ ଏମାନେ ସ୍କୁଲ ଫି ବାବଦରେ ପ୍ଲାଷ୍ଟିକର ବର୍ଜ୍ୟବସ୍ତୁ ଦାଖଲ କରିଥାଆନ୍ତି। କଥାଟା ଆଶ୍ଚର୍ଯ୍ୟ ଲାଗୁଥିଲେ ବି ସତ। କାରଣ ଏଠାରେ ପ୍ଲାଷ୍ଟିକର ପୁନଃ ବ୍ୟବହାର ପାଇଁ ଏଭଳି ପଦକ୍ଷେପ ନିଆଯାଇଛି। ପ୍ରତି ସପ୍ତାହରେ ପିଲାମାନେ ପ୍ଲାଷ୍ଟିକ ବୋତଲରେ ପ୍ଲାଷ୍ଟିକ୍ ଥଳି ଭର୍ତ୍ତି କରି ଆଣିବାକୁ ପଡିଥାଏ। ଏହାକୁ ‘ଇକୋ ବ୍ରିକ୍’ ବୋଲି କୁହାଯାଉଛି। ଏହାକୁ ସ୍କୁଲ ଘର, ଶୌଚାଳୟ ଓ ସଡ଼କ ନିର୍ମାଣରେ ବ୍ୟବହାର କରାଯାଉଛି।
ପିଲାମାନେ ସପ୍ତାହକୁ ଏମିତି ୨୦ଟି ଜିନିଷ ନିଜ ଘରୁ ଅଥବା ଆଖପାଖ ଅଞ୍ଚଳରୁ ଆଣି ଥାଆନ୍ତି। ନ୍ୟୁୟର୍କରେ ରହୁଥିବା ପରମିତା ସରମା ଓ ତାଙ୍କ ସ୍ବାମୀ ମଜିନ ମୁଖତାର ଏମିତି ଏକ ସ୍କୁଲ କରିବାକୁ ଚିନ୍ତା କରିଥିଲେ। ପ୍ରଥମେ ସେ ଏଠାରେ ପଢୁଥିବା ପିଲାମାନଙ୍କୁ ମାଗଣାରେ ପାଠ ପଢାଉଥିଲେ। ଏହାସହ ପିଲାମାନଙ୍କୁ ପ୍ଲାଷ୍ଟିକର ପୁନଃ ବ୍ୟବହାର କଥା ମଧ୍ୟ କହୁଥିଲେ। ପିଲାମାନଙ୍କ ଅଭିଭାବକଙ୍କୁ ମଧ୍ୟ ଏମାନେ ପ୍ଲାଷ୍ଟିକ ବ୍ୟବହାର ନ କରିବାକୁ କହୁଥିଲେ। ହେଲେ ଏଥିପ୍ରତି କେହି ଦୃଷ୍ଟି ଦେଉ ନ ଥିଲେ। ଶେଷରେ ଏମାନେ ସ୍କୁଲ ଫି ବାବଦରେ ପିଲାଙ୍କଠାରୁ ପ୍ଲାଷ୍ଟିକ ବର୍ଜ୍ୟବସ୍ତୁ ଆଣିବାକୁ ଚିନ୍ତାକଲେ। ଏବେ ପିଲାମାନେ ନିଜ ଘରୁ ଓ ଆଖପାଖ ଅଞ୍ଚଳରୁ ଏସବୁ ସଂଗ୍ରହ କରି ଆଣିବା ସହ ଏହାର ପୁନଃ ବ୍ୟବହାର ହୋଇ ପାରୁଛି। ଦିସପୁରରେ ପାଖାପାଖି ୧୦ ଲକ୍ଷ ଲୋକ ରହୁଥିବା ବେଳେ ଏଠାରେ ପ୍ରତିଦିନ ୩୭ ଟନ୍ ବର୍ଜ୍ୟବସ୍ତୁ ବାହାରିଥାଏ। ଯାହା ଗତ ସାତ ବର୍ଷ ମଧ୍ୟରେ ୧୪ ଗୁଣା ବୃଦ୍ଧି ପାଇଛି। ପୂର୍ବରୁ ଏଠାକାର ଲୋକେ ପ୍ଲାଷ୍ଟିକକୁ ପୋଡି ଦେଉଥିବାରୁ ପରିବେଶ ପ୍ରଦୂଷଣର ମାତ୍ରା ବଢି ଯାଉଥିଲା। ଏବେ କିନ୍ତୁ ଏହାର ପୁନଃ ବ୍ୟବହାର ଫଳରେ ପ୍ରଦୂଷଣ ମଧ୍ୟ କମ୍ ହୋଇଯାଇଛି।
