ନୂଆଦିଲ୍ଲୀ,୧୮ା୫: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଘନିଷ୍ଠ କୁହାଯାଉଥିବା କୋଲକାତାର ପୂର୍ବତନ ପୋଲିସ କମିଶନର ରାଜୀବ କୁମାରଙ୍କ ଅଡ଼ୁଆ ବଢ଼ିବାରେ ଲାଗିଛି। ସାରଦା ଚିଟ୍ଫଣ୍ଡ ମାମଲାରେ ଫସିଥିବା ରାଜୀବଙ୍କୁ ଫେବୃୟାରୀ ୫ରେ ସୁରକ୍ଷା ଦେବା ସହ ଗିରଫ ନ କରିବା ଲାଗି ଦିଆଯାଇଥିବା ନିର୍ଦ୍ଦେଶକୁ ସୁପ୍ରିମକୋର୍ଟ ଶୁକ୍ରବାର ହଟାଇ ଦେଇଛନ୍ତି। ଏଥିସହ ରାଜୀବଙ୍କୁ ଆଇନଗତ ସହାୟତା ଲାଗି ୭ ଦିନ ଦେଇଛନ୍ତି। ଏହି ସମୟ ମଧ୍ୟରେ ସେ ଆଗୁଆ ଜାମିନ୍ ଲାଗି ଆବେଦନ କରିପାରିବେ ଓ ପରବର୍ତ୍ତୀ ପଦକ୍ଷେପ ସମ୍ପର୍କରେ ବିଚାରବିମର୍ଶ କରିପାରିବେ ବୋଲି କୁହାଯାଉଛି।
ବିଚାରପତି ରଞ୍ଜନ ଗୋଗୋଇଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ସାରଦା ଚିଟ୍ଫଣ୍ଡ ମାମଲାକୁ ନେଇ ଚିନ୍ତା ପ୍ରକଟ କରିଛନ୍ତି। ମାର୍ଚ୍ଚ ୩୦ରେ ଖଣ୍ଡପୀଠ ସିବିଆଇକୁ ତଥ୍ୟ ପ୍ରମାଣ ଦାଖଲ ଲାଗି ନିର୍ଦ୍ଦେଶ ଦେଇଥିଲେ। ସିବିଆଇ ପକ୍ଷରୁ ରାଜୀବଙ୍କ ଗିରଫଦାରି ଉପରେ ଲଗାଯାଇଥିବା କଟକଣା ହଟାଇ ଦେବା ଲାଗି କୋର୍ଟରେ ଆବେଦନ କରାଯାଇଥିଲା। ଶୁକ୍ରବାର ସର୍ବୋଚ୍ଚ ଅଦାଲତ ଉକ୍ତ କଟକଣାକୁ ହଟାଇ ଦେଇଛନ୍ତି। ୭ ଦିନ ପରେ ସିବିଆଇ ସାରଦା ଚିଟ୍ଫଣ୍ଡ ମାମଲାରେ ତଥ୍ୟ ପ୍ରମାଣ ନଷ୍ଟକରିବା ଅଭିଯୋଗରେ ରାଜୀବ କୁମାରଙ୍କ ସମ୍ପୃକ୍ତି ନେଇ ତାଙ୍କୁ ଜେରା କରିପାରିବ। ଇତିମଧ୍ୟରେ ରାଜୀବ ଆଇନଗତ ସୁରକ୍ଷା ଓ ପଦକ୍ଷେପ ନେଇପାରିବେ ବୋଲି କୋର୍ଟ କହିଛନ୍ତି।
ବିରାଟ ଷଡ଼ଯନ୍ତ୍ର ପଛର ରହସ୍ୟ ଉନ୍ମୋଚନ ଲାଗି ରାଜୀବ କୁମାର ଓ ଅନ୍ୟ ବରିଷ୍ଠ ପୋଲିସ ଅଧିକାରୀଙ୍କୁ ଜେରା କରାଯିବାର ଆବଶ୍ୟକତା ରହିଛି ବୋଲି ସଲିସିଟର ଜେନେରାଲ ତୁଷାର ମେହେଟା ଓ ସିବିଆଇ କହିଛନ୍ତି। ସାରଦା ଗ୍ରୁପ ନିର୍ଦ୍ଦେଶକଙ୍କ ସହ ବହୁ ରାଜନେତାଙ୍କ ସମ୍ପୃକ୍ତି ଥିବା ଅଭିଯୋଗ କରାଯାଇଛି। ତେବେ ରାଜୀବ କୁମାରଙ୍କ ଓକିଲ ଏଭଳି ଅଭିଯୋଗକୁ ଖଣ୍ଡନ କରିଛନ୍ତି। ସେ କହିଛନ୍ତି ଯେ, ପୂର୍ବରୁ ସୁପ୍ରିମକୋର୍ଟଙ୍କ ନିର୍ଦ୍ଦେଶକ୍ରମେ ସିବିଆଇ ଶିିଲଂରେ ତାଙ୍କୁ ଜେରା କରିଥିବାବେଳେ କିଛି ତଥ୍ୟ ପାଇ ନ ଥିଲେ।
