ଔପଦା/ଖଇରା/କୁଳିଅଣା, ୨୫ା୯(ଡି.ଏନ.ଏ./ସ୍ବ.ପ୍ର.)-ବାଲେଶ୍ୱର ଓ ମୟୂରଭଞ୍ଜ ଜିଲାର ପୃଥକ ସ୍ଥାନରେ ସାପ କାମୁଡାରେ ୩ ଜଣଙ୍କ ମୃତ୍ୟୁ ଘଟିଛି। ସେମାନେ ହେଲେ ବାଲେଶ୍ୱର ଜିଲା ଔପଦା ଥାନା ଗଜାଆମ୍ବ ଗ୍ରାମର ମାଧବାନନ୍ଦ ମାରାଣ୍ଡି(୧୮), ଖଇରା ବ୍ଲକ ଡୁଙ୍ଗୁରା ପଞ୍ଚାୟତ ଖଣ୍ଡପଡ଼ା ଗ୍ରାମର ୨ବର୍ଷର ପୁଅ ଓ ମୟୂରଭଞ୍ଜ ଜିଲା କୁଳିଅଣା ଥାନା ଅସନବଣି ଗ୍ରାମର ଆହ୍ଲାଦୀ ମହାନ୍ତ(୫୦)।
୨୩ ତାରିଖ ରାତିରେ ମାଧବାନନ୍ଦ ପରିବାର ଲୋକଙ୍କ ସହ ଖାଇସାରି ଶୋଇଥିବା ବେଳେ ହଠାତ ତାଙ୍କ ଦେହ ପୋଡ଼ାଜଳା ହେବାରୁ ସେ ଚିତ୍କାର କରିଥିଲେ। ପରିବାର ଲୋକ ପୁଅର ଏପରି ଅବସ୍ଥା ଦେଖି କୌଣସି ବିଷଧର ସାପ କାମୁଡ଼ିଥିବା ଅନୁମାନ କରି ତୁରନ୍ତ ଚିକିତ୍ସା ପାଇଁ ସୋର ଡ଼ାକ୍ତରଖାନାକୁ ନେଇଥିଲେ। ସେଠାରେ ତାଙ୍କର ଅବସ୍ଥା ଗୁରୁତର ହେବାରୁ ବାଲେଶ୍ୱର ଡ଼ାକ୍ତରଖାନାକୁ ନିଆଯାଉଥିବା ବେଳେ ବାଟରେ ତାଙ୍କର ମୃତ୍ୟୁ ହୋଇଛି। ଔପଦା ପୋଲିସ ସୋରରେ ପହଞ୍ଚି ଶବ ବ୍ୟବଚ୍ଛେଦ କରିବା ସହ ଏକ ଅପମୃତ୍ୟୁ ମାମଲା(ନଂ.୧୮/୧୯) ରୁଜୁ କରିଛି। ପରିବାରର ସେ ଏକମାତ୍ର ପୁଅ ଥିଲେ। ସେ ସୋର କଲେଜରେ ଯୁକ୍ତ ୩ ପ୍ରଥମ ବର୍ଷର ଛାତ୍ର ଥିଲେ ା ଖଣ୍ଡପଡ଼ା ଗ୍ରାମର ରବୀନ୍ଦ୍ରଙ୍କ ୨ବର୍ଷର ପୁଅକୁ ନେଇ ଶୋଇଥିବା ବେଳେ କୌଣସି ବିଷଧର ସାପ କାମୁଡ଼ିଥିଲା। ପୁଅ ସୋମବାର ସକାଳେ କାନ୍ଦିବାରୁ ଜ୍ୱର ହୋଇଛି ଭାବି ରବୀନ୍ଦ୍ର ତାଙ୍କୁ ଭଦ୍ରକ ନେଇଯାଇଥିଲେ। ସେଠାରେ ଡାକ୍ତରଙ୍କଠାରୁ ସାପ କାମୁଡ଼ିଥିବା କଥା ଜାଣିବା ପରେ ଗୁରୁତର ଅବସ୍ଥାରେ ସେ ତାଙ୍କୁ କଟକ ନେଇଯାଇଥିଲେ। ସେଠାରେ ପୁଅର ମୃତ୍ୟୁ ହୋଇଯାଇଥିଲା। ପୁଅର ଶବକୁ ଧରି ଆସୁଥିବା ବେଳେ ବାପା ରବୀନ୍ଦ୍ର ଗୁରୁତର ହୋଇପଡ଼ିଥିଲେ। ପରେ ତାଙ୍କର ଚିକିତ୍ସା ପାଇଁ କଟକ ବଡ଼ ଡାକ୍ତରଖାନା ଆଇସିୟୁରେ ରଖାଯାଇଛି। ସେହିପରି ମୟୂରଭଞ୍ଜ ଜିଲା କୁଳିଅଣା ଥାନା ଅଧୀନ ଅସନବଣି ଗ୍ରାମର ଆହ୍ଲାଦୀ ମହାନ୍ତ ମଙ୍ଗଳବାର ସକାଳେ ତାଙ୍କୁ ଏକ ବିଷଧର ସାପ କାମୁଡି ଦେଇଥିଲା। ପରିବାର ଲୋକେ ତାଙ୍କୁ ଚିକିତ୍ସା ପାଇଁ ବାରିପଦା ମେଡିକାଲରେ ଭର୍ତ୍ତି କରିଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏନେଇ କୁଳିଅଣା ଥାନାରେ ଏକ ଅପମୃତ୍ୟୁ ମାମଲା (ନଂ.୩୦/୧୯) ରୁଜୁ ହୋଇଛି।
