ବନ୍ତଳା, ୨୨ା୨ (ଡି.ଏନ.ଏ.) – ଅନୁଗୋଳ ଜିଲା ସାତକୋଶିଆ ଅଭୟାରଣ୍ୟ ବନ୍ତଳା ଥାନା ରାଇଗୁଡା ରେଞ୍ଜ ଏନ୍କ୍ଲୋଜରରେ ଥିବା ବାଘୁଣୀ ସୁନ୍ଦରୀ ବେକରୁ ଶୁକ୍ରବାର ରେଡିଓ କଲାର ଖୋଲାଯାଇଛି। ଓଜନ ବୃଦ୍ଧି କାରଣରୁ ସୁନ୍ଦରୀର ବେକ ମୋଟା ହୋଇଯାଇଥିଲା। ଫଳରେ ରେଡିଓ କଲାର ଚାପି ହୋଇ ସମସ୍ୟା ସୃଷ୍ଟି କରୁଥିଲା। ତେଣୁ ଟ୍ରାଙ୍କୁଲାଇଜ କରାଯିବା ପରେ ରେଡିଓ କଲାରଟିକୁ ବାହାର କରାଯାଇଥିବା ବନ ବିଭାଗ ପକ୍ଷରୁ ସୂଚନା ଦିଆଯାଇଛି।
ବିଭାଗ ପକ୍ଷରୁ ମିଳିଥିବା ସୂଚନା ଅନୁଯାୟୀ, ପୂର୍ବାପେକ୍ଷା ସୁନ୍ଦରୀ ଅଧିକ ହୃଷ୍ଟପୃଷ୍ଠ ହୋଇଯାଇଛି। ବାଘୁଣୀର ବେକ ସଂଲଗ୍ନ ଅଂଶ ମୋଟା ହୋଇଯାଇଛି। ତେଣୁ ବନ୍ଧା ଯାଇଥିବା ରେଡିଓ କଲାର ତାହାର ଚାଲିଚଳନ ଉପରେ ପ୍ରଭାବ ପକାଉଥିଲା। ତେଣୁ ବାଘୁଣୀକୁ ଟ୍ରାଙ୍କୁଲାଇଜ୍ କରିବା ଆବଶ୍ୟକ ହୋଇପଡ଼ିଥିଲା। ଏଥି ଲାଗି ସାତକୋଶିଆ ଏବଂ ଶିମିଳିପାଳର ପ୍ରାଣୀ ଡାକ୍ତର, ବିଶେଷଜ୍ଞଙ୍କୁ ନେଇ ୧୦ଜଣିଆ ଟିମ ଗଠନ କରାଯାଇଥିଲା। ଟ୍ରାଙ୍କୁଲାଇଜ୍ ପରେ ସୁନ୍ଦରୀର ସ୍ବାସ୍ଥ୍ୟାବସ୍ଥା ଯାଞ୍ଚ କରାଯାଇଛି। ଏଥିସହ ମୁହଁଠାରୁ ଲାଞ୍ଜ, ଗୋଲେଇ, ବେକଗୋଲେଇ, ଉଚ୍ଚତା, ଗୋଡ଼ର ଉଚ୍ଚତା ମପାଯାଇଛି। ଆଞ୍ଚଳିକ ମୁଖ୍ୟ ବନ ସଂରକ୍ଷକ ତଥା ସାତକୋଶିଆ କ୍ଷେତ୍ର ନିର୍ଦ୍ଦେଶକ ପ୍ରଦୀପ ରାଜ କରାଟେ, ସାତକୋଶିଆ ଡିଏଫଓ ରାମସ୍ବାମୀ ପି, ପ୍ରାଣୀ ଚିକିତ୍ସକ କିଶୋର ସାହୁ, ଏସିଏଫ ସରୋଜ କୁମାର ପଣ୍ଡା, ରାଇଗୁଡା ରେଞ୍ଜ ଅଧିକାରୀ, ଆଞ୍ଚଳିକ ମୁଖ୍ୟ ବନ ସଂରକ୍ଷକ କାର୍ଯ୍ୟାଳୟର ପ୍ରାଣୀ ବିଶେଷଜ୍ଞ ରୁଦ୍ର ନାରାୟଣ ପ୍ରଧାନ ପ୍ରମୁଖ ଟ୍ରାଙ୍କୁଲାଇଜ୍ ବେଳେ ଉପସ୍ଥିତ ଥିଲେ। ପୂର୍ବାହ୍ନ ସାଢେ ୧୦ଟାରୁ ଆରମ୍ଭ ହୋଇଥିବା ଏହି ଟ୍ରାଙ୍କୁଲାଇଜ୍ ପ୍ରକ୍ରିୟା ଅପରାହ୍ନ ୨ଟା ଯାଏ ଚାଲିଥିଲା। ବାଘୁଣୀ ସମ୍ପୂର୍ଣ୍ଣ ନିସ୍ତେଜ ହେବାକୁ ୩୦ରୁ ୪୦ ମିନିଟ ଲାଗିଥିଲା। ସମସ୍ତ ପ୍ରକ୍ରିୟା ଶେଷ ହେବା ପରେ ପୁଣି ଚେତା ଫେରାଇ ଆଣିବାକୁ ଇଞ୍ଜେକ୍ସନ ଦିଆଯାଇଥିଲା। ସମସ୍ତ କାର୍ଯ୍ୟ ସୁରକ୍ଷିତ ଭାବେ ଶେଷ ହୋଇଥିବା ବନ ବିଭାଗ ପକ୍ଷରୁ କୁହାଯାଇଛି।
ଏ ନେଇ ସାତକୋଶିଆ ଡିଏଫଓ କୁହନ୍ତି ଟ୍ରାଙ୍କୁଲାଇଜ କରାଯାଇ ସୁନ୍ଦରୀ ବେକରୁ ରେଡ଼ିଓ କଲାର ଖୋଲାଯାଇଛି। ହେଲେ ଆଉ କୌଣସି ରେଡିଓ କଲାର ଲଗାଯାଇନାହିଁ। ଶନିବାର ପ୍ରେସ ମିଟ୍ କରାଯାଇ ପରବର୍ତ୍ତୀ ପଦକ୍ଷେପ ସମ୍ପର୍କରେ ସବିଶେଷ ତଥ୍ୟ ପ୍ରଦାନ କରାଯିବ ବୋଲି ସେ କହିଛନ୍ତି।
